Skip to content

ᐊᐅᐸᔮᖅᑐᓂᒃ ᑭᐅᑎᓯᒪᓚᐅᖅᑐᑦ ᐱᑦᓱᖁᔨᖏᓱᑎᒃ

ᐃᓕᓴᖅᑏᑦ ᓇᑦᓯᓕᒃ ᐃᓕᓴᕐᕕᐊᓂ ᑭᐊᑎᓯᒪᓚᐅᕐᒪᑕ ᐊᐅᐸᔮᖅᑐᓂᒃ ᕖᕗᐊᕆ 28-ᒥ, ᑲᑐᔾᔨᓪᓗᑎᒃ ᖃᐅᔨᒃᑲᐃᓇᓱᐊᖅᖢᑎᒃ ᐱᑦᓱᖃᑦᑕᖅᑐᑦ ᒪᓂᒻᒥᔭᐅᑐᐃᓐᓇᔮᔪᓐᓃᕐᒪᑕ.
ᐃᓕᓴᕐᕕᐊᓂ ᐊᖓᔪᖅᑳᖅ ᔩᓇ ᐱᔾᓱ ᔮᓐᓄᐊᕆ ᐃᓱᓕᓕᖅᑎᓪᓗᒍ ᐃᓕᓴᕐᕕᖕᒥ/ᐱᑦᓱᖃᑦᑕᖁᔨᖏᖢᑎᒃ ᐊᒃᓱᕉᑎᖃᓚᐅᕐᒪᑕ, ᑖᓐᓇ ᐋᕿᒃᓱᖅᑕᐅᓪᓗᓂ Red Cross-ᑯᓐᓄᑦ ᐃᓕᓴᐃᔨᓂᒃ ᑎᑭᑎᑦᑎᓪᓗᑎᒃ ᖃᓪᓗᓈᓂᑦ, ᐃᓕᓴᖅᑎᓄᑦ ᐃᒃᐱᖕᓇᖅᑐᓂᒃ ᑐᓴᖅᑎᑎᓇᓱᐊᖅᖢᑎᒃ. ᐃᓕᓴᐃᓚᐅᕐᒪᑕ ᐊᒃᓱᕉᑎᖃᖅᑐᑦ ᐱᑦᓱᖃᖅᑕᖁᔨᖏᓱᑎᒃ ᒪᑯᐊ ᐳᑭᖅᑕᓕᒃᑯᓐᓂᒃ ᐅᓂᒃᑳᑎᑦᑎᓪᓗᑎᒃ ᓇᑦᓯᓕᒃ ᐃᓕᓴᕐᕕᐊᓂ ᐱᓇᓱᐊᕈᓯᐅᓚᐅᖅᑐᒥ ᑕᒪᐅᖓ ᐱᓇᓱᐊᕈᓯᕐᒧᑦ ᑎᑭᓱᒍ.
ᐊᒻᒪᓗᑦᑕᐅᖅ ᐃᓕᓴᖅᑏᑦ ᐱᓕᕆᓂᐊᕐᒥᔪᑦ ᓯᓚᑦᑐᒃᓴᐅᑎᓂᒃ ᑕᑯᒃᓴᐅᑎᑦᑎᓂᐊᕐᒪᑕ ᐊᕐᕌᒍᑕᒫᑦ ᐃᓕᓴᕐᕕᐊᓂ ᓯᓚᑦᑐᒃᓴᐅᑎᓂᒃ ᑕᑯᓴᐅᑎᑦᑎᖃᖅᑕᓕᕐᒪᑕ ᓯᕗᓂᖓᓂ ᕿᑎᕐᒥᐅᓕᒫᓄᑦ ᑕᑯᒃᓴᐅᑎᑕᐅᓂᐊᖅᑐᓂᒃ ᐱᒋᐊᓚᐅᖏᓐᓂᖏᓐᓂ ᖁᕐᓗᖅᑐᒥ ᒫᔨ 16-ᒥᑦ 18-ᒧᑦ. ᐊᔪᖏᓐᓂᖅᐹᖅ ᒪᒃᑯᑦᑐᖅ ᓂᕈᐊᖅᑕᐅᓂᐊᖅᑐᖅ ᕿᑎᕐᒥᐅᓂ ᐃᓚᐅᔪᓐᓇᕐᓂᐊᕐᒪᑦ ᑲᓇᑕᓕᒫᒥ ᓯᓚᑦᑐᒃᓴᐅᑎᓂᒃ ᑕᑯᒃᓴᐅᑎᑦᑎᓕᖅᐸᑕ ᐋᑐᕚᒥ ᒪᐃ 16-ᒥᑦ 18ᒧᑦ.

ᑎᑕᐅᑎᒥᒃ ᑐᓂᔭᐅᔪᑦ ᐃᓐᓇᒃᑯᕕᖕᒥᐅᑦ
ᐅᓇ ᑎᒥᒧᑦ ᐃᓅᔪᑕᐅᓗᑐᖏᑦᑑᒐᓗᐊᖅ ᐃᓚᒋᔭᐅᖕᒪᑦ ᐃᓅᓯᕐᒧᑦ ᖁᕕᐊᓱᓕᖅᐹᓪᓕᕈᑕᐅᓪᓗᓂ ᐃᖃᓗᒃᑑᑦᑎᐊᒥᐅᓂ ᑕᐃᒪᖓᓂᑦ ᑲᒪᒋᔭᐅᒋᐊᖃᓕᖅᑐᓄᑦ ᐃᓐᓇᒃᑯᕕᐊᓂ.
ᐅᓇ ᒪᕐᕈᐃᓕᖓᔪᓂᒃ ᓇᕿᑦᑕᐅᑎᓕᒃ ᐱᐊᓄᕐᔪᐊᖅ ᑕᑭᓂᖃᖅᑐᖅ 2-ᒦᑐᓪᓗᐊᓂᒃ ᐊᖏᕐᕋᖅᑖᓚᐅᖅᑐᖅ ᓄᓇᓕᖓᓂ ᐃᓐᓇᒃᑯᕕᖕᒥ. ᑖᓐᓇ ᑐᒃᓯᐊᕐᕕᖕᒥ ᐃᓐᖏᕈᑎᐅᓪᓗᓂ ᐱᐊᓄᕕᓂᖅ Glad Tidings Church-ᑯᓐᓂ ᐊᑐᖅᑕᓂᑯ 1980-ᓂ. ᑭᓯᐊᓂᓕ, ᓄᑖᓂᒃ ᐅᐊᔭᒨᖅᑐᓂᒃ ᐱᐊᓄᓂᒃ ᐃᓐᖏᕈᑎᖃᓕᕐᒪᑕ. ᐊᔪᕆᖅᓱᐃᔨᖓᓐᓄᑦ ᑐᓂᔭᐅᓚᐅᕐᒪᑦ ᕼᐃᐅᕆᒧᑦ ᒥᐅᕆ-ᕉᔅ ᒪᒃᓴᒐᕐᒧᓪᓗ ᐊᖏᕐᕋᖓᓅᖅᑕᐅᓪᓗᓂ. ᑖᒃᑯᐊ ᓇᖕᒥᓂᖅ ᑐᓂᓯᓕᖅᑐᕕᓃᑦ ᕼᐊᒪᓚᖓᑕ ᐱᖑᐊᖅᑐᓕᕆᔨᖏᓐᓄᑦ ᐊᑐᖅᑕᐅᓂᐊᕐᒪᑦ, ᕼᐃᐅᕆ ᒪᒃᓴᒐᖅ ᐃᖅᑲᐅᒪᔪᖅ.
“ᐅᕙᖓᓕ ᓇᖕᒥᓂᖅ ᐱᐊᓄᖃᓕᕋᒪ, ᐊᓱᐃᓛᒃ ᐃᓱᒪᓕᓚᐅᖅᑐᖓ ᑐᒃᓯᐊᕐᕕᒃᒥ ᐃᓐᖏᕈᑎᒥᒃ ᐊᑐᖏᖔᕐᓗᖓ ᐱᔪᓐᓇᖅᓯᒐᒪ ᐱᐊᓄ ᑐᓂᓕᓚᐅᖅᑕᕋ,” ᐅᖃᕆᓪᓗᓂ.

ᐊᐅᓪᓚᓕᖅᑐᑦ ᑭᐸᐃᒃᒥᐅᓄᑦ
14 ᖁᕐᓗᖅᑐᒥᐅᑦ ᑐᖓᓕᖓᓂ ᐃᓕᓴᖅᑏᑦ ᒍᕇᑦ 9-ᒥ ᖁᓛᓄᓪᓗ ᓂᐅᕈᓂᐊᓕᕐᒪᑕ ᓯᕗᓪᓕᖅᐹᒥ ᑕᐅᖅᓰᓗᑎᒃ ᐃᓕᓴᖅᑎᓂᒃ ᑭᐸᐃᒃᒥᐅᓂᒃ ᕖᕗᐊᕆ 28-ᒥ. ᐃᓕᓴᖅᑏᑦ ᖁᕐᓗᖅᑐᒥᐅᑦ ᑐᕌᒐᖃᖅᑐᑦ ᓯᐊᓯᒥᐅᓂᒃ ᑭᐸᐃᒃᒥ, ᐃᓄᒋᐊᖕᓂᖃᖅᑐᖅ ᑖᓐᓇ ᓄᓇᓕᒃ 7,500-ᓂᒃ ᐋᑐᕙ ᑰᖓᓂ ᑲᓇᑕᒥᐅᑦ ᓄᓇᓕᐸᐅᔭᖓᑕ ᖃᓂᒋᔭᖓᓂ.
ᓯᐊᓪᓯᒥᖔᕐᓗᑎᒃ ᐳᓚᕋᕐᓂᐊᖅᑐᑦ ᐊᓯᖏᓐᓄᑦ ᑲᓇᑕᒥ ᑕᑯᒥᓇᖅᑐᓄᑦ, ᑲᓇᑕᒥ ᓴᓇᐅᒐᖅᑏᑦ ᑕᑯᒃᓴᐅᑎᑦᑎᕕᐊᓄᑦ, ᑲᓇᑕᒥ ᑮᓇᐅᔭᓕᐅᖅᑏᑦ ᓴᓇᕕᐊᓄᑦ, ᑲᑎᒪᕕᒃᔪᐊᖓᓄᑦ, ᑲᓇᑕᒥ ᑕᐃᓱᒪᓂᑐᖃᕐᓂᒃ ᑕᑯᒃᓴᐅᑎᑦᑎᕕᐊᓄᑦ. ᕿᓚᓈᕆᔭᖃᕐᒥᔪᑦ ᐋᑐᕚᒥ ᑕᑯᔭᖅᑐᕐᓂᐊᕐᒪᑕ ᓄᓇᕗᑦ ᓯᕗᓂᒃᓴᕗᒃᑯᑦ ᓯᓚᑦᑐᒃᓴᕐᕕᒃᔪᐊᖓᓄᑦ ᐊᒻᒪᓗ ᑖᕙᓃᓐᓂᕐᒥᓂ ᓯᑮᕆᐊᖅᑐᕐᓂᐊᖅᖢᑎᒃ, ᐱᖃᑎᖃᕐᓗᑎᒃ ᐃᓕᓴᐃᔨᒥᓂᒃ ᑕᓂᐊᓪ ᓯᑳᓕᑦᒥᒃ.
ᑮᓇᐅᔭᓂᒃ ᑲᑎᖅᓱᐃᓪᓗᑎᒃ ᖃᖓᑦᑕᐅᑎᑖᓚᐅᖅᑐᑦ, ᐃᓕᓴᖅᑏᑦ ᓄᓪᓗᒃᑕᖅᑎᑦᑎᕙᒃᖢᑎᒃ ᓄᓇᓕᖓᓂ ᐹᐱ ᐊᕐᓇᕕᓗᒃᒧᑦ ᓴᓇᐅᒐᓂᒃ.
ᑖᕙᓂᕐᒥᐅᖔᓪᓕ ᐃᓕᓴᖅᑎᖏᑦ ᑭᐸᐃᒃᒥᐅᑦ ᑎᑭᑎᑕᐅᓂᐊᕐᒥᔪᖅ ᖁᕐᓗᖅᑐᒧᑦ ᐳᓛᕆᐊᕐᓗᑎᒃ ᐄᐳᓗ 16-ᒥᑦ 23-ᒧᑦ, ᓯᑳᓕᑦ ᐅᖃᒃᑲᓐᓂᖅᖢᓂ.