ᐃᖃᓗᖕᓂ ᓂᕈᐊᖅᑎᓪᓗᒋᑦ ᐊᓯᐸᐃᔪᖃᓚᐅᕐᒪᑦ, ᓚᐃᑦᓯᑑᓐ ᐊᑭᓯᑎᓪᓗᒍ ᓯᕗᓕᖅᑎᐅᑉ ᑐᖓᓕᖓᓂᒃ

by Michele LeTourneau- November 3, 2017

ᐃᖃᓗᐃᑦ-ᒪᓂᕋᔭᒃᒥᐅᓄᑦ ᓂᕈᐊᖅᑕᐅᓚᐅᖅᑐᖅ ᓄᓇᕗᒥ ᒪᒃᑯᖕᓂᖅᐹᖑᓪᓗᓂ ᒪᓕᒐᓕᐅᖅᑎᒃᓴᓂ ᐅᒃᑑᐸ 31-ᒥ – ᐋᑕᒥ ᐋᕆᐊᖅ ᓚᐃᑦᓯᑑᓐ – ᓯᓂᓕᖅᑎᓪᓗᒍ.

ᐋᑕᒥ ᐋᕆᐊᖅ ᓚᐃᑦᓯᑑᓐ, ᐅᕙᓂ ᑕᑯᒃᓴᐅᔪᖅ ᐃᕐᓂᓛᒥᓂᒃ ᐄᑕᓐᒥᒃ ᐸᐃᕆᑎᓪᓗᒍ ᓂᕈᐊᕐᓇᐅᑉ ᐅᓐᓄᐊᖓᓂ, ᐲᖅᓯᓚᐅᕐᒪᑦ ᒪᓐᓇ ᒪᓕᒐᓕᐅᖅᑎᖓᓂᒃ ᐊᒻᒪᓗ ᓯᕗᓕᖅᑎᐅᑉ ᑐᖓᓕᖓᓂᒃ ᒨᓂᑲ ᐃᐊᓪ−ᑲᓇᔪᕐᒥᒃ ᐃᒃᓯᕙᐅᑕᖓᓂᑦ ᐃᖃᓗᐃᑦ−ᒪᓂᕋᔭᒃᒥᐅᓂ ᐅᒃᑑᐸ 30−ᒥ.

ᑕᒫᓂ ᓂᕈᐊᕈᑎᕕᓃᑦ ᐊᑯᓂ ᓈᓴᖅᑕᐅᓚᐅᕐᒪᑕ ᑭᖑᕙᖅᖢᑎᒃ, ᐅᓐᓄᐊᕌᓗᒃᑯᑦ ᑭᓯᐊᓂ ᖁᓛᓂ ᐊᓂᒍᖅᓯᒪᓕᖅᑎᓪᓗᒍ. ᑭᓯᐊᓂᓕ ᐃᓐᓇᓚᐅᕋᓂ ᓯᕗᓂᖓᓂ ᖃᐅᔨᒪᕙᒌᓕᖅᑐᕕᓂᖅ ᐊᑭᓯᓂᐊᕆᐊᒥᓂᒃ ᑲᑎᒪᔨᐅᔪᒥᒃ ᒨᓂᑲ ᐃᐊᓪ-ᑲᓇᔪᕐᒥᒃ. ᑭᓯᐊᓂᓕ ᐅᒃᐱᕆᓗᐊᓚᐅᖏᑕᖓ.

“ᑕᒪᑐᒪᓂ ᓯᕗᓂᖓᓂ ᐅᓪᓘᕋᑖᖅᑐᓂ (ᓂᕈᐊᖅᑕᐅᓇᓱᐊᖅᑎᓪᓗᒍ), ᐅᕙᓐᓂᒃ ᐅᒃᐱᕆᔪᓐᓃᖃᑦᑕᓚᐅᖅᑐᖓ. ᐊᓱᐃᓛᒃ ᓂᕈᐊᕐᓇᓕᖅᑎᓪᓗᒍ ᐅᓪᓗᐊᓂ, ᐊᒃᓱᕈᓗᐊᒧᑦ ᐃᓱᒪᑦᑎᐊᕈᓐᓇᐃᓪᓕᓪᓗᖓ ᓄᓇᕐᔪᐊᓕᒫᒥ ᐱᔪᓐᓇᕆᐊᓐᓂᒃ ᓇᓗᓕᖅᓯᒪᓕᖅᖢᖓ,” ᐅᓂᒃᑳᓚᐅᖅᑐᖅ ᓚᐃᑦᓯᑑᓐ.

“ᑭᓯᐊᓂ ᐊᓱᐃᓛᒃ ᐱᓪᓚᖅᑖᖅᑐᑦ ᑕᑯᓕᑕᐃᓐᓇᕋᒃᑭᑦ.”

ᓚᐃᑦᓯᑑᓐ ᐊᑭᓯᓇᓱᐊᓚᐅᕐᒪᑦ ᓲᖑᔪᒥᒃ ᐊᕐᓇᒥᒃ, ᒨᓂᑲ ᐃᐊᓪ-ᑲᓇᔪᕐᒥᒃ, ᓂᕈᐊᖅᑕᐅᖔᓚᐅᖅᑐᖅ 2011-ᒥ ᐊᒻᒪᓗ ᑕᐃᒪᖓᓂᑦ ᒐᕙᒪᑎᒃᑯᑦ ᐃᓗᐊᓂ ᐱᔭᕆᑐᔪᓂᒃ ᐱᓇᓱᐊᖃᐃᓐᓇᖅᖢᓂ ᓯᕗᓕᖅᑎᐅᑉ ᑐᖓᓕᖓᓂᒃ ᐊᒥᓱᓂᒃᓗ ᐊᐅᓚᑦᑎᔨᒃᑯᑦ ᐱᓕᕆᐊᖏᓐᓂᒃ ᑲᒪᔨᐅᓯᒪᓪᓗᓂ. ᖄᖏᐊᕐᔪᓚᐅᖅᑕᖓ, 253-ᓄᑦ ᓂᕈᐊᖅᑕᐅᓪᓗᓂ 227-ᓂᒃ ᐱᑎᓪᓗᒍ.

“ᖃᐅᔨᒪᓚᐅᖅᑐᖓ ᐱᔭᕆᑐᓂᐊᕐᓂᖓᓂᒃ ᐅᓪᓚᖃᑎᒋᓪᓗᒍ. ᒨᓂᑲ ᐊᒃᓱᕈᖅᓯᒪᖕᒪᑦ ᐊᒻᒪᓗ ᑕᐃᒪᖓᓂᑦ ᐃᓚᐅᖃᑕᐅᖏᓐᓇᖅᖢᓂ ᑕᒪᐃᓐᓂ ᐱᕙᓪᓕᐊᔪᓂ ᓄᓇᓕᑦᑎᓐᓂ, ᑭᓯᐊᓂᓕ ᐅᕙᖓ ᖃᐅᔨᒪᓇᓱᒋᓚᐅᕋᒪ ᓱᓕ ᑕᒪᑐᒪᓂ ᒪᒃᑯᒃᑐᐃᑦ ᐱᕝᕕᒃᓴᖃᖅᑎᑕᐅᔪᓐᓇᖅᓯᓇᓱᒋᓪᓗᒋᑦ ᐃᓕᓴᖅᓯᒪᔪᑦ ᐃᓄᐃᑦ ᐃᓚᓕᐅᑎᔪᓐᓇᖅᓯᖕᒪᑕ ᓄᓇᓕᖕᓂ ᐊᐅᓚᑦᑎᔨᓄᑦ ᑲᒪᔨᐅᔪᓐᓇᖅᓯᖕᒪᑕ ᓄᓇᕗᒥᒃ ᑭᖑᓂᖓᒍᑦ ᑖᒃᑯᐊ ᐊᔪᖏᑦᑐᐊᓗᐃᑦ ᑲᔪᓯᑎᑦᑎᓗᑎᒃ,” ᐅᖃᕆᓪᓗᓂ ᓚᐃᑦᓯᑑᓐ.

ᓯᕗᕚᖃᕐᒪᑦ ᒪᓕᒃᖢᓂ ᑐᒥᖏᓐᓂᒃ ᓂᒡᒋᒥᐅᓄᑦ ᕿᑭᖅᑖᓗᖕᒥ ᒪᓕᒐᐅᖅᑎᐅᓚᐅᖅᑐᒥᒃ ᑏᕕᑦ ᔪᐊᓇᓯᒥᒃ, ᓂᕈᐊᖅᑕᐅᖅᑳᓚᐅᖅᑐᒥᒃ 2013-ᒥ, ᐊᕐᕌᒐᖃᕆᓪᓗᓂ 30-ᓂᒃ ᑲᑎᒪᕝᕕᓂ ᓄᑖᖑᓪᓗᓂ.

ᓚᐃᑦᓯᑑᓐ, ᐅᔪᕈᒋᔭᐅᔪᖅ ᓯᕗᓂᖓᓂ ᓯᕗᓕᖅᑎᕕᓂᕐᒧᑦ ᐄᕙ ᐋᕈᐊᒧᑦ, ᑕᐃᒪᖓᓂᑦ ᕿᓚᓈᕆᔭᖃᕐᒪᑦ ᑕᐅᑐᖑᐊᖅᐸᒃᖢᓂᐅᒃ ᒪᓕᒐᓕᐅᕐᕕᖕᒥ ᑲᑎᒪᔨᐅᔪᓐᓇᕆᐊᒃᓴᖅ ᐃᓅᓱᒃᑑᓱᖓᖅᖢᓂ.

“ᑕᐃᒪᖓᓂᑦ ᑲᑎᒪᔨᒃᓴᐃᑦ ᐅᓪᓚᓕᕌᖓᑕ ᐃᓚᐅᔪᒪᖃᑦᑕᔪᒐᒪ ᐃᖅᑲᐅᒪᓂᓐᓂ. ᖃᓂᒋᓪᓗᒋᑦ ᐅᔾᔨᖅᓱᕋᓱᐃᓐᓇᐅᔭᕋᒃᑭᑦ ᓂᕈᐊᕐᓇᓕᕌᖓᑦ ᖃᓄᐃᓐᓂᐊᕆᐊᖏᑦ ᑖᒃᑯᐊ ᓂᕈᐊᖅᖅᑕᐅᓇᓱᐊᖅᑐᑦ 2013-ᒥᓂᑦ ᐅᔾᔨᕆᖓᐅᑎᒋᔪᔭᒃᑲ ᖃᓄᑎᒋ ᖁᕕᐊᓇᕐᓂᖓᓂᒃ ᑕᐃᓱᒪᓂ ᑏᕕᑦ ᔪᐊᓇᓯ ᐊᑭᓯᑎᓪᓗᒍ ᐅᔾᔨᕆᒐᒃᑯ ᐃᓅᓱᒃᑑᓚᐅᕋᒪ ᓱᓕ, ᐃᓱᒪᓕᐅᕈᑎᒋᓚᐅᖅᓯᒪᔭᕋ ᑕᐃᓱᒪᓂ 2017-ᒥ ᓂᕈᐊᓕᖅᐸᑕ ᐃᓪᓚᖃᑕᐅᔪᒪᓪᓗᖓ,” ᐅᖃᕆᓪᓗᓂ.

“ᐊᓱᐃᓛᒃ ᑖᓐᓇ ᐊᔪᖏᓐᓂᖅᐸᑦ, ᐃᓱᒪᓕᓚᐅᖅᓯᒪᒐᒪ ᐸᕐᓇᑦᑎᐊᖅᓯᒪᒍᒪ ᐱᔪᓐᓇᕋᓱᒋᒋᓪᓗᖓ ᐃᓯᖅᑎᑕᐅᔪᓐᓇᕐᒥᔪᖓ.”

ᐊᐱᕆᔭᐅᒐᒥᓕ ᓱᖕᒪᑦ ᐃᓅᓱᒃᑑᓪᓗᓂ ᒪᓕᒐᓕᐅᕐᕕᖕᒥ ᑲᑎᒪᔨᖑᕈᒪᓚᐅᕆᐊᖓᓂᒃ, ᓚᐃᑦᓯᑑᓐ ᑭᐅᓚᐅᖅᑐᖅ ᐱᕈᖅᓴᓯᒪᒐᒥᒎᖅ ᑕᐅᑐᒃᖢᓂ ᐊᒃᓱᕈᖅᑐᓂᒃ ᓇᓗᓪᓗᓂ ᐃᑲᔪᕈᒪᖃᖅᑕᖅᓯᒪᒐᒥ ᓯᕗᓪᓕᖅᐹᒥ.

“ᐊᒻᒪᓗ ᖃᐅᔨᒪᓕᖅᖢᖓ ᒪᓕᒐᓕᐅᕐᕕᖕᒥ ᐊᑐᕐᓂᑲᖅᑐᒥᒃ ᐋᕿᒃᓱᐃᓇᓱᐊᖃᑕᐅᔪᓐᓇᕋᒪ. ᐃᓅᓯᓕᒫᓐᓂᓗ ᖃᐅᔨᒪᐃᓐᓇᐅᔭᖅᖢᖓ ᓄᓇᕗᒥᐅᓄᑦ ᐃᑲᔪᖅᑎᐅᓗᖓ ᐊᑐᕐᓂᖃᖅᑐᒥᒃ ᐱᓇᓱᐊᒐᖃᕈᒪᓪᓗᖓ ᐃᓐᓇᕈᕈᒪ. ᓇᓗᓇᓚᐅᖏᒻᒪᑦ ᖃᖓᑐᐃᓐᓇᖅ ᒐᕙᒪᑎᒃᑯᓐᓂ ᑭᓯᐊᓂ ᐃᖅᑲᓇᐃᔮᖃᕈᒫᕐᓂᐊᕐᓂᕋ, ᐊᓱᐃᓚᒃ ᐱᐊᓂᒃᓯᒪᓕᖅᖢᒍ. ᐃᖅᑲᓇᐃᔭᖅᑎᑐᐃᓐᓇᐅᓪᓗᓂ ᑕᕝᕗᖓᑐᐊᖅ ᐱᓇᓱᐊᒐᒧᑦ ᑭᓯᐊᓂ ᐊᑐᕐᓂᖃᕐᓇᕐᒪᑦ ᑎᑎᕋᖅᑎᐅᓪᓗᓂ,” ᐅᓂᒃᑳᕆᓪᓗᓂ.

ᑭᓯᐊᓂᓕ ᐅᖓᑖᓄᑦ ᓱᓕᔪᒥᒃ ᐊᑐᕐᓂᖃᖅᑐᓂᒃ ᐋᕿᒃᓱᐃᓇᓱᐊᕈᒪᒐᒪ, ᓚᐃᑦᓯᑑᓐ ᐃᓱᒪᖃᓂᕐᒪᑦ ᓱᖕᒪᑦ ᓄᓇᕗᑦ ᐱᒋᐊᖓᖅᑎᑕᐅᓚᐅᕈᓯᐊᓂᒃ.

“ᖃᓄᖅ ᑕᐃᓱᒪᓂ ᐃᓅᓱᒃᑐᐃᑦᑕᐅᖅ ᐃᓄᐃᑦ ᑲᑎᖢᑎᒃ ᐊᔾᔨᒌᒃᑐᓂᒃ ᕿᓚᓈᕆᔭᖃᖅᑐᑦ ᐱᒋᐊᖓᖅᑎᑦᑎᓇᓱᐊᓚᐅᕆᐊᖏᓐᓂᒃ ᐱᒃᑯᒥᒋᔭᒥᓂᒃ ᑕᐅᑐᖑᐊᖅᑕᒥᓂᒃ ᓯᕗᓂᒃᓴᒥᓄᑦ ᑕᐃᒃᑯᐊ ᑕᕝᕙ ᐊᒃᓱᕉᑎᖃᓚᐅᖅᓯᒪᔪᑦ ᑲᔪᓯᑎᑦᑎᓇᓱᐊᖅᖢᑎᒃ ᓱᓕᔪᒥᒃ ᓴᖅᑭᑎᑕᐅᖁᓪᓗᒍ ᓄᓇᕗᑦ. ᑕᐃᒪᓐᓇ ᐱᓚᐅᖅᓯᒪᔪᑦ ᐃᒻᒥᓄᑑᖏᑦᑐᖅ ᑕᒪᐃᓐᓄᓕᒪᖅ ᐃᓄᖕᓄᑦ.”

ᔮᓐ ᐊᒪᕈᐊᓕᒃ ᐱᓗᐊᖑᐊᖅᑐᒥᒃ ᑕᐅᑦᑐᒐᕆᓪᓗᒍ ᓯᕗᓂᒃᓴᑦᑎᓐᓄᑦ ᐊᒃᓱᕉᑎᖃᓕᕈᒥᓇᕐᒪᑦ ᐃᖅᑲᐅᒪᓇᖅᖢᑎᒃᓗ ᐋᕿᒃᓱᓚᐅᖅᓯᒪᔭᖏᑦ, ᐃᓕᓴᕐᓇᕐᒪᑦ ᐊᐅᐸᖅᑐᒥᒃ ᔭᐃᑲᓯᒪᓪᓗᓂ.

ᑕᒪᐅᖓ ᕿᓚᓈᕆᔭᒥᓄᑦ ᓚᐃᑦᓯᑑᓐ ᑎᑭᓐᓇᓱᐊᖅᖢᓂ ᐊᓂᒍᐃᒋᐊᖃᖅᓯᒪᔪᖅ ᓯᕗᓪᓕᖅᐸᒥᒃ ᓄᓇᕗᑦ ᓯᕗᓂᒃᓴᕗᒃᑯᑎᒎᖅᖢᓂ ᐱᒋᐊᖓᕐᓂᕐᒪᑦ ᑐᖓᓕᖓᓂ ᐃᓕᓴᕐᕕᖕᒥ ᐱᐊᓂᒃᓯᒐᒥ ᐅᑭᐅᓂᒃ ᐱᖓᓱᓂᒃ ᓈᓴᐃᓯᕆᔨᐅᓂᕐᒥᒃ ᐃᓕᓴᖅᑐᕕᓂᖅ ᓯᓚᑦᑐᒃᓴᕐᕕᒃᔪᐊᒥ ᓇᓗᓇᐃᒃᑯᑕᖅᑖᕈᑎᒋᓪᓗᓂᐅᒃ, ᐊᒻᒪᓗ ᒪᕐᕉᖕᓂᒃ ᐅᑭᐅᓂᒃ ᐹᓯᓗᖃᓕᖅᑐᖅ ᓇᖕᒥᓂᖃᖅᑐᑦ ᑮᓇᐅᔭᓕᕆᔪᑎᖏᓐᓂᒃ ᐃᓕᓴᕐᓂᖅᖢᓂ.

“ᑖᒃᑯᓂᖓ ᓴᓇᖅᑯᑎᓂᒃ ᐃᓕᓴᖅᓯᒪᓪᓗᒋᑦ ᐊᔪᕈᓐᓃᖅᓯᒪᔪᖓ  ᐃᖅᑲᓇᐃᔮᓐᓂ ᒪᔪᕋᐅᑎᒋᓪᓗᒋᑦ, ᐅᖃᐅᓯᕆᔪᓐᓇᖅᑕᒃᑲ ᒐᕙᒪᑎᒃᑯᑦ ᖃᓄᖅ ᑮᓇᐅᔭᓕᕆᔪᑎᖏᑦ ᐃᓗᐊᓂ ᐋᕿᒃᓱᖅᓯᒪᓂᖏᓐᓂᒃ ᐃᓕᓴᓚᐅᖅᑐᖓ,” ᐅᖃᕆᓪᓗᓂ.

ᓚᐃᑦᓯᑑᓐ ᐱᒋᐊᖓᖅᑐᕕᓂᖅ ᒐᕙᒪᑎᒃᑯᓐᓂ ᐃᖅᑲᓇᐃᔭᑦᑎᐅᓪᓗᓂ ᐊᐅᔭᒃᑯᑦ ᑐᖓᓕᖓᓂ ᐃᓕᓴᕐᕕᖕᒥᓂ ᓄᖅᑲᖓᓕᕌᖓᒥ ᓯᓚᑦᑐᒃᓴᕐᕕᒃᔪᐊᒥᓗ. ᐊᓱᐃᓛᒃ ᐱᐊᓂᒃᑲᒃᑭᑦ, ᒐᕙᒪᑎᓕᕆᔨᒃᑯᓐᓂ ᓄᓇᕗᑦ ᒐᕙᒪᖓᓂ ᐃᖅᑲᓇᐃᔭᓯᒋᐊᔪᔪᖓ, ᑭᖑᓂᖓᒍᑦ ᒪᕐᕉᖕᓂᒃ ᐅᑭᐅᓂᒃ ᑮᓇᐅᔭᓕᕆᔪᑎᓂᒃ ᐅᓂᒃᑳᓕᐅᖅᐸᒃᖢᖓ ᐊᖓᔪᖅᑳᓄᑦ ᖃᐅᔨᒪᔨᒋᔭᐅᓪᓗᖓ ᒐᕙᒪᑎᒃᑯᑦ ᐊᑭᓕᕆᐊᓕᖏᑕ ᑮᓇᐅᔭᓕᕆᔪᑎᖏᓐᓂᒃ ᐊᐅᓚᑦᑎᔨᐅᓪᓗᖓ, ᑕᐃᑲᓂ ᐊᐅᓚᑦᑎᔩᑦ ᑲᑎᒪᔨᖏᓐᓄᑦ ᐅᓂᒃᑲᐅᓯᕆᕙᒃᖢᒋᑦ ᑮᓇᐅᔭᓕᕆᔪᑎᑎᒍᑦ ᖃᓄᐃᓕᖓᓕᕐᓂᖏᓐᓂᒃ ᐊᑐᓕᖅᑎᑕᐅᖁᔭᐅᔪᓂᒃ ᐊᒻᒪᓗ ᐃᑲᔪᖃᑦᑕᖅᖢᒋᑦ ᐊᕐᕌᒍᑕᒫᖅᓯᐅᑎᖏᓐᓂᒃ ᑮᓇᐅᔭᓕᕆᔪᑎᒃᓴᓂᒃ ᐋᕿᒃᓱᓕᕌᖓᑕ.

“ᐃᓱᒪᓇᖅᑐᖅ ᖃᐅᔨᒪᖅᑎᐊᕋᓱᒋᓕᖅᖢᖓ ᖃᓄᖅ ᒐᕙᒪᑎᒃᑯᑦ ᐊᐅᓚᑕᐅᔪᓯᖏᓐᓂᒃ ᐊᑐᓂ ᐱᓕᕆᕝᕕᖏᓐᓂ ᑮᓇᐅᔭᓕᕆᔪᑎᖏᓐᓂᒃ ᐋᕿᒃᓱᐃᖃᑦᑕᖅᖢᑕ ᒪᓕᒐᓕᐅᕐᕕᖕᒥ ᐊᑐᕐᓂᖃᓚᐅᖅᑐᖓ,” ᐅᓂᒃᑳᓚᐅᕐᒥᔪᖅ ᓂᕈᐊᖅᑕᐅᓇᓱᐊᓕᖅᖢᓂ.

ᓚᐃᑦᓯᑑᓐ ᓇᖕᒥᓂᖅᑕᐅᖅ ᐊᒃᓱᕉᑎᖃᕐᒥᔪᑦ ᓇᒡᓕᒋᔭᒥᓂᒃ ᓯᕗᓂᒃᓴᖓᒥᒃ ᐃᕐᓂᓛᒥ ᐊᐃᑕᓐ.

“ᐅᔾᔨᖅᓱᑦᑎᐊᕈᒪᒐᒪ ᓯᕗᓂᒃᓴᖓᓂᒃ ᐱᕈᖅᓴᔪᓐᓇᖁᓪᓗᒍ ᐃᓗᐊᕐᓂᖅᓴᒥ ᐋᕿᒃᓱᖅᓯᒪᔪᒥ, ᐊᔪᖅᓴᖏᑦᑎᐊᖅᑐᒥ ᓄᓇᕗᒥ ᐱᕈᖅᓴᔪᓐᓇᖁᒐᒃᑭᒃ ᕿᑐᖓᕗᑦ.

Leave a Comment:

Your email address will not be published. Required fields are marked *