ᐃᓄᐃᑦ ᐊᑭᒪᖃᑦᑕᐅᑎᓕᖅᐳᑦ Eskimos-ᓄᑦ

NNSL- November 26, 2017

ᑭᓱᒥᒃ ᐃᓗᓕᖃᖅᐸ ᐊᑎᖅᐳᑦ?

ᐃᓛᓐᓂᓚᐅᓱᖓᒃᑯᑦ, ᓄᓇᓕᖕᒥᐅᑦ ᐊᐱᕆᔭᐅᖃᑦᑕᕐᒪᑕ ᐃᒻᒥᓂᒃ ᕿᒥᕈᑦᑎᐊᖁᔭᐅᓪᓗᑎᒃ ᐃᓅᓂᖏᓐᓄᑦ ᐊᑎᖏᓐᓂᒃ ᐊᑭᒪᖃᑦᑕᐅᑎᔪᓄᑦ ᐱᖑᐊᖅᑏᑦ ᐊᑎᖏᓐᓄᑦ, ᑕᐃᓗᒋᑦ ᒪᑯᐊ ᐊᓇᐅᓕᒑᖅᑏᑦ Cleveland Indians, NFL-ᑯᓪᓗ Washington Redskins-ᖁᑎᖏᑦ, ᐊᒻᒪᓗ ᑕᐃᒪ CFL-ᑯᑦ Edmonton Eskimos-ᖁᑎᖏᑦ, ᑭᖑᓪᓕᖅᐹᖅ ᑖᓐᓇ ᐊᒃᑐᐊᓂᖃᖅᖢᓂ ᓄᓇᕗᒥᐅᓄᑦ.

ᐃᓚᖏᓐᓄᑦ, ᐱᓗᐊᖑᐊᓕᕋᓱᒋᔭᐅᔪᑦ ᓱᕙᓕᑭᐊᒥᒃ. ᑭᓯᐊᓂᓕ ᐊᓯᖏᓐᓄᑦ, ᑖᓐᓇ ᐱᑐᖃᐅᓕᕐᒪᑦ ᑕᐃᒍᓯᐅᕙᓚᐅᖅᑐᓂᒃ ᑕᐃᓱᒪᓂ ᒪᓕᒃᒪᑦ ᓄᓇᖃᖅᑳᖅᑐᐃᑦ ᐃᓄᒋᔭᐅᕙᑎᓪᓗᒋᑦ ᓱᓕ ᐃᖅᑲᐅᒪᓇᖅᑐᖅ ᐃᓄᖕᓄᑦ.

ᑕᐃᓐᓇ ᐅᓂᒃᑳᓕᐅᖅᑎᐅᖃᑎᕗᑦ ᑭᕙᓪᓕᕐᒥ ᓂᐱᕗᒃᑯᓐᓂ ᑎᐅᕈᓪ ᒍᕆᐅ, ᐃᓱᒪᖕᒪᑦ ᓄᓇᕗᒥᐅᑦ ᐊᓯᖏᓐᓂᒃ ᐱᒻᒪᕆᐅᓂᖅᓴᓂᒃ ᑲᒪᔭᒃᓴᖃᕐᒪᑕᓕ, ᐃᒪᐃᓕᓪᓗᓂ ᐅᓂᒃᑳᓕᐊᕆᕋᑖᖅᑕᒥᓂ ᐃᓱᒫᓗᒋᔭᐅᔪᓂᒃ ᑭᕕᐊᕐᒥ, ᓯᕗᓪᓕᖅᐹᖑᓪᓗᓂ ᐃᓄᒃ ᐊᖅᓴᖅᑎᒃᓴᓂ ᐃᓕᓴᖃᑕᐅᔪᔪᖅ ᐊᓐᓂᓚᐅᕐᓂᒪᑦ ᐱᒋᐊᓚᐅᖏᖢᓂ ᓱᓕ), ᓇᖕᒥᓂᖅ ᐱᖑᐊᖅᑎᓂᒃ  ᑖᒃᑯᓂᖓ ᖃᓄᐃᒃᓴᓚᐅᖏᑦᑐᖅ ᐊᑎᖓᓂᒃ ᐊᑎᖃᕐᓂᖏᓐᓄᑦ.

“(Eskimos ᐃᒪᐃᒻᒪᑕ) ᐱᐅᓱᒋᔪᓄᑦ ᑕᐃᒪᓐᓇ ᑕᐃᔭᐅᕙᔪᒐᑦᑕ. ᔮᒪᓃᓚᓪᓗᓂ ᐊᑎᕐᓗᒃᑎᑦᑎᖏᒻᒪᑦ, ᐃᑖᓕᐊᓚᓪᓗᓂ ᐊᒻᒪ. ᐊᒥᐊᓕᒃᑲᓚᓪᓗᓂᓗ,” ᑕᐃᒪᓐᓇ ᑭᐅᔭᐅᓚᐅᖅᓯᒪᔪᑦ ᐃᓐᒪᓐᑕᓐᒥᐅᑦ ᐅᖃᓕᒫᒐᓕᐅᖅᑎᖏᑦ 2014-ᒥ ᑕᒪᓐᓇ ᐅᖃᐅᓯᐅᑎᓪᓗᒍ.

ᐃᑲᔪᖅᓴᖅᑕᕗᑦ ᒍᕆᐅᑉ ᐅᖃᐅᓯᖓ ᑕᒪᓐᓇ ᐱᒻᒪᕆᐅᑎᑕᐅᓕᑳᓪᓚᖕᒥᖕᒪᑦ ᐊᓯᖏᓐᓂᒃ ᐱᔭᕆᑐᔪᓂᒃ ᑲᒪᒋᔭᐅᒋᐊᓕᖕᓂᒃ ᑐᓄᖓᓇᓱᐊᓕᕐᒥᖕᒪᑕ ᓄᓇᕗᒥᐅᓄᑦ ᐊᒃᓱᕉᑕᐅᔪᓂᒃ, ᐃᓱᒫᓗᒋᔭᐅᔪᓂᒃ ᑲᓇᑕᒥᐅᑦ ᖃᓪᓗᓈᓂᒥᐅᖏᓐᓄᑦ ᑭᐅᓯᓇᓱᐊᓕᕐᒥᖕᒪᑕ. ᑭᓯᐊᓂᓕ ᑐᐊᕕᕐᓇᖅᑐᖃᖅᑎᓪᓗᒍ ᐱᔭᕆᑐᔪᒥᒃ ᑲᑎᒪᓂᐊᖅᑎᓪᓗᒋᑦ ᐃᖅᑲᓇᐃᔭᕐᕕᖕᓂ, ᕿᑐᖓᑎᑦ ᐃᓕᓴᕆᐊᖅᑎᓲᖑᖏᑕᑎᑦ ᐳᐃᔪᕌᕈᑎᓂᒃ ᐊᑐᖅᑎᓪᓗᒋᑦ. ᐅᔾᔨᕆᔭᐅᑳᓪᓚᖕᓇᕐᒪᑦ ᑕᐃᒪᓐᓇᓴᐃᓐᓇᖅ ᐅᔾᔨᕆᔭᐅᑳᓪᓚᖕᓇᖅᑐᒥᒃ ᐋᕿᒃᓯᓲᖑᒐᑦᑕ ᐱᒻᒪᕆᐅᔪᓂᒃ ᐅᓚᕕᓴᐅᑕᐅᔪᓂᒃ.

ᐲᑕ ᐃᕐᓂᐅᑉ, ᐅᖃᓕᒫᒐᓂ ᐅᓂᒃᑳᓕᐅᓲᖅ ᑖᓐᓇ ᐊᒻᒪᓗ ᓄᓇᕗᒥᐅᓄᑦ ᑲᒥᓯᓇᐅᓚᐅᖅᓯᒪᔪᖅ, ᐅᖃᓚᐅᖅᑐᖅ ᐱᓇᓱᐊᕈᓯᐅᓚᐅᖅᑐᒥ ᑖᓐᓇ ᐊᑎᖅ Edmonton Eskimos ᐱᒻᒪᕆᐊᓘᖏᒻᒪᑦ. “ᑕᐃᒪᓐᓇ ᐊᑎᖃᕋᓗᐊᖅᐸᑕ ᐅᕙᑦᑎᓐᓄᑦ ᐸᒡᕕᓇᖏᒻᒪᑦ ᖃᓄᑐᐃᓐᓇᖅ. ᑐᑭᖃᕐᒪᑦ ᒥᑭᒐᖅᑐᓲᖑᔪᒍᑦ. ᐄ ᓱᓕᔪᑦ ᒥᑭᒐᖅᑐᓲᖑᔪᒍᑦ!”

ᑖᓐᓇ ᐊᓯᐊᓄᖔᖅ ᓵᖓᓕᖅᑐᖅ ᑕᐃᓱᒪᖓᓂᑦ ᐅᖃᐅᓯᕆᕙᒃᑕᖓᓂᑦ ᑐᓴᕐᓇᖅᑐᑎᒍᑦ ᑎᑎᕋᓚᐅᖅᓯᒪᖕᒪᑦ 2011-ᒥ ᑕᐃᓪᓗᓂᐅᒃ ‘ᐃᓄᐃᑦ, Eskimos-ᖑᖏᑦᑐᑦ, ᐊᐃ’?’

ᑎᑎᕋᓯᒋᐊᖅᖢᓂ ᐃᒪᐃᓕᓚᐅᖅᓯᒪᔪᖅ, ᐃᕐᓂᖅ, “Eskimo-ᖑᓂᕋᖅᑕᐅᒋᐊᒃᓴᖅ ᖁᕕᐊᒋᖏᑕᕋ. ᐊᒥᓱᑦ ᐃᓄᐃᑦ ᓇᕐᕈᖕᒪᑕ ᑕᐃᒪᓐᓇ ᑕᐃᔭᐅᖃᑦᑕᕆᐊᒃᓴᖅ Eskimo-ᖑᓂᕋᖅᑕᐅᒋᐊᒃᓴᖅ. ᓇᕐᕈᒋᔭᐅᔪᑎᑐᑦ ᐊᑦᑎᖅᑕᐅᓯᒪᖕᒪᑦ Eskimo-ᒥᒃ.”

ᐊᒥᓱᓄᑦ ᓄᓇᕗᒥᐅᓄᑦᑕᐅᖅ ᑖᓐᓇ ᐊᑎᖅ ᓇᕐᕈᒋᔭᐅᖃᑦᑕᕐᒪᑦ. ‘Eskimo”-ᒥᒃ ᑕᐃᔭᐅᓪᓗᓂ ᓲᕐᓗ ᐱᐅᖏᑦᑐᑎᑐᑦ ᓇᓗᓇᐃᒃᑯᑕᖃᖅᑎᑕᐅᓐᓇᕐᒪᑦ ᑭᓯᐊᓂᓕ ᐊᑯᓂ ᐱᖑᐊᖅᑎᓄᑦ ᐊᑎᒋᔭᐅᓕᕐᒪᑦ ᑖᒃᑯᐊ ᐱᖑᐊᖅᑏᑦ ᐱᒃᑯᒥᒋᔭᐅᓪᓗᑎᒃ ᐊᑎᖏᑦ ᐅᓂᒃᑲᐅᓯᐅᕙᖕᒪᑕ ᑕᒪᐃᓐᓄᑦ ᐱᖑᐊᖅᑎᖁᑎᑦᑎᐊᕙᐅᖕᒪᑕ ᑲᓇᑕᓕᒫᒥ. ᐃᓚᐅᑎᓪᓗᒋᑦ ᓄᓇᕗᒥᐅᓄᑦ.

ᑕᐃᒪᐃᒃᑲᓗᐊᖅᑎᓪᓗᒍ, ᖃᐅᔨᒪᒋᐊᖃᖅᑐᒍᑦ ᖃᓄᖅ ᑖᒃᑯᐊ ᐱᖑᐊᖅᑎᖏᑕ ᐊᑎᖓ ᐱᒋᐊᓚᐅᕐᒪᖔᑦ. ᑕᐃᓱᒪᓂᐅᑎᓪᓗᒍ Edmonton Journal-ᒥ ᐅᓂᒃᑲᐅᓯᐅᔪᔪᑦ, ᐃᓐᒪᓐᑕᓐ ᐃᔅᑭᒨᔅ ᑕᐃᔭᐅᓐᓂᕐᒪᑕ ᕿᐸᒍᓱᒃᑐᒧᑦ ᐊᑭᔭᐅᒐᒥᒃ ᐱᖑᐊᖅᑎᖏᓐᓄᑦ ᐅᓂᒃᑲᐅᓯᐅᓪᓗᓂ ᐅᐊᑲᓪᓚᒍᓱᒃᖢᓂ ᐃᓐᒪᓐᑕᓐᒥᐅᓂᒃ Eskimo-ᖑᓂᕋᐃᓐᓂᕐᒪᑦ, ᑖᓐᓇ ᓄᓇᓕᐸᐅᔭᖅ ᖁᑦᑎᖕᓂᖅᐹᖑᓪᓗᓂ ᐱᖑᐊᖅᑎᖃᕐᒪᑦ ᐃᒃᑮᕌᓗᖕᒥᐅᖑᓪᓗᑎᒃ. ᑖᒃᑯᐊ ᐱᖑᐊᖅᑎᖏᓐᓄᑦ ᑕᐃᒍᓯᐅᓕᖅᑐᕕᓂᖅ ᐃᓐᒪᓐᑕᓐᒥᐅᓄᑦ. ᐃᒫᖓᐃ, ᑖᓐᓇ ᑕᐃᓱᒪᓂᐊᓗᒃ ᖃᓪᓗᓈᓄᑦ ᐱᖑᐊᖅᑎᓄᑦ ᐊᑎᖅ ᑎᒍᔭᐅᓚᐅᖅᑐᖅ ᐊᑭᒪᖃᖅᑕᐅᑎᔪᓄᑦ.

ᑲᓇᑕᒥᐅᓕᒫᓪᓕ ᐊᐱᖅᓱᖅᑕᐅᓪᓗᑎᒃ ᑕᒪᑐᒪᓂ 57-ᐳᓴᖏᑦ ‘ᑲᓇᑕᒥᐅᑐᖃᐃᑦ’ – ᐅᑐᖃᐅᓂᖅᓴᐃᑦ (ᖃᓪᓗᓈᖑᕙᓪᓚᐃᔪᑦ) ᐊᖑᑏᑦ ᑲᓇᑕᐅᑉ ᐅᐊᓕᓂᖔᖓᓂᒥᐅᑦ, ᖃᐅᔨᓴᕈᑕᐅᓚᐅᖅᑑᑉ ᓈᓴᐅᑎᖏᑦ ᑕᑯᓪᓗᒋᑦ – ᐱᒃᑯᒥᒍᓱᖕᓂᖅᓴᐅᓚᐅᕐᒪᑕ ᑖᓱᒥᖓ ᐊᑎᕐᒥᒃ ᐸᐸᑦᑎᔪᒪᔪᑦ. ᓄᓇᕗᒥᐅᑦ ᐊᐱᕆᔭᐅᓐᓂᖏᓱᑎᒃ.

ᐃᓚᖏᑦ ᖃᐅᔨᒪᔭᐅᑦᑎᐊᖅᑐᑦ ᐃᓄᐃᑦ – ᓯᕗᓕᖅᑎᖏᑦ ᒪᑯᐊ ᐄᕙ ᐊᒋᐊᖅ, ᐃᓐᖏᖅᑎᓗ ᑖᓐᔭ ᑕᒑᖅ, ᐊᒻᒪᓗ ᑕᐃᓐᓇᓗᐊᖑᐊᖅ ᐃᓄᐃᑦ ᑕᐱᕇᑦ ᑲᓇᑕᒥ ᐊᖓᔪᖅᑳᖓ – ᐅᖃᖃᑦᑕᖅᓯᒪᓕᕐᒪᑕ ᑖᓱᒥᖓ ᐊᑎᕐᒥᒃ ᐲᖅᑕᐅᖁᔨᓪᓗᑎᒃ.

ᐱᖑᐊᖅᑎᖏᑦ ᑭᐅᓚᐅᖅᑐᑦ ᑐᓵᓂᕋᖅᖢᑎᒃ ᑭᓯᐊᓂᓕ ᑕᒪᑐᒪᓂᐅᓂᖓᓂ ᐊᑎᕐᒥᓂᒃ ᐊᓯᔾᔩᓂᐅᔭᖏᓐᓂᕋᖅᓗᑎᒃ. ᐊᒻᒪᓗ ᒫᓐᓇ ᓄᓇᓕᖕᒥᐅᓄᑦ ᐊᒃᓱᕈᓕᕈᑕᐅᓇᓂ ᐱᖕᒪᑦ ᐱᖑᐊᖅᑏᑦ ᐊᑎᖏᓐᓂᒃ ᐊᓯᔾᔩᖁᔨᔪᓄᑦ ᐃᓄᒻᒪᕆᖕᓄᑦ ᐱᐅᒋᔭᐅᖏᓕᖅᐸᓪᓕᐊᓕᖅᑎᓪᓗᒍ.

ᑕᐃᒪᑑᖅ Edmonton Eskimos-ᑯᑦ ᓈᓚᒃᑐᒃᓴᐅᒐᓗᐊᖅᐳᑦ ᒫᓐᓇ ᐃᓱᒫᓗᒃᑐᓂᒃ ᐅᖃᐅᓯᐅᖃᖅᑕᖅᑐᓂᒃ ᐊᓯᔩᓗᑎᒃ ᒫᓐᓇ ᐃᓱᒪᒋᔭᐅᔪᑦ ᒪᓕᒃᓗᒋᑦ ᑕᐃᓱᒪᓂᑕᖅ ᐊᑦᑎᖅᑕᐅᓂᑯ ᐊᑭᕋᖅᑐᕐᒃᒪᑦ.

ᐃᓛᖏᓛᒃ, ᖃᓄᐃᑉᐸ ᐊᑦᑎᖅᑕᐅᓯᒪᓪᓗᓂ ᑕᐃᒪᓐᓇ? ᐊᖅᓴᖅᑏᑦ ᖃᓄᑐᐃᓐᓇᖅ ᓇᖕᒥᓂᖅ ᐊᑦᑎᕋᓗᐊᖅᐸᑕ ᓱᓕ ᐊᖅᓴᖅᑎᐅᓂᐊᕐᒪᑕ ᑖᒃᑯᐊ ᓄᓇᓕᖏᓐᓄᑦ. ᑭᓯᐊᓂᓕ ᑕᐃᖃᑦᑕᓯᒋᐊᕈᑎᖃᐃ Edmonton Redskins-ᖔᓂᒃ.

Leave a Comment:

Your email address will not be published. Required fields are marked *