Skip to content

ᐃᓚᓕᐅᑎᔭᐅᓚᐅᕐᓕ ᑖᓐᓇ ᐊᐅᓪᓚᖅᑎᑕᐅᔪᕕᓃᑦ ᓄᓇᓕᕕᓂᐊ ᐊᒃᑕᕐᕕᐅᓕᖅᑐᖅ ᑲᓇᑕᒥ ᑲᖑᓇᖅᑐᓂ

ᑕᒪᐃᓐᓄᓕᒫᑲᓴᒃ ᑖᓐᓇ ᐅᓂᒃᑳᖅ ᖃᐅᔨᒪᔭᐅᓕᖅᑐᖅ ᓄᓇᕗᒥᐅᓄᑦ ᖃᐅᓱᐃᑦᑐᒥᐅᓄᑦ ᐊᑐᖅᑕᐅᓂᑯ ᖁᑦᑎᒃᑐᒧᑦ ᓄᒃᑎᖅᑕᐅᓚᐅᖅᓯᒪᖕᒪᑕ, ᐃᓄᖕᓂᒃ ᒐᕙᒪᑎᑐᖃᒃᑯᑦ ᐊᖏᕐᕋᒥᓂᑦ ᓄᓇᕕᒃᒥᑦ ᑎᒍᓯᓪᓗᑎᒃ ᓄᒃᑎᖅᓯᓚᐅᕐᒪᑕ ᖃᐅᓱᐃᑦᑐᒧᑦ ᐊᐅᔪᐃᑦᑐᒧᓪᓗ 1950-ᓂ.

ᑕᒪᐃᓐᓄᓕᒫᑲᓴᒃ ᑖᓐᓇ ᐅᓂᒃᑳᖅ ᖃᐅᔨᒪᔭᐅᓕᖅᑐᖅ ᓄᓇᕗᒥᐅᓄᑦ ᖃᐅᓱᐃᑦᑐᒥᐅᓄᑦ ᐊᑐᖅᑕᐅᓂᑯ ᖁᑦᑎᒃᑐᒧᑦ ᓄᒃᑎᖅᑕᐅᓚᐅᖅᓯᒪᖕᒪᑕ, ᐃᓄᖕᓂᒃ ᒐᕙᒪᑎᑐᖃᒃᑯᑦ ᐊᖏᕐᕋᒥᓂᑦ ᓄᓇᕕᒃᒥᑦ ᑎᒍᓯᓪᓗᑎᒃ ᓄᒃᑎᖅᓯᓚᐅᕐᒪᑕ ᖃᐅᓱᐃᑦᑐᒧᑦ ᐊᐅᔪᐃᑦᑐᒧᓪᓗ 1950-ᓂ.

ᐊᐅᓪᓚᖅᑎᑕᐅᔪᕕᓃᑦ ᓄᓇᓕᖕᒥᓂᑦ ᑕᒫᓂ ᐃᓄᖃᖏᑦᑐᒥ ᓄᓇᓕᓕᐅᓚᐅᕐᓂᕐᒪᑕ ᑕᐃᓱᒪᓂ ᑕᑯᒃᓴᐅᔪᑦ ᓱᓕ ᐊᖏᕐᕋᕕᓂᖏᑦ ᑕᒪᐅᖓ ᕿᒪᒃᑕᐅᑎᓪᓗᒋᑦ 87 ᐃᓄᐃᑦ ᖃᐅᔨᒪᖏᑕᒥᓄᑦ ᓄᓇᒧᑦ ᖃᐅᓱᐃᑦᑐᒥ, ᐅᒥᐊᕐᔪᐊᓂᑦ ᕿᒪᒃᑕᐅᓐᓂᕐᒪᑕ ᐸᕐᓇᒃᓯᒪᖏᑦᑎᐊᖅᑎᓪᓗᒋᑦ ᑕᒪᐅᖓᑐᐃᓐᓇᖅ ᓄᓇᒧᑦ ᐃᓕᔭᐅᓪᓗᑎᒃ ᑲᓇᑕᒥᐅᓄᑦ ᓄᓇᖁᑎᖃᕐᓂᕐᒥᓂᒃ ᑕᑯᒃᓴᐅᑎᑦᑎᓇᓱᐊᖅᖢᑎᒃ ᕿᒪᒃᑕᐅᒐᒥᒃ ᐅᑭᐅᕌᓗᒃᑯᑦ ᑐᐱᖅᓯᒪᔪᕕᓃᑦ, ᐊᒻᒪᓗ ᓄᓇᖓᓂᒃ ᐆᒪᔪᖏᓐᓂᒃᓗ ᖃᐅᔨᒪᖏᓱᑎᒃ ᐊᖑᓇᓱᒋᐊᒃᓴᖅ ᓇᒦᒋᐊᖏᓐᓂᒃ.

ᓂᐅᔅᓄᐊᒃᑯᓐᓂ ᐅᓂᒃᑳᓕᐅᖅᑎᕗᑦ ᓂᐅᕈᓯᒪᓚᐅᕐᒪᑦ ᐊᐅᓱᐃᑦᑐᒥᐅᓄᑦ 2014-ᒥ ᓄᑖᖅ ᕼᐊᒪᓚᖓᑕ ᐊᒡᓚᒡᕕᖓ ᐱᖑᐊᕐᕕᒃᓗ ᒪᑐᐃᖅᑕᐅᑎᓪᓗᒋᑦ., ᓚᐃᓴ ᐊᐅᓪᓚᓗᒃ-ᕗᐊᔅᑯ, ᑕᐃᓱᒪᓂ ᕿᒪᒃᑕᐅᓂᑰᑉ ᓕᐅᕆ ᐊᐅᓪᓚᓘᑉ ᐸᓂᖓ, ᑕᑯᔭᖅᑐᖅᑎᓚᐅᕐᒫᖓ ᓇᓗᓇᐃᒃᑯᑕᕐᒥᒃ ᐃᓕᔭᐅᔪᕕᓂᕐᒥᒃ ᐃᖅᑲᐅᒪᓪᓗᑎᒃ ᑕᐃᓱᒪᓂ ᑕᒪᐅᖓᑐᐃᓐᓇᖅ ᕿᒪᒃᑕᐅᓂᑯᓂᒃ, ᓴᓇᔭᐅᑎᑕᐅᔪᔪᒥᒃ ᓄᓇᕗᑦ ᑐᓐᖓᕕᒃᑯᓐᓄᑦ 2010-ᒥ. ᑕᐃᒪᐃᑦᑐᓴᐃᓐᓇᒥᒃ ᐃᓕᓯᓚᐅᕐᒥᔪᑦ ᖃᐅᓱᐃᑦᑐᒥᐅᓂ. ᑭᖑᓂᖓᒍᑦ ᑖᒃᑯᐊ ᓇᓗᓇᐃᒃᑯᑕᐃᑦ ᐃᓕᔭᐅᓯᒪᓕᖅᑎᓪᓗᒋᑦ, ᑕᐃᓱᒪᓂ ᒐᕙᒪᑎᑐᖃᒃᑯᑦ ᑖᒃᑯᐊ ᑭᖑᕚᖏᓐᓄᑦ ᒪᒥᐊᓐᓂᕋᖅᖢᑎᒃ ᑐᓴᕐᓇᖅᑐᑎᒍᑦ ᐅᓂᒃᑳᓚᐅᖅᓯᒪᔪᑦ. ᑕᐃᒪᐃᑦᑐᓴᐃᓐᓇᒥᒃ ᓇᓗᓇᐃᒃᑯᑕᒥᒃ ᑕᑯᔪᒪᔪᒍᑦ ᐋᑐᕚᒥ ᐳᐃᒍᖅᑕᐅᔮᖏᒻᒪᑕ ᑕᐃᒃᑯᐊ ᐊᒃᓱᕈᖅᑎᑕᐅᔪᕕᓃᑦ ᑲᓇᑕᒥᐅᓄᑦ ᖃᐅᔨᒪᔭᐅᖁᒐᑦᑎᒍ ᐃᓄᖁᑎᕗᑦ ᑲᖑᓇᖅᑐᒥᒃ ᐊᑐᓚᐅᖅᓯᒪᓂᖏᓐᓂᒃ ᒐᕙᒪᑎᑐᖃᕐᒃᑯᓐᓄᑦ ᑎᓕᐅᖅᑕᐅᓪᓗᑎᒃ.

ᑕᑯᓪᓗᒋᑦ ᑖᒃᑯᐊ ᓇᓗᓇᐃᒃᑯᑕᐃᑦ ᐅᕙᓐᓄᑦ ᐊᒃᓱᐊᓗᒃ ᐃᒃᐱᖕᓇᓚᐅᖅᑐᖅ ᐃᓱᒪᓇᕐᒪᑦ ᖃᓄᑎᒋ ᐃᓄᑑᓇᕐᓂᖓ ᑕᒫᓂ ᐊᖏᔪᐊᓗᖕᒥ ᓄᓇᒥ ᕿᒪᒃᑕᐅᒋᐊᒃᓴᖅ. ᑖᒃᑯᐊ ᖃᑕᖑᑎᒌᑦ ᐊᕕᒃᑕᐅᓐᓂᕐᒪᑕ ᐱᖓᓱᓄᑦ ᓄᓇᓕᖕᓄᑦ, ᖃᐅᓱᐃᑦᑐᒥ ᓇᓗᓇᐃᒃᑯᑕᖅ ᑕᑯᒃᓴᐅᑎᑦᑎᔪᖅ ᐃᓄᖑᐊᒥᒃ ᐊᑕᐅᓯᕐᒥᒃ ᑕᐅᑐᒃᑐᖅ ᑕᕐᕋᒧᑦ ᐊᐅᓱᐃᑦᑐᒥᐅᓄᑦ ᓵᖓᓪᓗᓂ, ᖃᑕᖑᑎᖏᑦ ᑖᕗᖓ ᐊᐅᓪᓚᖅᑎᑕᐅᓚᐅᕐᒥᖕᒪᑕ ᐊᕕᒃᑕᐅᓪᓗᑎᒃ.

ᐃᖅᑲᐅᒪᓪᓗᒍ ᖃᐅᔨᒪᓕᖅᖢᒍᓗ ᑕᒪᓐᓇ ᑕᒫᓂᕐᒥᐅᑦ ᓯᕗᕚᖏᓐᓄᑦ ᐊᒃᓱᕉᑕᐅᔪᕕᓂᖅ, ᐃᓱᒪᓇᕐᒪᑦ ᖃᖓᐅᑎᓪᓗᒍᑭᐊ ᑐᑭᑖᕈᑕᐅᓕᕐᓂᕐᒥᖕᒪᑕ ᑐᐱᕐᕕᕕᓂᖏᑦ ᓴᐅᔭᐅᖁᔭᐅᓪᓗᑎᒃ ᖃᐅᓱᐃᑦᑐᒥᐅᓂ. ᑕᐃᑲ ᓄᓇᓕᕕᓂᖓ ᐊᒃᑕᕐᕕᐅᓕᖅᑐᕕᓂᖅ ᐃᖅᑲᒋᔭᐅᖏᒻᒪᕆᖕᓂᕐᒪᑕ ᐃᒃᐱᒋᔭᖏᑦ ᑖᒃᑯᐊ ᐃᓄᐃᑦ ᐊᓴᔭᐅᓪᓗᑎᒃ ᑕᒪᐃᖓᖅᑎᑕᐅᓐᓂᕐᒪᑕ ᑕᐃᓱᒪᓂᐅᓚᐅᖅᑐᖅ, ᕿᒪᒃᑕᐅᓪᓗᑎᒃ ᑭᓱᑐᐃᓐᓇᓂᒃ ᐃᒡᓗᓕᐅᖃᖅᑕᓕᖅᑐᕕᓃᑦ ᐅᓯᑲᖅᑕᖅᑎᓄᑦ ᐃᖅᓯᕕᕕᓂᕐᓂᒃ ᐃᒡᓗᕈᓗᓕᐅᖅᖢᑎᒃ ᑕᒫᓂ ᓄᓇᓕᖃᓕᖅᑐᕕᓃᑦ ᑲᓇᑕᒥ ᐅᑭᐅᖅᑕᖅᑐᒥᐅᓂᒃ ᓴᐳᔾᔨᔨᐅᓪᓗᑎᒎᖅ.

ᓄᑖᒥᒃ ᑕᐃᒪ ᐊᒃᑕᕐᕕᓕᐅᕐᓂᐊᓕᖅᑐᑦ ᑭᓯᐊᓂᓕ ᑕᐃᒃᑯᐊ ᑕᒪᐅᖓ ᕿᒪᒃᑕᐅᓂᑯᐃᑦ ᓄᓇᓕᕕᓂᖓ ᓴᓗᒻᒪᖅᓴᖅᑕᐅᓂᐊᖅᐹ?

ᑕᒪᑐᒪᓂ ᑲᒪᒋᔭᐅᕙᓪᓕᐊᓕᕐᒪᑕ ᓄᓇᓕᕕᓂᖏᑦ  ᐊᒃᑕᕐᓗᑯᓄᑦ ᓴᐅᔭᐅᓯᒪᔪᑦ. ᐊᒃᑕᕐᕕᑐᖃᐃᑦ ᓄᓇᒥ ᕿᒪᒃᑕᐅᔪᕕᓃᓪᓗ ᑕᐃᓱᒪᓂ ᐅᔾᔨᖅᓱᖏᑎᓪᓗᒋᑦ ᓱᓕ ᐃᓚᖏᑦ ᑐᖁᓐᓇᖅᑐᖃᐅᖃᑦᑕᕐᒪᑕ ᑕᒪᐅᖓᑐᐃᓐᓇᖅ ᑯᑐᒃᑐᓂᒃ ᒪᓂᕋᒧᑦ ᐃᑦᑕᐅᑎᓯᒪᔪᓂᒃᓗ ᐃᒪᕐᒧᓪᓗ ᑯᕕᔪᓂᒃ ᓄᓇᓕᖕᓂ. ᐊᒻᒪᓗᑦᑕᐅᖅ ᐊᒃᑕᕐᕖᑦ ᐃᓛᓐᓂᓚᐅᓱᖓᒃᑯᑦ ᐃᑭᑕᐅᖃᑦᑕᖅᖢᑎᒃ ᐊᖏᒡᓕᓗᐊᓕᕌᖓᑕ, ᑕᐃᒪᓐᓇᑦᑕᐅᖅ ᐊᒃᑕᕐᓗᑯᓂᒃ ᑐᖁᓐᓇᖅᑐᓂᒃ ᐊᑦᑕᕐᓇᖅᑐᓂᒃᓗ ᓯᓚᒧᑦ ᐳᔪᐊᕿᑎᑦᑎᖃᑦᑕᕐᒪᑕ ᓄᓇᕗᒥᐅᑦ ᓄᓇᓕᖏᓐᓂ ᐊᓂᖅᑎᕆᑦᑎᐊᕐᓇᕈᓐᓃᖃᑦᑕᕐᒪᑕ. ᑕᒪᐃᑕ ᑮᓇᐅᔭᑭᒃᓴᒧᑦ ᐋᕿᐅᒪᑎᑦᑎᔪᑎᒃᓴᓂᒃ ᑕᐃᒪᓐᓇ ᑲᒪᑲᒻᒪᒃᑕᐅᖃᑦᑕᕐᒪᑕ.

ᐃᓛᒃ ᐃᓚᖏᑦ ᐱᑦᑎᐊᕋᓱᐊᖅᑑᒐᓗᐊᑦ ᐱᑲᒻᒪᓕᖃᑦᑕᕐᒪᑕ ᓄᓇᓕᖕᒥᐅᓄᑦ ᐊᑯᓂ ᓴᓗᒻᒪᖅᓴᐃᔪᑎᒃᓴᓂᒃ ᑮᓇᐅᔭᖃᖅᑎᑕᐅᖃᑦᑕᖏᓐᓂᖏᓐᓄᑦ. ᐊᕐᕋᓂ ᐋᕿᒃᑕᐅᓚᐅᖅᑐᖅ Witness Tundra Take-back-ᒥᒃ ᑕᐃᔭᐅᔪᖅ ᐱᓕᕆᐊᕆᔭᐅᔪᖅ ᐊᑲᐅᔫᒐᓗᐊᖅ ᓴᕕᕋᔭᕕᓂᕐᓂᒃ ᓄᓇᒃᑰᔫᕕᓂᕐᓂᒃ ᐊᒃᑕᕐᓗᑯᓃᑦᑐᓂᒃ ᓄᓇᓕᖕᓂ ᓄᓇᕗᒥ ᑲᑎᖅᓱᐃᔪᑦ. ᑖᒃᑯᐊ Witness-ᑯᑦ ᐃᑭᑦᑎᓚᐅᕐᒪᑕ ᐃᖃᓗᖕᓂ ᐊᒃᑕᕐᕕᖕᒥᒃ ᐊᑲᐅᒋᔭᐅᔪᖏᑦᑐᖅ ᐳᔪᐊᕿᓗᐊᓕᕐᓂᕐᒪᑦ ᓄᓇᓕᖓᓄᑦ ᐊᓕᓚᔪᓂᒃ ᐴᕕᓂᕐᓂᒃ ᓯᖃᓪᓕᑎᑦᑎᓪᓗᑎᒃ ᐃᑭᑦᑎᓐᓂᕐᒪᑕ.

ᓲᕐᓗ ᐊᒃᑕᕐᓗᑯᐃᑦ ᖄᖓᓄᑦ ᐸᐅᖓᒥᒃ ᐃᓕᓯᔪᑦ ᐃᒥᒐᒧᑦ. ᐊᒥᓱᑦ ᐊᒃᑕᕐᕖᑦ ᓄᓇᓕᖕᓂ ᓯᕗᓪᓕᖅᐹᖑᖃᑦᑕᕐᒪᑕ ᑎᑭᒃᑐᓄᑦ ᑕᑯᔭᐅᓪᓗᑎᒃ. ᑕᐃᒫᓴᐃᓐᓇᖅ ᐱᖕᒪᑕ ᐊᐅᓱᐃᑦᑐᒥ ᐊᒃᑕᕐᕕᖓᑦ ᒥᑦᑕᕐᕕᖕᒦᒻᒪᑦ ᐃᖃᓗᖕᓂᓗ ᑕᐃᒪᐃᒻᒥᔪᖅ ᐅᒥᐊᕐᔪᐊᓄᑦ ᑐᓚᒃᑕᕐᕕᐅᑉ ᑰᖕᒥ ᖃᓂᒋᔭᖓᓃᒻᒪᑦ ᐊᒃᑕᕐᕕᖓᑦ ᐅᒥᐊᕐᔪᐊᒃᑯᑦ ᓂᐅᕈᑲᑕᒃᑐᑦ ᑎᑭᒃᑳᖓᑕ ᓯᕗᓪᓕᖅᐹᒥᒃ ᑕᑯᔭᐅᖅᑳᖃᑦᑕᖅᖢᓂ ᓄᓇᓕᖓᑕ ᓯᕗᖓᓂ ᐊᓯᐊᓄᖔᖅ ᓄᒃᑎᖅᑕᐅᔪᒃᓴᐅᔪᖅ ᐊᖏᔪᒥᒃ ᑐᓚᒃᑕᕐᕕᓕᐅᓂᐊᓕᖅᐸᑕ, (ᖃᖓᑕᓲᒃᑯᑦᑕᐅᖅ ᑎᑭᑦᑐᑦ ᓯᕗᓪᓕᖅᐹᒥᒃ ᑕᑯᖃᖅᑕᕐᒪᑕ ᐃᖃᓗᖕᒥᐅᑦ ᐊᓄᓪᓚᒃᓰᕕᐊᓂᒃ).

ᐅᐊᑲᓪᓚᓗᐊᖑᖕᒪᑦ ᑕᑯᓪᓗᒍ ᑖᓐᓇ ᓄᓇᓕᕕᖓᑦ ᓴᐅᔭᐅᓯᒪᖕᒪᑦ ᐊᒃᑕᕐᓗᑯᓄᑦ ᖃᐅᓱᐃᑦᑐᒥ ᐊᒻᒪᓗ ᐃᑦᑕᕐᓂᑕᖃᕐᕕᐅᓪᓗᓂ. ᓲᖃᐃᒻᒪ ᐃᓄᖏᓐᓄᑦ ᐅᓐᓂᕐᓗᒃᓴᐅᑕᐅᓱᖑᓴᖅᐳᖅ ᖃᐅᓱᐃᑦᑐᒥᐅᓄᑦ. ᐊᑏ ᓯᕗᕚᑦᑎᓐᓂᒃ ᐃᖅᑲᓱᑦᑎᐊᓚᐅᖅᑕ ᐃᖅᑲᐅᒪᓗᒋᑦ ᐊᖏᕐᕋᕕᓂᖏᑦ ᑲᒪᒋᔭᐅᑦᑎᐊᓚᐅᕐᓕᑦ.