Skip to content

ᐱᐅᖏᒃᑲᓗᐊᕋᒥ ᐱᐅᖏᒋᐊᓪᓚᒃᑲᓐᓂᖅᑐᑦ

ᑎᑎᕋᖅᓯᒪᖃᑦᑕᓕᕐᒪᑕ ᐊᒻᒪᓗ ᖃᐅᔨᔭᐅᓕᖅᖢᑎᒃ ᓄᓇᓕᖕᒥᐅᓄᑦ ᑕᒪᐃᑕ ᑭᓱᓕᒫᑦ ᐱᐅᔪᓐᓃᕈᓐᓇᕐᒪᑕ ᐱᐅᔪᓐᓃᕋᓗᐊᕋᒥᒃ ᓱᓕᒃᑲᓐᓂᕆᐊᓪᓚᒃ ᐱᒃᑲᓐᓂᕈᓐᓇᕐᒪᑕ. ᑕᐃᒪᓐᓇ ᑕᕝᕙ ᒫᓐᓇ ᓯᕗᓕᖅᑎᒋᓇᓱᐊᖅᑕᑦᑎᓐᓄᑦ ᐊᐅᓚᑕᐅᓕᖅᑐᒍᑦ ᓲᖑᓂᕐᕕᐅᓪᓗᑕ ᐊᒻᒪᓗ ᑲᑎᒪᔨᖁᑎᕗᑦ ᐱᐅᒋᔭᐅᔪᒪᓪᓗᑎᒃ ᒪᓕᑐᐃᓐᓇᓕᕐᒪᑕ. ᓇᖕᒥᓂᖅ ᐃᓱᒪᒋᔪᓐᓃᖃᑦᑕᕐᒪᑕ ᐊᖏᖅᑎᑐᐃᓐᓇᐅᓕᖅᖢᑎᒃ ᐊᓯᒥᓄᑦ ᐱᐅᖏᑦᑐᓂᒃ ᐋᕿᒃᑕᐅᓯᒪᔪᓂᒃ ᒪᓕᓕᖅᖢᑎᒃ.

ᒐᕙᒪᑎᑐᖃᒃᑯᑦ ᑕᐃᒪᐃᑦᑐᑦ.

ᔭᔅᑎᓐ ᑐᕉᑐ ᓇᓗᓇᕈᓐᓃᕐᒪᑦ ᓱᓕᒃᑲᓐᓂ ᑲᑕᒍᑎᒃᓴᓂᒃ ᐋᕿᒃᓱᐃᓪᓗᓂ ᐊᔪᖅᑐᓄᑦ ᐊᓴᔭᐅᓴᕋᐃᑦᑐᓄᓪᓗ ᑭᒡᓕᓃᑐᓂᒃ ᐃᓅᓯᓕᖕᓄᑦ ᓱᐴᖅᑐᒐᓂᒃ ᒪᓕᒐᑎᒍᑦ ᐱᔪᓐᓇᖅᓯᑎᑕᐅᓂᐊᓕᕐᒪᑕ ᔪᓚᐃ 2018-ᒥ. ᑕᒪᓐᓇ ᐃᑎᔪᒥᒃ ᐃᒃᐱᖕᓇᕐᓂᖃᕐᓂᐊᕐᒪᑦ ᐃᓅᓯᓕᒫᑦᑎᓐᓄᑦ ᐃᖅᑲᓇᐃᔭᖅᑎᓄᑦ ᐊᔪᖅᓴᖏᑦᑐᓄᑦ, ᓄᓇᕗᑦ ᒐᕙᒪᖓᓂ ᑲᓇᑕᐅᓪᓗ ᒐᕙᒪᖓᓂ ᓄᓇᓖᓪᓗ ᒐᕙᒪᖏᓐᓂ ᑎᑭᓪᓗᒋᑦ, ᐃᓱᒫᓗᒋᖏᓪᓗᒋᑦ ᐊᖏᕐᕋᕆᔭᐅᔪᓕᒫᓂ ᖃᑕᖑᑎᒌᖕᓄᑦ ᐃᓅᖃᑎᒌᖕᓄᓪᓗ.

ᐃᓱᒪᒋᔭᒃᑯᓪᓕ, ᒪᓐᓇ ᑎᑭᓯᒪᒐᑦᑕ ᐅᑎᖅᑎᑕᐅᕙᓪᓕᐊᓪᓗᑎᒃ ᐊᓯᐅᔨᓚᐅᖅᑕᕗᑦ ᐃᓕᓴᕆᐊᖃᑦᑕᖅᖢᑕ ᐊᓂᒍᐃᓂᑰᔪᑎᒍᑦ ᑲᔪᓯᑦᑎᐊᖅᑑᔮᓕᖅᑎᓪᓗᒋᑦ ᓄᓇᕐᔪᐊᒥᐅᓕᒫᑦ ᐃᓄᖏᓐᓄᑦ ᐱᒃᑯᒥᓇᒻᒪᕆᓕᖅᑎᓪᓗᑕ, ᐊᓱᐃᓛᒃᓕ ᒫᓐᓇ ᑐᓗᖅᑕᐅᒃᑲᓐᓂᖅᐳᒍᑦ ᐊᓯᑦᑕ ᐊᑐᐊᒐᖏᓐᓂᒃ ᐊᑐᓕᖁᔭᐅᓪᓗᑕ, ᐊᖏᕆᐊᖃᖅᖢᑕ ᐅᕙᑦᑎᓐᓄᑦ ᐃᓗᐊᖏᑦᑐᓂᒃ ᐃᓱᒪᒋᖏᓪᓗᑕ ᐊᒡᕖᕆᐊᖃᖔᓕᕐᒥᒐᑦᑕ ᐱᒃᑯᒥᒋᔭᐅᓂᖅᓴᐅᔪᓂᒃ ᐅᑭᐅᖅᑕᖅᑐᒥᐅᓄᑦ.

ᐃᓱᒪᒋᔭᒃᑯᓪᓕ, ᒪᓐᓇ ᑎᑭᓯᒪᒐᑦᑕ ᐅᑎᖅᑎᑕᐅᕙᓪᓕᐊᓪᓗᑎᒃ ᐊᓯᐅᔨᓚᐅᖅᑕᕗᑦ ᐃᓕᓴᕆᐊᖃᑦᑕᖅᖢᑕ ᐊᓂᒍᐃᓂᑰᔪᑎᒍᑦ ᑲᔪᓯᑦᑎᐊᖅᑑᔮᓕᖅᑎᓪᓗᒋᑦ ᓄᓇᕐᔪᐊᒥᐅᓕᒫᑦ ᐃᓄᖏᓐᓄᑦ ᐱᒃᑯᒥᓇᒻᒪᕆᓕᖅᑎᓪᓗᑕ, ᐊᓱᐃᓛᒃᓕ ᒫᓐᓇ ᑐᓗᖅᑕᐅᒃᑲᓐᓂᖅᐳᒍᑦ ᐊᓯᑦᑕ ᐊᑐᐊᒐᖏᓐᓂᒃ ᐊᑐᓕᖁᔭᐅᓪᓗᑕ, ᐊᖏᕆᐊᖃᖅᖢᑕ ᐅᕙᑦᑎᓐᓄᑦ ᐃᓗᐊᖏᑦᑐᓂᒃ ᐃᓱᒪᒋᖏᓪᓗᑕ ᐊᒡᕖᕆᐊᖃᖔᓕᕐᒥᒐᑦᑕ ᐱᒃᑯᒥᒋᔭᐅᓂᖅᓴᐅᔪᓂᒃ ᐅᑭᐅᖅᑕᖅᑐᒥᐅᓄᑦ.

ᑕᐃᒪᐃᓐᓂᖓᓄᑦ ᑕᕝᕙ ᐱᖅᑯᓯᕐᒧᒃ ᐃᓅᓯᕐᒧᓪᓗ ᐊᑦᑕᕐᓇᕈᑕᐅᔪᖅ ᑲᔪᓯᑎᑕᐅᓂᐊᖅᐸᑦ, ᖃᓄᕐᓕ ᑕᐃᒪ ᑭᖑᓂᖓᓂ ᐱᓂᐊᓕᖅᐱᑕ? ᐋᖓᔮᕐᓇᖅᑐᖅ ᓱᓕᒃᑲᓐᓂᖅ ᐊᔪᓕᕈᑕᐅᓕᕈᓐᓇᕐᒥᔪᖅ ᐱᔭᕆᑭᑦᑐᒥᒃ ᐱᔭᐅᔪᓐᓇᖅᓯᓂᐊᕐᒪᑦ? ᓇᐅᒃᑯᓪᓕ ᐅᕙᑦᑎᓐᓄᑦ ᐱᐅᖏᑦᑐᓄᑦ ᐃᓱᓕᕝᕕᖃᕈᓐᓃᖅᐱᑖ?

ᐅᒃᐱᕆᔭᕗᑦ ᓇᖕᒥᓂᕐᓗ ᐱᕈᖅᓴᐅᑎᒋᓯᒪᓪᓗᒋᑦ ᖃᐅᔨᒪᔭᑐᖃᕗᑦ, ᐊᓯᑦᑎᓐᓂᒃ ᐃᖅᑲᓱᑦᑎᐊᕆᐊᖃᕐᓂᖅ, ᑲᒪᑦᑎᐊᕆᐊᖃᕐᓂᖅ, ᐃᓄᒻᒪᕆᒋᐊᖃᕐᓂᖅ ᐊᑦᑕᕐᓇᕈᑕᐅᒋᐊᖃᖏᓐᓂᖅ ᐊᒃᓱᕉᑕᐅᖃᑦᑕᔪᔪᑦ ᒫᓐᓇ ᓄᖑᓴᖅᑕᐅᓕᕐᒪᑕ ᐃᓇᖏᖅᑕᐅᖔᖅᖢᑎᒃ ᐋᖓᔮᕐᓇᖅᑐᓄᑦ ᐃᒥᐊᓗᖕᓄᓪᓗ.

ᐃᓕᓴᕐᕕᕗᑦ ᑕᐃᒪᖓᓄᑦ ᐊᓯᔾᔨᖅᑕᐅᓯᒪᓕᕐᒪᑕ ᐊᔾᔨᒌᖏᑦᑐᓂᒃ ᐅᒃᐱᕐᓂᕐᓂᒃ ᐃᓕᓴᐃᔪᑏᑦ ᐲᖅᑕᐅᓚᐅᖅᑎᓪᓗᒋᑦ ᐃᓄᓕᒫᑦ ᐅᒃᐱᕆᔭᖏᓐᓂᒃ ᐸᐸᑦᑎᔨᕗᑦ. ᐅᓇᑦᑕᐅᖅ ᐃᓚᓕᐅᑎᔭᐅᓯᒪᖕᒥᔪᖅ ᓄᓇᕗᑦ ᑎᓕᔭᐅᓯᒪᔪᑎᖓᓂ ᒪᓕᒐᕐᒥ: ᐊᓯᑦᑎᓐᓂᒃ ᐃᖅᑲᓱᑦᑎᐊᖃᑦᑕᕐᓗᓯ; ᐃᓅᖃᑎᒌᑦᑎᐊᕐᓗᓯ ᐸᖅᑭᑦᑎᐊᖃᑦᑕᕐᓗᓯ ᐃᓕᓯᓐᓂᑦ ᐊᔪᕐᓂᖅᓴᓂᒃ; ᐸᐃᕆᔨᐅᓗᓯ ᖁᕕᐊᓇᖅᑐᓂᒃ ᐃᓅᓯᖃᑦᑎᐊᖁᓪᓗᒋᑦ, ᑐᓐᖓᓇᖅᑐᓂᒃ ᐊᒻᒪᓗ ᑕᒪᐃᓐᓂᒃ ᐱᒃᑯᒥᒍᓱᒃᑐᓂᒃ; ᐱᔨᑦᓯᕋᖅᑎᐅᓗᓯ ᒪᑭᒪᑦᑎᐊᖁᓪᓗᒋᑦ ᖃᑕᖑᑎᒌᑦ ᓄᓇᓕᖕᓂ; ᑐᑭᑖᕈᑎᖃᖃᑦᑕᕐᓗᓯ ᑕᒪᐃᓐᓄᑦ ᐊᖏᕈᑕᐅᓯᒪᔪᓂᒃ; ᐱᕙᓪᓕᐊᑎᑦᑎᖃᑦᑕᕐᓗᓯ ᐊᔪᖏᓴᖃᑦᑕᕐᓗᓯᓗ ᑯᑦᑕᖓᔪᓐᓃᕐᓂᐊᕋᑦᑕ ᐆᒃᑐᖃᑦᑕᕐᓗᑕ ᑭᓱᑐᐃᓐᓇᓂᒃ ᓄᑖᓂᒃ ᐱᔭᒃᓴᓂᒃ ᑲᒪᒋᔭᐅᒋᐊᓕᖕᓂᒃᓗ; ᐱᓇᓱᐊᖃᑎᒌᑦᑎᐊᕐᓗᑕ ᑕᒪᐃᓐᓄᑦ ᐃᓗᐊᕐᓂᖅᓴᒥᒃ ᐋᕿᒃᓱᐃᔪᓐᓇᕐᓂᐊᕋᑦᑕ; ᓄᑖᓄᑦ ᒪᑐᐃᖓᐃᓐᓇᕐᓗᑕ ᐊᒻᒪᓗ ᕿᓃᓐᓇᕐᓗᑕ ᐃᓗᐊᕐᓂᖅᓴᓂᒃ ᐊᑐᖅᑕᐅᔪᓐᓇᖅᑐᓂᒃ; ᐊᒻᒪᓗ, ᐃᖅᑲᓱᑦᑎᐊᖃᑦᑕᕐᓗᑕ ᑲᒪᑦᑎᐊᖃᑦᑕᕐᓗᑕᓗ ᓄᓇᑦᑎᓐᓂᒃ, ᐆᒪᔪᓂᒃ ᐊᕙᑎᑦᑎᓐᓂᒃᓗ.

ᑖᓐᓇ ᐅᖃᐅᓯᐅᓯᒪᔪᖅ ᒫᓐᓇ ᒪᓕᒐᑎᒍᑦ ᐊᑐᓕᖅᑎᑕᐅᓂᐊᕐᓂᕋᐃᔪᖅ ᒥᐊᓕᕗᐊᓇᒥᒃ ᐃᓱᒪᓐᓂᖏᑦᑎᐊᕐᒪᑕ ᐅᐃᕆᓯᒪᓕᖅᑐᓂᒃ ᐃᓗᐊᖅᓴᖅᑕᐅᒋᐊᖃᕐᓂᐊᕐᒥᖕᒪᑕ ᐊᑯᓂᐅᓕᖅᑐᒥᒃ ᐊᑐᖃᑦᑕᓕᖅᐸᑕ ᒫᓐᓇ ᖁᓚᓇᓕᖅᑐᓂᒃ ᑎᒥᖃᖅᑐᑦ ᓄᓇᖃᖅᑳᖅᑐᐃᑦ ᑲᓇᑕᒥ. ᐱᐅᖏᒃᑲᓗᐊᕐᒪᑦ ᓂᕿᑦᑎᐊᕙᓂᑦ ᓄᒃᑎᕆᐊᖃᖅᓯᒪᒐᑦᑕ ᒫᓐᓇ ᓂᕿᐅᓕᖅᑐᓄᑦ ᓴᓇᓯᒪᕙᒌᖅᑐᓂᒃ ᓱᓕᒃᑲᓐᓂᖅ ᐃᓚᓯᒃᑲᓐᓂᕐᓂᐊᓕᕆᕗᒍᑦ ᑳᓂᐱᔅᑐᖃᑦᑕᖅᑐᓂᒃ ᐃᓱᒪᖅᓱᑦᑎᐊᖅᖢᑎᒃ.

ᐅᕙᖓ ᐊᑕᐅᓯᑐᐊᖑᔪᖓ ᒫᓐᓇ ᐅᖃᐅᓯᖃᖅᑐᓂ ᑕᐃᒪᓐᓇ. ᐊᓯᓐᓂᒃ ᑖᕙᓂ ᐱᑕᖃᖅᐹ ᑕᐃᒪᓐᓇ ᐃᓱᒪᔪᓂᒃ ᐃᒃᐱᒋᔪᓂᒃᓗ ᓄᑭᕐᒥᒍᑦ ᐃᓱᒪᒋᔭᒥᓂᒃ ᓂᓪᓕᓚᐅᕐᓕᑦ.