ᑖᒃᓯᒥᒃ ᓇᖕᒥᓂᖃᓚᐅᖅᑐᖅ ᐱᕋᔭᖕᓂᕋᖅᑕᐅᒍᑎᖏᑦ ᖁᔭᓈᖅᑕᐅᓚᐅᖅᐳᑦ ᐱᓇᓱᐊᕈᓯᐅᓚᐅᖅᑐᒥ

by Darrell Greer- January 10, 2018

ᐅᑭᐅᓄᑦ ᓯᑕᒪᓄᑦ ᖁᕕᐊᓇᖏᑦᑐᖅᓯᐅᓚᐅᖅᖢᓂ ᐃᓱᓕᓚᐅᖅᐳᖅ ᑏᕝ ᕙᐃᔅᒪᓐ ᑲᖏᖅᖠᓂᕐᒥᐅᑕᖅ ᐃᖅᑲᖅᑐᒐᒃᓴᐅᓕᖅᑎᑕᐅᓚᐅᖅᖢᓂ ᓇᓪᓕᐅᒃᑯᒫᓕᕆᓂᕐᒧᑦ ᐱᕋᔭᐅᑎᖃᓚᐅᕐᓂᖓᓄᑦ ᑕᒪᓐᓇ ᐃᖅᑲᖅᑐᖅᑕᐅᒍᑎᒃᓴᖓ ᖁᔭᓈᖅᑕᐅᓕᓚᐅᖅᐳᖅ ᐱᓇᓱᐊᕈᓯᐅᓚᐅᖅᑐᒥ.

ᑏᕝ ᕙᐃᔅᒪᓐ ᓂᑯᕕᖓᔪᖅ ᓵᖓᓂ ᐱᖁᑎᒋᓚᐅᖅᓯᒪᔭᒥᓂ ᑲᖏᖅᖠᓂᕐᒥ ᔭᓐᓄᐊᕆ 5−ᒥ ᐃᖅᑲᖅᑐᒐᒃᓴᐅᓕᖅᑎᑕᐅᓚᐅᖅᖢᓂ ᓇᓪᓕᐅᒃᑯᒫᓕᕆᓂᕐᒧᑦ ᐱᓂᕐᓗᒍᑎᖃᕐᓂᖓᓄᑦ ᐃᑯᐊᓪᓚᓚᐅᖅᓯᒪᑎᓪᓗᒍ ᐃᒡᓗᕐᔪᐊᖁᑎᖓ ᑎᓴᐱᕆ 25, 2013-ᒥ. ᐃᖅᑲᖅᑐᖅᑕᐅᒍᑎᖓ ᕙᐃᔅᒪᓐ ᖁᔭᓈᖅᑕᐅᓚᐅᖅᐳᖅ ᐱᓇᓱᐊᕈᓯᐅᓚᐅᖅᑐᒥ. Darrell Greer/NNSL photo

ᑕᐃᒪᓐᓇ ᖁᔭᓈᖅᑕᐅᒑᖓᑕ ᐃᖅᑲᖅᑐᖅᑕᐅᒍᑎᒃᓴᐃᑦ, ᑖᒃᑯᐊ ᐃᖅᑲᖅᑐᖅᑕᐅᔪᒥᒃ ᐊᑭᕋᖅᑐᖅᑎ ᐅᑭᐅᒥᒃ ᐊᑕᐅᓯᕐᒥᒃ ᐱᕕᒃᓴᖃᖅᑎᑕᐅᕗᖅ ᑕᒡᕙᖓᑦ ᐅᑉᓗᒥᑦ ᖁᔭᓈᖅᑕᐅᓚᐅᖅᑎᓪᓗᒍ ᐃᖅᑲᖅᑐᒐᒃᓴᐅᓕᖅᑎᑦᓯᒃᑲᓐᓂᕈᓐᓇᖅᖢᓂ.

ᕙᐃᔅᒪᓐ, ᐅᑭᐅᓕᒃ 52-ᓂᒃ, ᑲᖏᖅᖠᓂᕐᒧᐊᓚᐅᖅᓯᒪᕗᖅ ᐅᑭᐅᑦ 13 ᐅᖓᑖᓅᐊᓕᖅᑐᖅ ᑲᔪᓯᑦᓯᐊᕈᒪᑉᓗᓂ ᐱᓕᕆᐊᖃᕈᒪᑉᓗᓂ ᓇᖕᒥᓂᖅ ᐱᓕᕆᕕᖃᕐᓗᓂ ᐅᒃᑯᐃᖅᓯᓚᐅᖅᖢᓂᓗ ᐱᓕᕆᕕᖕᒥᒃ S&G Taxi ᑖᒃᓯᓕᕆᔨᒃᑯᑦ (ᐊᑦᓯᖅᑕᐅᓯᒪᑉᓗᓂ ᐃᕐᓂᖏᓐᓂᒃ, ᓴᐃᒪ ᐊᒻᒪ ᒍᕆᒍᕆ) ᐊᒻᒪ ᓄᓇᒃᑰᕈᑎᓕᕆᕕᖃᓕᓚᐅᖅᖢᓂ ᓄᓇᓕᖕᒥ.

ᕙᐃᔅᒪᓐ ᐅᖃᓚᐅᖅᐳᖅ ᐊᐅᓪᓛᑦᓯᐊᓚᐅᖅᐳᑦ ᐅᑭᐅᑦ 9 ᐅᖓᑖᓄᑦ ᓄᓇᓕᖕᓄᓪᓗ ᐅᑎᖅᑎᑦᓯᓇᓱᐊᖅᐸᒃᖢᓂ ᐱᔪᓐᓇᕌᖓᒥ.

ᐅᖃᓚᐅᖅᐳᖅ ᑲᑉᐸᓂᖓ ᐊᐅᓪᓛᑦᓯᐊᖏᓕᓚᐅᖅᖢᑎᒃ ᑎᓴᐱᕆ 25, 2013-ᒥ, ᐅᖁᖅᓴᐅᑦ ᐃᑯᐊᓪᓚᒃᑎᑦᓯᓚᐅᕐᒪᑦ ᐱᔅᓂᔅᖃᕐᕕᖓᓂ.

“ᐃᕐᓂᕋ ᓯᑭᑑᒥᓂᒃ ᓄᓇᒃᑰᕈᑎᖃᕐᕕᖕᒥᑦ ᐱᓂᐊᖅᖢᓂ ᖁᕕᐊᓱᒡᕕᖕᒥ ᐊᒻᒪ ᐅᒃᑯᐃᕐᒪᒍ, ᐃᑯᐊᓛᖅᑐᖃᖅᑐᒻᒪᕆᐅᑉᓗᓂ,” ᐅᖃᓚᐅᖅᐳᖅ ᕙᐃᔅᒪᓐ.

“ᐅᓂᒃᑳᕆᓚᐅᖅᐸᒃᑲ ᑕᒪᕐᒥᒃ ᐳᑭᖅᑕᓕᖕᓄᑦ ᐊᒻᒪ ᓇᓪᓕᐅᒃᑯᒫᓕᕆᔨᒻᓄᑦ (Aviva Insurance), ᐊᒻᒪ ᑎᑭᑎᑦᓯᓚᐅᖅᖢᑎᒃ ᐊᖑᒻᒥᒃ (ᓇᓪᓕᐅᒃᑯᒫᖅᑕᐅᓂᐊᖅᑐᒥᒃ ᖃᐅᔨᓴᖅᑎ ᖃᑉᓯᑐᕋᔭᕐᓂᖓᓄᑦ ᐊᑭᓕᐅᑎᒃᓴᐃᑦ) ᐅᑉᓗᓂ ᖃᑉᓯᑐᐃᓐᓇᕐᓂ ᑎᑭᑦᖢᓂ.

“ᐊᐅᓪᓚᖅᓯᒪᓕᖅᑎᓪᓗᒍ, ᑐᓴᕐᕕᒋᓚᐅᖏᑦᖢᒍ ᐅᑉᓗᓄᑦ ᖃᑉᓯᓄᑭᐊᒃ ᐃᓱᒪᓕᖅᖢᖓ ᖃᓄᐃᓕᐅᓕᕐᒪᖔᑕ, ᐱᖓᓱᑦ ᑕᖅᑭᑦ ᐊᓂᒍᖅᑎᓪᓗᒋᑦ, ᕙᓂᐹᖕᒧᖓᐅᖁᔭᐅᑉᓗᖓ ᐊᐱᖅᓱᖅᑕᐅᓂᐊᖅᖢᖓ ᓇᓪᓕᐅᒃᑯᒫᓕᕆᔨᒃᑯᓐᓄᑦ, ᐅᖃᖃᑦᑕᓕᖅᖢᑎᒃ ᐸᓯᔭᒃᓴᐅᓂᕋᖅᑕᐅᑉᓗᖓ ᐃᒪᓐᓇᐃᓕᐅᖅᑐᖃᕐᓂᖓᓄᑦ.

“ᐱᖁᑎᒐ ᓇᖕᒥᓂᖁᑎᒐ ᐊᒃᓱᕈᑦᓯᐊᓕᖅᖢᓂ ᑲᑕᒃᐸᓪᓕᐊᑐᐃᓐᓇᖅᖢᓂᓗ ᓇᓪᓕᐅᒃᑯᒫᓕᕆᔨᒃᑯᒃᑲ ᐃᑲᔪᖏᓐᓂᖏᓐᓄᑦ ᐅᕙᒻᓂᒃ.”

ᕙᐃᔅᒪᓐ ᐅᐃᒪᔮᓕᖅᖢᓂ ᑕᖅᑭᓄᑦ 18-ᓄᑦ ᐃᑯᐊᓪᓚᓚᐅᖅᑎᓪᓗᒋᑦ, ᑲᑉᐸᓂᖓ ᑮᓇᐅᔭᖃᖏᓕᖅᖢᓂ ᐃᖅᑲᖅᑐᒐᒃᓴᐅᓕᖅᖢᓂᓗ ᓴᒡᓗᑎᖃᓚᐅᕐᓂᖓᓄᑦ ᑎᑎᖃᖁᑎᓂᒃ ᐊᒻᒪ ᓇᓪᓕᑳᒥᒃ ᑖᓐᓇᐅᖏᑦᑐᒥᒃ ᐊᑐᕋᓱᐊᖅᖢᓂ. ᐊᑭᓕᒃᓴᖃᓕᖅᖢᓂᓗ ᒐᕙᒪᒃᑯᓐᓄᑦ $1.2 ᒥᓕᔭᓐᑖᓚᓂᒃ ᐊᑐᖅᑐᐊᓚᐅᖅᑕᒥᓂᒃ ᒐᕙᒪᒃᑯᖏᓐᓂᑦ.

ᕙᐃᔅᒪᓐ ᐅᖃᓚᐅᖅᐳᖅ ᑲᑕᓚᐅᕐᒪᑦ ᑲᔪᓯᑦᓯᐊᖅᑐᒥᒃ ᐱᓕᕆᐊᖃᓚᐅᖅᖢᓂ ᑖᒃᓯᓕᕆᓂᕐᒥᒃ ᓄᓇᒃᑰᕈᑎᓕᕕᖕᒥᒡᓗ ᓄᓕᐊᖓᑕ ᑮᓇᐅᔭᓕᐊᖏᓐᓂᒃ ᐊᑐᖃᑦᑕᖅᖢᓂ ᐃᓚᒌᑦ ᐃᓅᓇᓱᐊᕈᓐᓇᖁᑉᓗᒋᑦ ᑕᒪᓐᓇ ᐊᒃᓱᕈᕐᓇᓚᐅᖅᖢᓂ.

ᐊᒻᒪ, ᐅᖃᓚᐅᖅᖢᓂ, ᐋᓐᓂᕐᓇᕐᓂᖓᓄᑦ ᐃᓗᒃᑯᑦ ᖃᐅᔨᕙᓪᓕᐊᓕᖅᖢᓂ ᐊᒥᓱᑦ ᐃᓄᐃᑦ ᐱᕋᔭᒃᓯᒪᓂᖓᓄᑦ ᐅᒃᐱᕈᓱᓚᐅᕐᓂᖏᓐᓄᑦ.

“ᐱᕙᓪᓕᐊᔪᓕᕆᔨᒃᑯᑦ ᐊᑕᐅᓯᕐᒥᒃ ᐅᖃᐅᓯᖃᓕᕌᖓᑕ, ᐱᐅᖏᑦᑑᑎᑕᐅᖃᑦᑕᓚᐅᕋᒪ ᐊᒻᒪᓗᒃᑲᓐᓂᖅ, ᑳᓐᓱᖃᖅᖢᖓᓗ.

“ᐊᐃᑦᑖᖑᓚᐅᖅᐳᖅ ᐅᓂᒃᑳᓕᐅᖅᑕᐅᓯᒪᔪᑦ ᑲᓇᑕᒥ ᐱᕙᓪᓕᐊᔪᓕᕆᔨᓄᑦ ᐅᑭᐅᖅᑕᖅᑐᒥᐅᑕᐅᔪᓄᑦ ᐊᒻᒪ ᐅᑭᐅᖅᑕᖅᑐᒥ ᐱᕙᓪᓕᐊᔪᓕᕆᔨᓄᑦ, ᐃᒪᓐᓇᐃᓕᐅᓚᐅᕐᒪᑕ, ᐱᕋᔭᒃᓯᒪᓪᓚᕆᖕᓂᕋᖅᑕᐅᑉᓗᖓ ᑭᓯᐊᓂ, ᖃᐅᔨᕕᐅᓇᓱᐊᓚᐅᖅᓯᒪᖏᑦᖢᖓ ᐊᐱᖅᓱᖅᑕᐅᓇᓱᐊᓚᐅᖅᓯᒪᖏᑦᖢᖓᓗ.

“ᑕᐃᒪ ᐅᖃᓪᓚᕕᒋᓇᔭᖏᑉᐸᒃᑲ, ᑭᓯᐊᓂ, ᐊᑕᐅᑦᓯᒃᑯᑦ, ᑕᒪᐃᓐᓂᒃ ᓱᓕᔪᓂᒃ ᐊᐱᖅᓱᕐᓗᑎᒃ ᐅᓂᒃᑳᓕᐅᕋᔭᕋᓗᐊᕐᒪᑕ ᐊᑕᐅᓰᕐᓇᕐᒥᒃ ᑎᒃᑯᐊᖅᑐᖏᓪᓗᑎᒃ ᑐᑭᓯᒋᐊᕈᑎᒃᓴᖃᑦᓯᐊᕐᓂᕋᖅᖢᑎᒡᓗ.”

ᕙᐃᔅᒪᓐ ᓂᑉᓕᐊᑦᑕᐃᓕᓚᐅᖅᐳᖅ ᐊᑭᕋᖅᑐᖅᑕᐅᓕᕋᒥ, ᐱᕋᔭᒃᓯᒪᓪᓚᕆᖕᓂᕋᖅᑕᐅᑉᓗᓂ ᓄᓇᓕᖕᓂᒥᐅᓄᑦ.

ᐅᖃᓚᐅᖅᖢᓂᓗ ᐋᓐᓂᖅᑕᐃᓪᓚᕆᖃᑦᑕᓚᐅᕋᒥ, ᐳᐃᒍᖅᖢᑎᒃ ᐃᓄᐃᑦ ᐱᔨᑦᓯᕋᖅᑕᐅᓚᐅᖅᓯᒪᓂᕐᒥᖕᓄᑦ ᓄᓇᓕᖕᓂᒥᐅᓄᓪᓗ ᐃᓚᒋᔭᐅᑦᓯᐊᓚᐅᖅᓯᒪᓂᖓᓄᑦ ᑖᒃᓯᓕᕆᕕᖓ.

“ᐱᔨᑦᓯᕋᑦᓯᐊᖃᑦᑕᓚᐅᖅᐳᒍᑦ, ᑖᒃᓯᓕᕆᔨᐅᑉᓗᖓ, ᑕᐃᒪᓐᓇ ᐊᑕᐅᓯᕐᒥᒃ ᓄᓇᒃᑰᕈᑎᖃᓚᐅᖅᖢᑕ 12-ᓂᒃ ᓄᓇᒃᑰᕈᑎᖃᓕᖅᖢᑕ ᐱᕋᔭᖕᓂᕋᖅᑕᐅᓕᖅᖢᑕ.

“ᐊᒃᓱᕈᑦᓯᐊᖃᑦᑕᓚᐅᖅᐳᒍᑦ, ᓴᕆᒪᓱᓚᐅᖅᐳᖓᓗ ᐃᓚᒋᔭᐅᖃᑕᐅᓂᕐᒧᑦ ᓄᓇᓕᖕᓂ ᐅᑎᖅᑎᑦᓯᓂᓗᒃᐸᒃᖢᑕᓗ ᓄᓇᓕᖕᓂᒥᐅᓄᑦ, ᐃᓚᐅᑎᑦᓯᓚᐅᖅᓯᒪᑉᓗᑕᓗ ᕼᐋᑭᖅᑎᐊᓛᓂᒃ ᕼᐋᑭᖅᑎᑦᓯᑉᓗᑕ.

“ᑭᓯᐊᓂ ᐱᐅᖏᑦᑐᒥᒃ ᓴᖅᑭᑦᑐᖃᓕᓚᐅᖅᐳᖅ, ᐊᒻᒪ ᐃᓚᖏᑦ ᐱᕙᓪᓕᐊᔪᓕᕆᔨᒃᑯᓐᓂᒥᐅᑕᐃᑦ ᓵᓕᓚᐅᕐᒪᑕ, ᑕᐃᒪᓐᓇ ᐃᓱᒪᒋᔭᐅᑉᓗᖓ ᑕᒪᐅᖓᖅᓯᒪᓂᒻᓄᑦ, ᑕᐃᒪᓐᓇ ᑮᓇᐅᔭᐃᔭᖅᑎᑦᓯᑉᓗᖓ ᐃᓄᖕᓂᒃ ᐊᐅᓪᓚᕈᑎᑉᓗᒋᓪᓗ ᑮᓇᐅᔭᑦ, ᑕᐃᒪᓐᓇᐃᓕᐅᖅᑎᐅᖏᓐᓇᒪ.

“ᓄᓇᖃᓚᐅᖅᓯᒪᕗᖓ ᑮᑉ ᐳᕆᑕᓐ ᐊᐃᓚᓐ Cape Breton Island (Glace Bay), ᖃᓄᑐᐃᓐᓇᖅ ᓴᒡᓗᓱᐃᑦᑑᑉᓗᖓᓗ ᑕᐃᑲᓂ, ᐋᓐᓂᕐᓇᑦᓯᐊᖅᐳᖅ ᐅᒃᐱᕈᓱᓚᐅᖏᒻᒪᑕ ᐅᕙᒻᓂᒃ ᐊᒥᓱᑦ ᖃᓄᐃᓕᔪᓐᓇᖏᑦᖢᖓᓗ, ᑭᓯᐊᓂᑦᑕᐅᖅ ᑕᒪᒃᑯᐊ ᐅᕙᒻᓂᒃ ᖃᐅᔨᒪᔪᑦ ᐅᒃᐱᕈᓱᓚᐅᖅᐳᑦ ᐅᕙᒻᓂᒃ, ᑲᖏᒪᓐᓇ ᓱᖁᑎᒃᓴᓚᐅᖏᑉᐳᖓ.”

ᕙᐃᔅᒪᓐ ᐅᖃᓚᐅᖅᐳᖅ ᐱᕙᓪᓕᐊᔪᑎᒍᑦ ᑎᑎᕋᖅᑕᐅᔪᑦ, ᐃᓚᖏᓪᓗ ᑎᑎᖅᑕᐅᓯᒪᔪᑦ ᖃᕆᑕᐅᔭᒃᑯᑦ ᑕᑯᒃᓴᐅᔪᒃᓴᐅᑉᓗᑎᒃ, ᐋᓐᓂᕐᓇᕆᑦᓯᐊᓚᐅᖅᐸᖏᑦ ᐃᓗᒃᑯᑦ, ᐱᓗᐊᖅᑐᒥᒃ ᖃᐅᔨᒪᑉᓗᓂ ᓄᑕᕋᖏᑦ ᑕᐅᑐᒋᐊᖃᓚᐅᕐᒪᑕ ᑕᐃᒪᓐᓇᐃᓕᐅᖅᑕᐅᑎᓪᓗᒍ.

ᐅᖃᓚᐅᖅᖢᓂᓗ ᐊᒃᓱᕈᑦᓯᐊᓚᐅᖅᐳᑦ ᐃᒡᓗᒥᖕᓂ.

“ᓄᓕᐊᕋ ᐅᒃᐱᕈᓱᒃᖢᓂ ᐅᕙᒻᓂᒃ ᓂᑯᕕᖓᑦᓯᐊᖃᑎᒋᑉᓗᓂᖓᓗ, ᐃᕐᓂᕋ ᐊᖓᔪᒃᖠᖅᐹᖑᖃᑕᐅᔪᖅ (ᐋᓐᑐᕈ) ᐱᓕᕆᔭᖅᑐᕈᔾᔨᑉᓗᓂ ᐅᕙᒻᓂᒃ ᐋᓐᓂᐊᓕᕋᒪ ᑳᓐᓱᖃᓕᖅᖢᖓᓗ ᑕᐃᒪᓐᓇ ᐃᑲᔪᐃᓐᓇᓚᐅᖅᐳᖅ ᐅᕙᒻᓂᒃ 100%−ᓪᓚᕆᒃ.

“ᑭᓯᐊᓂ ᓱᓕ, ᑕᐃᒪᓐᓇ ᑮᓇᐅᔭᓕᐅᖅᑎᕐᔪᐊᖑᕙᓚᐅᖅᖢᖓ ᓱᓇᓗᒃᑖᒧᑦ ᓄᓕᐊᒻᓄᑦ ᑭᓯᐊᓂ ᓂᐅᕕᖅᑕᐅᓗᓂᐅᒋᐊᖃᖃᑦᑕᓚᐅᖅᐳᖅ, ᑮᓇᐅᔭᑭᒃᓴᖅᖢᑕᓗ ᐊᒃᓱᕈᕐᓇᑦᓯᐊᖅᖢᓂᓗ… ᐄᓛᒃ, ᐊᒃᓱᕈᕐᓇᖅᓯᑉᓗᓂᓗ ᐅᕙᑉᑎᓐᓂ.

“ᐊᒃᓱᕈᕐᓇᕋᓗᐊᖅᑎᓪᓗᒍ ᐊᓂᒍᕈᑎᒋᓚᐅᖅᐸᕋ, ᑕᐃᒪᓐᓇᐃᒋᐊᖃᓚᐅᖏᒃᑲᓗᐊᖅᖢᓂᓗ ᐱᑦᓯᐊᓚᐅᖅᐸᑕ ᐱᒋᐊᓕᓵᖅᖢᑎᒃ.

“ᖁᕕᐊᓇᖅ ᑕᒪᓐᓇ ᐳᐃᒍᖅᑕᐅᖕᒪᑦ, ᓄᓇᓕᖕᓂ ᐱᓱᓗᕋᕈᓐᓇᕐᓂᐊᓕᖅᐳᖓ ᐅᑯᐊᖏᓪᓗᑕ.”

Leave a Comment:

Your email address will not be published. Required fields are marked *