ᐊᒃᓱᕉᑎᒋᒋᐊᒃᑲᓐᓂᓚᐅᒃᑭᑦ ᐱᖅᑯᓯᓂᒃ ᑕᑯᒃᓴᐅᑎᑦᑎᔪᑦ

NNSL- March 4, 2018

ᐊᒃᓱᐊᓗᒃ ᖁᕕᐊᓇᖅᑐᒥᒃ ᑕᑯᕋᓐᓈᖅᑎᑕᐅᓚᐅᕋᑦᑕ Inhabit Media-ᑯᑦ ᑭᖑᓪᓕᕐᒥ ᐅᑭᐅᒥ ᐅᓂᒃᑳᓕᐅᖅᑎᓂᒃ ᑕᑯᒃᓴᐅᑎᑦᑎᑎᓪᓗᒋᑦ ᐱᓇᓱᐊᕈᓯᐅᓚᐅᖅᑐᒥ, ᑲᑎᖃᑎᒋᔪᓐᓇᓚᐅᕋᑦᑎᒍ ᐅᖃᓪᓚᖃᑎᒋᓗᒋᓪᓗ ᓄᓇᕗᒥ ᑕᑯᒐᓐᓈᒐᒃᓴᓂᒃ ᓴᓇᔩᑦ, ᐃᓄᓕᒫᑲᓴᐃᑦ ᐊᔪᖏᒻᒪᑕ.

ᖁᕕᐊᓇᓚᐅᕐᒥᔪᖅ ᐅᕙᑦᑎᓐᓄᑦ ᐊᖏᕐᕋᐅᔾᔨᔪᓐᓇᓚᐅᕋᑦᑕ ᐊᒥᓱᓂᒃ ᐅᖃᓕᒫᖓᓂᒃ ᑎᑎᕋᖅᑕᐅᓯᒪᔪᓂᒃ ᑕᒫᓂᕐᒥᐅᓄᑦ ᓴᓇᐅᒐᖅᑎᓄᑦ. ᐅᖃᐅᑎᒍᓐᓇᖅᑕᒋᑦ ᑕᒪᐃᑕ ᐱᔭᕗᑦ ᐊᑐᓂ ᐊᑭᖏᑦ ᓇᒻᒪᓚᐅᖅᑐᖅ ᐊᑭᑐᒃᑲᓐᓂᕈᓐᓇᓚᐅᖅᑐᓪᓗ.

ᒫᓐᓇ ᐅᓂᒃᑳᑦ ᐊᒥᓲᓕᕐᒪᑕ ᐅᖃᓕᒫᒐᖑᖅᑎᑕᐅᓯᒪᔪᑦ ᑎᑭᓴᕐᕕᒃᓴᖏᑦ ᑕᑯᓪᓗᒋᑦ ᐊᔾᔨᒌᖏᑦᑐᑦ ᓄᓇᕗᒥᐅᑦ ᐱᖅᑯᓯᖏᓐᓂᒃ ᐅᓂᒃᑳᖅᓯᒪᔪᑦ, ᒪᒃᑯᒃᑐᓄᑦ ᐅᖃᓕᒫᒐᒃᓴᐃᑦ ᐃᓐᓇᕐᓄᓪᓗ ᐃᓄᒃᑎᑐᑦ ᐃᓕᓴᕈᒪᔪᓄᑦ ᐅᓂᒃᑳᖅᑐᐊᖏᓐᓂᒃ ᒫᓐᓇᓗ ᐊᒃᓱᕉᑎᒋᔭᖏᓐᓂᒃ ᐅᓂᒃᑳᖅᓯᒪᔪᖃᐅᖅᑐᑦ ᐃᓅᓯᖏᓐᓂᒃ.

ᐋᕿᒃᓱᐃᓚᐅᖅᑐᖅ ᓯᕘᕋᓚᐅᕐᒪᑕ ᐅᓄᖏᓗᐊᖅᑐᓄᑦ ᐱᒃᑯᒥᒋᔭᐅᓂᐊᕋᓱᒋᓪᓗᑎᒃ ᑕᐃᒪᓐᓇ ᐋᕿᒃᓱᐃᒍᑎᒃ – ᐊᒥᓱᓂᒃ ᐅᖃᓕᒫᒐᓕᐅᖅᑎᓂᒃ ᐃᖃᓗᖕᓅᖅᑎᑦᑎᒋᐊᖃᖅᖢᑎᒃ – ᐊᑭᖏᓐᓄᑦ ᐅᑎᖅᑎᕕᐅᔪᓐᓇᕆᐊᖃᓚᐅᕐᒪᑕ. ᖁᕕᐊᓇᓚᐅᖅᑐᖅ ᐊᒥᓱᑦ ᓂᐅᕕᓚᐅᕐᒪᑕ ᐅᖃᓕᒫᒐᓂᒃ ᐊᑎᓕᐅᖅᑕᐅᓯᒪᔪᓂᒃ ᐅᓂᒃᑳᓕᐅᖅᑎᖏᓐᓄᑦ ᑕᒪᐅᖓᖅᑎᑕᐅᓯᒪᔪᓄᑦ ᑕᒪᑐᒪᓂ ᓴᓇᐅᒐᖏᓐᓂᒃ ᑕᑯᒃᓴᐅᑎᑦᑎᓂᖏᓐᓂ, ᐊᑎᓕᐅᖅᓯᖃᑦᑕᕐᓂᐊᕐᒪᑕ ᓂᐅᕕᐊᒃᓴᐅᓕᖅᑎᓪᓗᒋᑦ ᓈᒻᒪᓈᖅᓯᔪᑎᒋᓚᐅᖅᑕᖏᑦ.

Inhabit Media-ᑯᑦ ᓲᖃᐃᒻᒪ ᐊᒃᓱᕈᓗᐊᕋᔭᕐᒪᑕ ᑕᑯᒃᓴᐅᑎᑦᑎᓇᓱᐊᕆᐊᒃᓴᖅ ᐃᑲᔪᖅᑕᐅᓐᓂᖏᒃᑯᑎᒃ ᒐᕙᒪᑎᒃᑯᓐᓂᑦ ᐃᓄᐃᓪᓗ ᑎᒥᖁᑎᖏᓐᓂᑦ, ᑖᒃᑯᓇᖓᑦ ᑭᓯᐊᓂ ᑳᓐᑐᕌᒃᑎᑕᐅᓪᓗᑎᒃ ᐅᖃᓕᒫᒐᓕᐅᖅᑏᑦ ᑖᒃᑯᐊ ᑲᒻᐸᓂᖓᑦ ᓴᓇᔪᓐᓇᖅᓯᓚᐅᕐᒪᑕ ᐃᓕᓴᕈᑎᒃᓴᓂᒃ ᐅᖃᓕᒫᒐᓂᒃ ᑕᐃᓱᒪᓂᑐᖃᕐᓗ ᐅᓂᒃᑳᖅᓯᒪᔪᓂᒃ ᐅᖃᓕᒫᒐᓂᒃ ᓄᓇᕗᒥᐅᑦ ᐅᖃᐅᓯᖏᑎᑐᑦ ᑎᑎᕋᖅᓯᒪᔪᓂᒃ. ᒐᕙᒪᑎᒃᑯᑦ ᐃᒻᒥᒃᑰᕐᓗᑎᒃ ᓴᓇᐅᒐᕈᓐᓇᖏᒻᒪᑕ ᑕᒪᒃᑯᓂᖓ, ᐊᒻᒪᓗ Inhabit Media-ᑯᓐᓂᒃ ᑕᑎᖃᖅᖢᑎᒃ ᐊᑐᕐᓂᖃᓚᐅᖅᑐᖅ ᓄᓇᕗᒥᐅᓄᑦ ᓴᓇᐅᒐᓂᒃ ᑕᑯᒃᓴᐅᑎᑕᐅᓂᐊᖅᑐᓂᒃ ᐋᕿᒃᓱᐃᔨᐅᓪᓗᑎᒃ.

ᑕᒪᑐᒪᓂ ᑕᖅᑭᑦᑎᓐᓂ ᑐᓴᕋᓐᓈᕈᓐᓇᖅᓯᓂᐊᕐᒥᔪᒍᑦ ᒐᕙᒪᑎᒃᑯᓐᓄᑦ ᓴᓇᔭᐅᓯᒪᔪᓂᒃ ᕿᓚᐅᒃᑯᑦ ᐊᑐᖅᖢᓂᔪᒃ ᓂᐱᓕᐅᓚᐅᕐᒪᑕ, ᓂᐅᕕᖅᑐᓄᑦ ᐱᒃᑯᒥᒋᔭᐅᓚᖓᔪᖅ ᓇᓗᓇᖏᑦᑐᖅ, ᑕᐃᓱᒪᓂ ᓴᓇᔭᐅᓂᑯᐃᑦ ᑖᒃᑯᓄᖓ ᐱᐅᒋᔭᐅᖏᓐᓇᓕᕐᒪᑕ. ᐅᑯᐊ ᑕᕝᕙ ᐃᓄᒃᑎᑐᑦ ᓴᓇᓯᒪᔪᑦ ᓂᐅᕕᐊᒃᓴᐃᑦ ᓂᐲᑦ ᒐᕙᒪᑎᒃᑯᓐᓄᑦ ᐃᑲᔪᖅᓴᖅᑕᐅᓪᓗᑎᒃ ᑭᓯᐊᓂ ᓴᓇᔭᐅᓂᖏᑦ ᐊᑭᓕᖅᑕᐅᔪᓐᓇᓚᐅᕐᒥᔪᑦ, ᑭᓯᐊᓂᓕ ᓄᓇᕗᒥᐅᓄᑦ ᓴᓇᔭᐅᓯᒪᖕᒪᑕ ᓴᓇᔨᖏᓐᓂᒃᓗ ᐊᑐᖅᖢᑎᒃ ᓄᓇᕗᒥᐅᑦ ᑲᒻᐸᓂᖏᑕ.

ᔨᐅᕆ ᑳᓐᔅᑯᓐᓂ ᕿᓚᐅᔾᔭᖅᑎ ᓯᑏᑦ ᕆᒃᐱ – ᐱᒋᐊᖓᖅᑎᑦᑎᖃᑕᐅᔪᔪᖅ ᓯᕗᓪᓕᖅᐹᒥᒃ ᓄᓇᕗᒥ ᓂᐱᓕᐅᖅᑎᓂᒃ, ᐋᑯᓗᒃᑯᑦ ᑐᓴᕋᓐᓈᕐᕕᐊᓂᑦ – ᑖᒃᑯᐊ ᑕᑯᒃᓴᐅᑎᑦᑎᓚᐅᕐᒥᔪᑦ Inhabit Media-ᑯᓐᓂ ᐱᒋᐊᖓᖅᑎᑕᐅᔪᖕᒪᑦ ᓯᕗᓪᓕᖅᐹᒥ ᓂᐱᓕᐊᕆᓚᐅᖅᑕᖓᑦ ᒪᒪᖅᑐᕐᒥᒃ ᑕᐃᓪᓗᓂᔪᒃ, ᐅᖃᓕᒪᒐᖅ ᓂᐱᓕᐅᖅᓯᒪᔪᖅ ᑯᑭᑦᑕᐹᕈᓯᕐᓂᒃ ᐃᓕᓴᐃᔪᑎ ᑎᑕᐅᓯᖏᓐᓂᒃ ᐊᑐᖅᖢᑎᒃ ᑖᒃᑯᐊ ᑎᑕᒃᑏᑦ.

ᕆᒃᐱ ᐅᖃᕆᓪᓗᓂ ᑎᑕᒃᑏᑦ, ᑕᐃᒪᖓᓂᑦ ᓴᓇᐅᒐᕆᔭᐅᓕᖅᑐᖅ ᑎᑕᒃᑎᖏᓐᓄᑦ, ᐊᐅᔭᐅᓂᐊᖅᑐᕉᖅ ᔫᕈᑉᒥᐅᓄᑦ ᓂᐅᕈᑲᑕᖕᓂᐊᕐᒪᑕ, ᓇᓗᓇᕈᓐᓃᖅᑐᑦ ᓄᓇᕗᒥᐅᑦ ᑎᑕᐅᓯᖏᑦ ᓄᓇᕐᔪᐊᒥᐅᓄᑦ ᐱᐅᒋᔭᐅᓗᐊᓕᕐᓂᖏᓐᓂᒃ ᓄᓇᕗᒥᐅᑦ ᐅᖓᑖᓄᑦ ᓈᓚᒃᑕᐅᖃᑦᑕᕈᓐᓇᖅᓯᔪᑦ. ᑖᒃᑯᐊ ᐊᔪᖏᓐᓂᖏᑦ ᓇᓗᓇᖏᑦᑑᒐᓗᐊᑦ ᑕᐃᒫᑎᒋ ᐱᔭᕆᑐᑎᒋᔪᒥᒃ ᑲᒪᓇᓱᐊᕆᐊᒃᓴᖅ ᑭᓯᐊᓂᓕ ᐊᓯᖏᓐᓄᑦ ᓄᓇᕗᒥ ᑎᑕᒃᑎᓄᑦ ᒪᑐᐃᖅᓯᔪᑕᐅᓂᐊᕐᒪᑦ – ᐋᑯᓗᒃᑯᑦ ᓇᓗᓇᐃᒃᑯᑕᖓᓂᒃ ᐊᖅᑯᑎᖃᕐᓗᑎᒃ ᑖᕙᓂ ᑕᑯᒃᓴᐅᑎᑦᑎᒋᐊᖅᑐᕐᓂᐊᕐᒪᑕ ᓇᓗᓇᖏᑦᑑᒐᓗᐊᖅᑕᐅᖅ ᓇᖕᒥᓂᖅ ᐊᑎᕐᒥᓂᒃ ᐊᑐᕐᓗᑎᒃ ᑕᑯᒃᓴᐅᑎᑦᑎᒍᓐᓇᕐᒥᔪᑦ ᓴᓇᐅᒐᕐᒥᓂᒃ.

ᑕᐃᒪᓐᓇᑎᒋ ᓇᖕᒥᓂᖅ ᐱᓇᓱᐊᒐᕆᓪᓗᒍ ᑕᒪᐅᖓ ᑎᑭᓲᖑᖏᒻᒪᑕ ᐊᒥᓱᑦ. ᐊᒥᓱᓂᒃ ᓱᓕ ᐅᑭᐅᓂᒃ ᐋᕿᒃᓱᖅᐸᓪᓕᐊᓂᐊᕐᒪᑕ ᑕᑯᕋᓐᓈᖅᑎᑦᑎᔩᑦ ᓄᓇᕗᒥ ᓴᓇᐅᒐᕆᓗᒍ ᐱᔭᕆᑐᓚᐅᑲᓚᖓᔪᖅ, ᑭᓯᐊᓂᓕ ᐊᔪᕐᓇᖏᒻᒪᑦ ᐃᒻᒥᒃᑰᕐᓗᑎᒃ ᑎᑕᒃᑏᑦ ᐃᖕᖏᖅᑏᓪᓗ ᖃᖓᑐᐃᓐᓇᖅ ᐱᔪᓐᓇᖅᓯᔪᒫᕐᒪᑕ ᒐᕙᒪᑎᒃᑯᓐᓄᑦ ᐃᑲᔪᖅᑕᐅᖏᒃᑲᓗᐊᕐᓗᑎᒃ ᕿᑭᖅᑖᓂ ᐃᓄᐃᑦ ᑲᑐᔾᔨᖃᑎᒌᖓᓄᓪᓘᓐᓃᑦ, ᒪᓐᓇ Inhabit Media-ᑯᑦ ᑕᑯᒃᓴᐅᑎᑕᖓᓂᒃ ᐃᑲᔪᖅᓴᖅᑎᐅᖃᑕᐅᖕᒪᑕ.

ᑕᐃᑯᖓ ᑎᑭᑦᑐᓐᓇᖅᓯᓚᐅᖏᓐᓂᑦᑎᓐᓂ, ᐊᑐᓂ ᓴᓇᐅᒐᖅᑎᖁᑎᑦᑎᓐᓂᒃ ᐃᑲᔪᖅᓴᕆᐊᖃᖅᑐᒍᑦ ᓴᓇᐅᒐᒥᓂᒃ ᐊᔪᖏᓴᕐᓂᖏᓐᓂ ᓄᓇᓕᑦᑎᓐᓂᖔᖅᑐᑦ. ᓂᐅᕕᖃᑦᑕᕐᓗᒋᑦ ᓴᓇᐅᒐᖏᑦ ᓂᐱᓕᐊᖏᑦ, ᐅᖃᓕᒫᒐᓕᐊᖏᑦ, ᖃᓄᑐᐃᓐᓇᑦ ᓄᓇᓕᑦᑎᓐᓂ ᓴᓇᐅᒐᖅᑎᕗᑦ ᐃᑲᔪᕆᐊᖃᕋᑦᑎᒍ ᓂᐅᕕᖃᑦᑕᕐᓗᒋᑦ ᓴᓇᐅᒐᖏᑦ, ᓂᐱᓕᐊᖏᑦ, ᒧᒥᖅᑏᓪᓗ ᐊᑭᓕᖅᓱᖅᑕᐅᓗᑎᒃ ᑕᑯᕋᓐᓈᖅᑎᑦᑎᖃᖅᑕᕈᓐᓇᕐᓂᐊᓕᕐᒪᑕ ᐱᒃᑯᒥᓵᕆᓗᑎᒃ ᓴᓇᐅᒐᕐᒥᓂᒃ ᐱᖅᑯᓯᕗᑦ ᑕᑯᒃᓴᐅᑎᑕᐅᔪᓐᓇᕐᓂᐊᕐᒪᑕ ᓄᓇᕐᔪᐊᒥ ᑕᑯᒃᓴᐅᑎᑕᐅᖃᑦᑕᕐᓗᓂ ᑭᓯᐊᓂ.

ᑮᓇᐅᔭᖃᖅᑎᑦᑎᔨᐅᖃᑦᑕᖅᑐᑦ ᑎᒥᖁᑎᒋᔭᐅᓪᓗᑎᒃ ᓇᓗᓇᕈᓐᓃᕐᒪᑕ ᑕᒪᒃᑯᓂᖓ ᐱᒃᑯᒥᒍᓱᖕᓂᖏᓐᓂᒃ. ᑕᑯᑎᒋᐊᖃᖅᑕᕗᑦ ᐊᔪᖏᓐᓂᑦᑎᓐᓂᒃ, ᐊᒃᓲᓐ.

Leave a Comment:

Your email address will not be published. Required fields are marked *