ᐃᖃᓗᖕᒥᐅᖅ ᐃᓕᓴᖅᑎ ᑐᓂᐅᓯᐊᕈᓐᓇᖅᓯᔪᖅ $100,000-ᓂᒃ

by Michele LeTourneau- February 4, 2018

ᑭᖑᓪᓕᕐᒥ ᑕᐃᒪᖓᓂᓂᑦ ᐱᒋᐊᓚᐅᖅᑎᓪᓗᒍ 1980-ᓂᑦ, ᓄᓇᕗᒥ ᐃᓕᓴᖅᑎ ᐱᕝᕕᒃᓴᖃᓕᕐᒥᖕᒪᑕ ᓗᕇᓐᑯᓐᓂᑦ Loran Award ᑮᓇᐅᔭᓂᒃ ᑐᓂᐅᓯᐊᕈᓐᓇᕐᒪᑕ, ᑐᖓᓕᖓᓂ ᐃᓕᓵᓂᒃᑐᑦ ᐃᓕᓴᕆᐊᓪᓚᒃᑲᓐᓂᕈᑎᒃᓴᖏᓐᓄᑦ ᐃᑲᔪᕐᓗᑎᒃ $100,000-ᓂᒃ ᑐᓂᓯᔪᓐᓇᕐᓂᕋᓚᐅᕐᒪᑕ ᐅᑭᐅᓄᑦ ᓯᑕᒪᓄᑦ ᐊᒡᒍᖅᑕᐅᓗᓂ.

ᐋᓕᒃᔅ ᒪᒃᑑᒥᑦ, ᑕᓕᖅᐱᐊᓂ, ᐃᓄᒃᓱᒃ ᐃᓕᓴᕐᕕᒃᔪᐊᖓᓂ ᐃᖃᓗᖕᓂ, ᐅᕙᓂ ᑕᑯᒃᓴᐅᔪᖅ ᐱᖑᐊᖃᑕᐅᑎᓪᓗᒍ ᓄᓇᕐᔪᐊᒥ ᑕᐃᑯᐊᓐᑑᖅᑎᓂ ᐊᑭᒪᖃᖅᑕᐅᑎᑎᓪᓗᒋᑦ ᐋᑐᕚᒥ ᔫᓐ 2017-ᒥ, ᐃᓚᐅᖃᑕᐅᓚᐅᕐᒪᑦ 88-ᓂ ᐱᖑᐊᖅᑎᓂ ᑎᒍᓯᓇᓱᐊᖅᑐᓂ 34-ᓂᒃ ᓗᕇᓐᑯᓐᓂᑦ Loran Award ᐊᑭᐅᓯᐊᖅᑖᕆᔪᓐᓇᖅᑕᖏᓐᓂᒃ, ᑐᖓᓕᖓᓂ ᐃᓕᓵᓂᒃᑐᓄᑦ ᐃᓕᓴᕆᐊᓪᓚᒃᑲᓐᓂᕈᒪᔪᓄᑦ $100,000-ᓂᒃ ᑐᓂᓯᔪᓐᓇᕐᒪᑕ ᐅᑭᐅᓄᑦ ᓯᑕᒪᓄᑦ.

ᑐᑭᒧᐊᖅᑎᑦᑎᔨᖓᑦ ᐱᓕᕆᕝᕕᐊᓂ ᓗᕇᓐᑯᑦ ᐃᓕᓴᖅᑎᓄᑦ ᑮᓇᐅᔭᓂᒃ ᑐᓂᓯᕕᐊᓂ ᕼᐃᑐ ᓯᐳᕌᑦ ᐅᖃᓚᐅᖅᑐᖅ ᑖᒃᑯᐊ ᑮᓇᐅᔭᖃᖅᑎᑦᑎᔩᑦ ᐅᑭᐅᖅᑕᖅᑐᒥᐅᓂᒃ ᑐᒃᓯᕋᖅᑐᓂᒃ ᑕᑯᔪᒪᖃᑦᑕᕋᓗᐊᕐᒪᑕ.

ᐊᒥᓱᓂᒃ ᑲᑕᓚᒃᕕᐅᓯᒪᒐᓗᐊᖅᑐᒍᑦ ᑐᒃᓯᕋᐅᑎᓂᒃ ᑭᓯᐊᓂᓕ ᐅᓄᖏᓗᐊᖃᑦᑕᕐᒪᑕ ᐅᑭᐅᖅᑕᖅᑐᒥᐅᑦ. ᐊᒃᓱᕉᑎᒋᓕᖅᑕᕗᑦ ᐅᑭᐅᖅᑕᖅᑐᒥᐅᓄᑦ ᑐᓴᐅᒪᔭᐅᒐᓗᐊᕐᒪᖔᑕ ᐃᓕᓴᖅᑎᓄᑦ ᐅᑭᐅᖅᑕᖅᑐᒥ. ᑕᐃᒪᐃᓐᓂᖓᓄᑦ ᐊᒃᓱᕉᑎᒋᓇᓱᐊᓕᓚᐅᖅᐸᕗᑦ ᑲᑎᒪᔨᕋᓛᖃᓕᖅᖢᑕ ᑕᒫᓂᕐᒥᐅᓂᒃ ᑲᒪᔨᐅᓂᐊᖅᑐᒥᒃ ᑕᒪᑐᒪᓂ ᐅᑭᐅᑦᑎᓐᓂ,” ᓯᐳᕌᑦ ᐅᖃᕆᓪᓗᓂ.

ᐃᓄᒃᓱᒃᑯᑦ ᑐᖓᓕᖓᓂ ᐃᓕᓴᕐᕕᖕᒥ ᑕᐃᓯᓚᐅᕐᒥᔪᑦ ᐊᓕᒃᓵᓐᑐ ᒪᒃᑑᒥᑦᒥᒃ, ᐊᒻᒪᓗ ᒫᓐᓇᒧᑦ ᑎᑭᖢᒍ ᐱᖓᓱᐊᖅᑎᖅᖢᓂ ᐊᐱᖅᓱᖅᑕᐅᓯᒪᓕᖅᖢᓂ ᑲᑎᒪᔨᕋᓛᖓᓄᑦ, ᑲᑎᒪᔨᖏᑦ ᐊᐱᖅᓱᖅᑎᖃᕐᒪᑕ. ᐊᓱᐃᓛᒃ ᑕᐃᒪ ᖃᐃᖁᔭᐅᓯᒪᓕᖅᑐᖅ ᑐᕌᓐᑐᒧᑦ ᑲᓇᑕᒥ ᓂᕈᐊᖅᑕᐅᓯᒪᔪᒃ ᐊᐱᖅᓱᖅᑕᐅᒃᑲᓐᓂᕐᓂᐊᕐᒪᑕ, ᐱᒋᐊᓚᖓᔪᑦ ᕖᕗᐊᕆ 2-ᒥᑦ 3-ᒧᑦ.

ᒪᒃᑑᒥᑦ ᐃᓚᐅᖕᒪᑦ ᑖᒃᑯᓇᓂ 88-ᓂ ᑐᒃᓯᕋᖅᓯᒪᔪᓂ ᓯᕗᓂᖓᓂ 5,000-ᓄᑦ ᑎᑎᕋᕐᕕᐅᓯᒪᔪᑦ ᑭᓯᐊᓂᓕ ᓂᕈᐊᖅᓯᓯᒪᖕᒪᑕ 34-ᓂᒃ 2018-ᒥ ᓗᕇᓐᑯᓐᓂᑦ ᐊᑭᐅᓯᐊᕈᓐᓇᖅᑎᑕᐅᓪᓗᑎᒃ.

ᐊᒃᓱᐊᓗᒃ ᖁᕕᐊᓱᒃᖢᖓ ᓯᕘᕋᔪᖓ. ᑕᒪᑐᒪᓂ ᐊᑭᓯᔪᓐᓇᕋᒪ ᐊᑐᕐᓂᖃᖅᑐᒥᒃ ᐅᕙᓐᓄᑦ ᒫᓐᓇᒧᑦ ᑎᑭᖢᒍ ᑕᒻᒪᓚᐅᖏᓐᓇᒪ ᓱᓕ,” ᐅᖃᕆᓪᓗᓂ ᒪᒃᑑᒪᑦ, ᐃᓚᓪᓗᓂᐅᒃ ᐊᖓᔪᖅᑳᖏᒎᖅ, ᑕᒪᐃᑕ ᐃᓕᓴᐃᔩᒃ, ᐊᔪᐃᓐᓇᐅᑎᖃᕐᒪᑕ ᐊᒃᓱᕈᑦᑎᐊᖁᓪᓗᓂᐅᒃ ᑖᓐᓇ ᕿᑐᖓᖓᑦ ᐊᑭᓯᔪᓐᓇᕐᓂᐊᕐᒪᑦ.

ᐊᖓᔪᖅᑳᒃᑲ ᑐᓐᖓᕕᒋᒐᒃᑭᑦ ᓴᐅᓂᕆᓪᓗᒋᒃ ᐃᓅᓯᓕᒫᓐᓂ,” ᐅᖃᕆᓪᓗᓂ.

ᐅᓂᒃᑳᕆᓪᓗᓂ ᓇᖕᒥᓂᕐᓗᒎᖅ ᐃᓅᓯᕐᒥᓂᒃ ᐋᕿᒃᓱᐃᑦᑎᐊᖅᓯᒪᓇᓱᐊᖅᖢᓂ ᑐᕌᖅᑕᒥᓂᒃ ᖃᐅᔨᒪᑦᑎᐊᕋᒥ ᐊᒃᓱᕉᑎᖃᐃᓐᓇᖅᑐᖅ, ᐊᒻᒪᓗ ᓂᑭᑦᑖᖅᖢᓂᒋᑦ ᑲᒪᒋᖃᑦᑕᖅᖢᓂᒋᑦ ᐊᑭᓯᔪᓐᓇᕐᓂᐊᕋᒥ.

ᓗᕇᓐᑯᓐᓂᑦ ᐃᓕᓴᖅᑎᓄᑦ ᐱᔭᐅᔪᓐᓇᖅᑐᖅ ᐊᑯᓂ ᐊᑐᕐᓂᖃᕐᓂᐊᕐᒪᑦ ᐅᑭᐅᓄᑦ ᐊᒥᓱᓄᑦ ᐃᑲᔪᕈᑕᐅᓗᓂ.

ᑕᐃᓐᓇ ᐊᒃᖢᐃᑦᑐᐊᓗᒃ ᐃᑲᔪᕈᒪᑐᐃᓐᓇᖏᒻᒪᑦ ᓗᕇᓐᒥᒃ ᐊᑎᖃᖅᑐᖅ ᑐᖁᓚᐅᕐᒪᑦ ᐅᓂᒃᑳᖅᓯᒪᓪᓗᓂ ᖃᓄᖅ ᑮᓇᐅᔭᖏᑦ ᐊᑐᖅᑕᐅᓂᐊᕐᒪᖔᑕ ᓇᓗᓇᐃᔭᐃᓪᓗᓂ ᐃᓕᓴᐃᔪᑎᓄᑦ ᐱᖓᓱᐃᓕᖓᓪᓗᓂᒋ ᐋᕿᒃᓱᑦᓯᒪᔭᖏᑦ ᐃᓕᓴᖅᑏᑦ ᓯᕗᓂᒃᓴᖏᓐᓄᑦ ᐊᑐᕐᓂᖃᕐᓂᐊᖅᑐᓂᒃ. ᓂᕈᐊᖅᓯᓇᓱᐊᓕᕌᖓᑦᑕ ᐃᓕᓴᖅᑎᓂᒃ ᐊᑐᐊᒐᖏᑦ ᒪᓕᒃᖢᒋᑦ ᑲᔪᓯᑦᑎᐊᖃᑦᑕᖅᑐᑦ, ᐃᓅᓯᖓ, ᐱᖅᑯᓯᖓ ᐊᒻᒪᓗ ᐱᔨᑦᓯᕋᖅᑎᐅᕕᒋᔭᖓ ᓯᕗᓕᖅᑎᐅᕕᒋᔪᓐᓇᖅᖢᓂᐅᒃ ᐱᓕᕆᐊᖅ ᐱᒃᑯᒥᒋᔭᖓ ᑕᒪᒃᑯᐊ ᑕᕝᕙ ᐊᑐᐊᒐᕆᖃᑦᑕᖅᑕᕗᑦ ᐋᕿᒃᓱᐃᓇᓱᐊᖅᖢᑕ ᐃᓕᓴᖅᑕᐅᓂᐊᖅᑐᓂᒃ ᓯᕗᓂᖓᓂ,” ᐅᓂᒃᑳᓚᐅᖅᑐᖅ ᓯᐳᕌᑦ.

ᐃᖅᑲᓇᐃᔭᖅᑎᒋᔭᐅᔪᖅ ᓗᕇᓐᑯᓐᓂ “ᓯᕗᓕᖅᑎᒃᓴᓂᒃ ᐱᕙᓪᓕᐊᑎᑦᑎᔨᖏᓐᓂ ᐊᔪᐃᓐᓇᖅᑎᐅᔪᖅ ᐊᖅᑯᑎᒃᓴᖏᓐᓂᒃ ᐸᕐᓇᐃᔨᐅᓪᓗᓂ.”

ᑐᓂᐅᓯᐊᑐᐃᓐᓇᐅᖏᒻᒪᑦ ᐊᔪᖏᓐᓂᖏᓐᓄᑦ, ᑮᓇᐅᔭᑦ ᑖᒃᑯᐊ ᐱᕙᓪᓕᐊᑎᑦᑎᔪᑎᒃᓴᓄᑦ ᐃᓅᓯᖓᓄᑦ ᐊᑐᖅᑕᐅᓂᐊᕐᒪᑕ ᖃᖓᑐᐃᓐᓇᖅ ᐃᓐᓇᕈᕈᓂ ᐃᓕᓴᖅᑎᐅᑉ ᐃᓂᒋᓂᐊᖅᑕᖓᓄᑦ ᑎᑭᓪᓗᒍ,” ᓯᐳᕌᑦ ᐅᖃᕆᓪᓗᓂ.

ᑕᒪᑐᒪᓂ ᓯᑕᒪᓂ ᐅᑭᐅᖑᓂᐊᖅᑐᓂ ᐊᑭᓖᔪᔭᐅᓂᐊᕐᒪᑦ ᓯᓚᑦᑐᒃᓴᕐᕕᒃᔪᐊᒥ ᐃᓕᓴᕈᑎᖏᓐᓂᒃ ᖁᔭᓐᓇᒦᒃ ᑕᑎᒌᒃᑐᓄᑦ ᑎᒥᖁᑎᒋᔭᐅᔪᓄᑦ, ᑐᓂᐅᓯᐊᕈᓐᓇᕆᓪᓗᓂ $10,000-ᓂᒃ ᐊᑐᓂ ᐊᕐᕌᒍᑕᒫᑦ ᐃᓅᔪᑎᒃᓴᖏᓐᓂᒃ ᐃᓕᓯᓂᐊᓂᕋᕐᒥᔪᑦ, ᑖᒃᑯᓇᖓᑦ ᐃᓕᓴᖅᑏᑦ ᑕᓯᐅᖅᑎᖃᕈᓐᓇᕐᓂᐊᕐᒪᑕ ᑕᒪᑐᒪᓂ ᐅᑭᐅᓂ ᓯᑕᒪᓂ ᐃᓕᓴᕐᕕᖕᒦᓐᓂᕐᒥᓂ, ᐊᒻᒪᓗ ᐱᖓᓱᓂ ᐊᐅᔭᓂᒃ ᐃᖅᑲᓇᐃᔭᖅᑎᑕᐅᓗᑎᒃ – ᒪᕐᕉᒃ ᑲᓇᑕᒥ ᐊᒻᒪᓗ ᐊᑕᐅᓯᖅ ᑲᓇᑕᐅᑉ ᓯᓚᑖᓂ ᓄᓇᕐᔪᐊᒥ ᓇᒥᑐᐃᓐᓇᖅ – ᐊᑐᓂ ᐃᓂᒃᓴᖃᖅᑐᑦ ᐃᓕᓴᕈᑎᓂ ᒐᕙᒪᑎᓕᕆᔪᑎᓂ, ᓇᖕᒥᓂᖃᖅᑐᓕᕆᔪᑎᓂ, ᐊᒻᒪᓗ ᓄᓇᓕᖕᒥᐅᓕᕆᔪᑎᓂ.

ᐃᓯᕋᓱᐊᖅᖢᓂ ᑕᐃᒪᖓᓂᒃ ᐃᓕᓴᕈᑎᕕᑦ ᓇᓗᓇᐃᒃᑯᑕᖏᑦ 85-ᐳᓴᓃᓐᓂᒋᐊᓖᑦ ᒥᑭᓐᓂᖅᐹᒥᒃ,” ᐅᓂᒃᑳᓚᐅᖅᑐᖅ ᒪᒃᑑᒪᑦ. “ᑭᖑᓂᖓᒍᑦ ᖃᓄᐃᖏᑦᑐᖅ 85-ᐳᓴᐅᒃᐸᑦ 90-ᐳᓴᐅᒃᐸᓪᓘᓐᓃᑦ.”

ᑖᓐᓇ ᒪᒃᑑᒪᑦ ᐱᖑᐊᖅᑎᐅᓪᓗᓂ ᑕᐃᑯᐊᓐᑑᒥ ᑐᖓᓕᖓᓂ ᕿᕐᓂᖅᑕᒥᒃ ᕿᑎᒃᓯᐅᑎᑖᖅᓯᒪᓕᖅᑐᖅ ᑕᐃᑯᐊᓐᑑᒥ ᐊᒻᒪᓗ ᐊᔪᖏᓐᓂᖅᐹᖑᖃᑕᐅᓪᓗᓂ ᕼᐊᑭᖅᑎᓂ ᒎᓕᒋᔭᐅᖕᒪᑦ, ᐊᒻᒪᓗ ᐊᖅᓴᖅᑎᓂ ᓵᑯᒥᒃ ᐹᓯᑭᑦᐹᓪᒥᓗ. ᓄᑲᖅᖠᓂᒃ ᐃᓕᓴᐃᖃᑦᑕᖅᑐᖅ ᑕᐃᑯᐊᓐᑑᒥ ᐱᖑᐊᖅᑎᓂᒃ ᐊᒻᒪᓗ ᕼᐊᑭᖅᑎᓂᒃ ᒎᓕᐅᓂᕐᒥᒃ.

ᐃᓕᓴᐃᒋᐊᒃᓴᖅ ᓄᑲᖅᖠᕐᓂᒃ ᖁᕕᐊᒋᒐᒃᑯ,” ᐅᖃᕆᓪᓗᓂ. “ᖃᐅᔨᒪᓕᖅᑕᓐᓂᒃ ᐃᓕᓴᕈᓐᓇᕋᒃᑭᑦ ᓄᑲᖅᖡᑦ ᓇᓗᔪᑦ ᓱᓕ ᐊᔪᖏᑕᓐᓂᒃ.”

ᐃᓕᓴᕆᐊᕈᒪᔪᖅ ᐃᓗᐊᖅᓴᐃᔨᐅᓂᕐᒥᒃ ᓄᑭᓕᕆᔨᐅᓗᓂ, ᐊᒻᒪᓗ ᑲᔪᓯᓚᖓᓪᓗᓂ ᐃᓗᐊᖅᓴᐃᔨᐅᓂᕐᒥᒃ ᐃᓕᓴᖅᑕᓂ ᐱᖑᐊᖅᑎᓄᑦ ᐃᓗᐊᖅᓴᐅᔨᐅᓂᕐᒥᒃ ᓄᑕᕋᓛᓂᒃᓗ.

ᓯᐳᕌᑦ ᐅᖃᕆᓪᓗᓂ ᑕᐃᒪᐃᑦᑐᓂᒃ ᐃᓕᓴᕈᒪᔪᓂᒃ ᑖᒃᑯᐊ ᓗᕇᓐᑯᓐᓂ ᑮᓇᐅᔭᖅᑖᖅᑎᑦᑎᔩᑦ ᕿᓂᕐᒪᑕ – ᑭᒃᑯᑐᐃᓐᓇᓂᒃ ᐊᔪᖏᑦᑐᓂᒃ ᓄᓇᓕᖕᒥᐅᓄᑦ ᐊᑐᕐᓂᖃᕈᒫᖅᑐᓂᒃ ᑲᓇᑕᒥᐅᓄᑦ ᐃᓕᓴᕈᒪᔪᓂᒃ ᑭᖑᕚᕆᓂᐊᖅᑕᑦᑎᓐᓂ ᓯᕗᓕᖅᑎᐅᔪᒫᖅᑐᑦ ᓄᓇᓕᖕᒥᐅᓄᑦ. ᐃᓱᒫᓗᒋᖏᓪᓗᒋᑦ ᖃᓄᖅᒋ ᐃᓕᓴᕈᑎᖏᑕ ᓈᓴᐅᑎᖏᑦ ᖁᑦᑎᖕᓂᖃᕋᓗᐊᕐᒪᖔᑕ, ᐃᓅᓯᖏᓐᓂᒃ ᐱᖅᑯᓯᖏᓐᓂᒃᓗ ᐃᓱᒪᖔᖃᑦᑕᕐᒪᑕ ᐊᒃᓱᕉᑎᒋᔭᖏᓐᓂᒃᓗ ᓄᓇᓕᖕᒥᐅᓄᑦ ᐊᑐᕐᓂᖃᖅᑐᓂᒃ.

ᕿᓚᓈᖅᑐᒍᑦ ᑕᕝᕙ ᐅᓄᕐᓂᖅᓴᐃᑦ ᐃᓕᓴᖅᑏᑦ ᑐᒃᓯᕋᖁᓪᓗᒋᑦ ᐅᑭᐅᖅᑕᖅᑐᒥᐅᓂᑦ,” ᐅᖃᕆᓪᓗᓂ ᓯᐳᕌᑦ, ᑕᐃᒪᒎᖅ ᑐᓴᖅᑎᑕᐅᓇᓱᐊᖅᖢᑎᒃ ᑕᒪᐃᑕᓕᒫᖅ ᐅᑭᐅᖅᑕᖅᑐᒥ ᑐᖓᓕᖓᓂ ᐃᓕᓴᕐᕕᖃᖅᑐᑦ ᐅᖃᓗᒃᕕᐅᓚᐅᖅᑐᑦ ᑖᒃᑯᓇᓂ ᐱᖓᓱᓂ ᐅᑭᐅᖅᑕᖅᑐᒥ ᒐᕙᒪᑎᖃᖅᑐᓂ ᑲᓇᑕᐅᑉ ᓄᓇᖁᑎᖏᓐᓂ.

ᐊᒥᓱᓂᒃ ᐱᔭᕆᑐᓈᖅᓯᔪᑎᖃᓱᖑᖕᒪᑕ ᐃᓕᓴᖅᑏᑦ ᑮᓇᐅᔭᓂᒃ ᐊᔪᖅᓴᖅᖢᑎᒃ ᑐᒃᓯᕋᖅᑕᐅᔪᓐᓇᖅᑐᓂᒃ (ᑐᓂᔭᐅᔪᓐᓇᖅᑐᓂᒃᓗ), ᑭᓯᐊᓂᓕ ᓇᓗᓇᖃᑦᑕᖏᒻᒪᑦ ᐊᒥᓱᓂᒃ ᐊᔪᖏᑦᑐᓂᒃ ᓂᑭᑦᑎᖃᑦᑕᕋᑦᑕ. ᑕᐃᒪᖓᓂᑦ ᐊᒃᓱᕉᑎᒌᓐᓇᕐᓂᖅᓴᐅᓂᐊᓕᖅᐸᕗᑦ ᐅᑭᐅᖅᑕᖅᑐᒥᐅᑦ ᐃᓚᐅᖁᓪᓗᒋᑦ.”

ᑕᐃᒪᖓᓂᑦ 2001-ᒥᑦ, ᐋᓯᓕ ᑏᓕ, ᐃᓄᒃᓱᒃᒥᑦ ᐃᓕᓵᓂᖕᓂᑯᑦᑕᐅᖅ, ᓗᕇᓐᑯᓐᓂᑦ ᑐᓂᐅᓯᐊᓚᐅᖅᓯᒪᖕᒥᖕᒪᑦ. ᒫᓐᓇᓕ ᐳᑭᖅᑕᓕᒃᑯᓐᓂ ᐃᓚᐅᓕᖅᑐᖅ ᓅᕙᓯᑰᓴᒥ.

Leave a Comment:

Your email address will not be published. Required fields are marked *