ᐃᒡᓗᓕᖕᒥ ᑎᑕᒃᑎᑦ ᐊᔪᖏᑦᓯᐊᖅᑐᑦ

by Derek Neary- March 12, 2018

ᓚᓱᕋᔅ ᖃᑦᑕᓕᒃ ᐃᕿᑉᐸᒋᓪᓗ ᑎᑕᒃᑎᖏᑦ ᖁᕕᐊᓱᑦᓯᐊᖅᐳᑦ ᐱᓐᖑᐊᖅᖢᑎᒃ ᐊᒻᒪ ᐳᓚᕋᖅᖢᑎᒃ ᓇᒧᑐᐃᓐᓇᖅ, ᑭᓯᐊᓂᓗ ᑕᐃᒪᓐᓇ ᑐᓂᕐᕈᑎᖃᖃᑦᑕᖅᐳᑦ.

ᓴᐅᒥᐊᓂᑦ, ᐱᓕ−ᔩ ᐊᒻᒪᖅ, ᓛᓱᕋᔅ ᖃᑦᑕᓕᒃ ᐊᒻᒪ ᐋᓚᓐ ᓈᔅ ᑲᖑᒃ ᐱᖓᓱᑦ ᐃᒡᓗᓕᖕᒥᐅᑕᐃᑦ ᑎᑕᒃᑎᑦ ᐃᕿᑉᐸᒋᑦ. ᔪᐊᑕᓐ ᐃᑉᑲᕐᓇᒃ ᕿᓚᐅᑎᓕᕆᔨᐅᓪᓗᓂ.

ᑕᐃᒪᓐᓇ ᖃᐅᔨᑎᑦᓯᓚᖅᖢᑎᒃ ᖁᕕᐊᓱᒡᕕᐅᑎᓪᓗᒍ ᐃᑲᔪᕈᑎᒃᓴᒥᒃ ᓂᕿᖃᑦᓯᐊᖃᑦᑕᖏᑦᑐᓄᑦ ᐃᒡᓗᓕᖕᒥ ᓂᕿᑖᒐᒃᓴᓂᒃ ᓂᐅᕕᕈᑎᒃᓴᓂᒃ, ᐊᕝᕙᓗᐊᖏᓐᓂᒃ ᑮᓇᐅᔭᓕᐊᖏᓐᓂᑦ ᐃᕿᑉᐸᒋᒃᑯᑦ ᓂᕿᑖᕈᑎᒃᓴᓄᑦ ᑐᓂᕐᕈᑎᖃᓚᐅᖅᐳᑦ ᐱᓐᖑᐊᕐᕕᖕᒥ ᐱᓐᖑᐊᖅᖢᑎᒃ. ᐊᕝᕙᒃᑲᓐᓂᖏᑦ ᐱᓐᖑᐊᖅᑐᓕᕆᔨᒃᑯᓐᓄᑦ ᑐᓂᕐᕈᑎᒋᓚᐅᖅᖢᒋᑦ.

“ᑖᒃᑯᐊ ᓄᓇᓕᐊᓛᒥᐅᑕᓂ ᓂᕿᑕᖃᓗᐊᖃᑦᑕᖏᒻᒪᑦ ᐊᑭᑐᓗᐊᕐᓂᖏᓐᓄᑦ. ᐃᓱᒪᓚᐅᖅᐳᖓ ᐃᑲᔪᐊᕐᔪᒍᒪᓪᓗᖓ,” ᖁᓕᑦᑕᓕᒃ ᐅᖃᓚᐅᖅᐳᖅ, ᐅᖃᓚᐅᖅᖢᓂᓗ ᐊᒥᓱᑦ ᐃᑲᔪᖃᑦᑕᖅᓯᒪᖕᒪᑕ ᑲᔪᓯᑦᓯᐊᕈᓐᓇᖁᓪᓗᒋᑦ ᑖᒃᑯᐊ.

ᐃᕿᑉᐸᒋᑦ, ᑐᑭᖃᖅᖢᓂ “ᐃᕿᑦᓯᓂᕐᒥᒃ” ᐱᒋᐊᓚᐅᖅᓯᒪᓪᓗᑎᒃ 2005-ᒥ ᖁᓕᑦᑕᓕᒃ ᐅᑭᐅᖃᖅᑎᓪᓗᒍ 12 ᐅᕙᓘᓐᓃᑦ 13-ᓂᒃ. ᐊᔪᖏᓴᖃᑦᑕᖅᖢᑎᒃ ᖃᖓᑕᐃᓐᓇᒃᑯᑦ.

“ᐃᓛᓐᓂᒃᑯᑦ ᐊᕐᕌᒍᓗᒃᑖᑲᓴᐅᖃᑦᑕᖅᐳᖅ ᐱᓐᖑᐊᖃᑦᑕᖏᑦᖢᑕ. ᐃᓛᓐᓂᒃᑯᑦ ᐱᓐᖑᐊᖅᑐᒻᒪᕆᐅᕙᒃᖢᑕ,” ᐅᖃᓚᐅᖅᐳᖅ ᖁᓕᑦᑕᓕᒃ.

ᖁᓕᖏᖅᑕᖅᖢᑕ ᐊᕙᑎᓂᑦ ᐃᓐᖏᐅᓯᓂᒃ ᐱᖃᖅᐳᒍᑦ − ᐃᓄᒃᑎᑐᐃᓐᓇᑲᓴᐅᓪᓗᑎᒃ − ᓂᐱᓕᖅᑕᐅᓯᒪᓪᓗᑎᒡᓗ 2017−ᒥ ᐱᖑᐊᓚᐅᖅᓯᒪᓪᓗᑎᒃ ᓂᐱᓕᖅᑕᐅᓚᐅᖅᖢᑎᒃ, ᐃᒡᓗᓕᖕᒥ ᓄᑕᐅᖏᑦᑐᒥᒃ ᐱᓐᖑᐊᕐᕕᑐᖃᒥ.

ᖁᓕᑦᑕᓕᒃ, ᓯᕗᓕᖅᑎᖓᑦ ᐃᓐᖏᖅᑎᑦ ᑯᑭᑦᑕᐹᖅᑎᐅᓪᓗᓂᓗ, ᐱᓐᖑᐊᖅᑎᖏᓪᓗ ᑎᑎᕋᖃᑦᑕᖅᐳᑦ ᓇᖕᒥᓂᖅ ᐃᓐᖏᒐᒃᓴᒥᓂᒃ . ᐋᓚᓐ ᓈᔅ ᑲᖑᒃ ᐱᐊᓄᖃᑦᑕᖅᖢᓂ ᐊᒻᒪ ᓂᐱᖁᖅᑐᔪᒥᒃ ᑯᑭᑦᑕᐹᒥᒃ. ᐱᓕ−ᔩ ᐊᒻᒪᖅ ᕙᐃᔭᒨᖅᑐᒥᒃ ᑯᑭᑦᑕᐹᖃᖅᖢᓂ ᔪᐊᑕᓐ ᐃᑉᑲᖕᓇᒃ ᑐᕋᒻᓂᒃ.

ᐱᓐᖑᐊᖅᓯᒪᓪᓗᑎᒡᓗ ᑕᑯᒃᓴᐅᓂᖃᖅᑎᓪᓗᒋᑦ ᐃᒡᓗᓕᖕᒥ, ᐃᖃᓗᖕᓂ, ᔭᓗᓇᐃᒥ ᐊᒻᒪ ᐊᓯᖏᓐᓂ ᓄᓇᓕᖕᓂ.

ᖁᓕᑦᑕᓕᒃ ᐃᖅᑲᐅᒪᓪᓗᓂ ᐱᓐᖑᐊᖅᑕᒥᓂᒃ ᐱᓐᖑᐊᖅᖢᓂ “ᑐᒃᓯᐊᕐᕕᐊᓛᒥ” 8−ᑐᐃᓐᓇᕐᓂᒃ ᐅᑭᐅᖃᖅᖢᓂ. 12−ᓂᒃ ᐅᑭᐅᓂᒃ ᐱᓐᖑᐊᖃᑕᐅᓯᒪᓕᖅᖢᓂ ᑐᓴᖅᓴᐅᖃᑦᑕᖅᖢᑎᒡᓗ ᓇᓂᑐᐃᓐᓇᖅ, ᑕᐃᒪᓐᓇ ᑎᑕᒃᑎᐅᓪᓚᕆᖕᓂᕐᒧᑦ ᐃᖕᒥᓂᒃ ᐃᓱᒪᖏᑉᐳᖅ.

“ᓱᓕ ᐱᒋᐊᓕᓵᐸᓗᒃᑲᒪ ᑎᑕᖕᓂᕐᒥᒃ,” ᐅᖃᓚᐅᖅᐳᖅᔭ

ᐊᒻᒪ “ᑲᖑᑦᑕᐅᓪᓗᓂ ᓱᓕ” ᐅᖃᓚᐅᖅᐳᖅ ᓱᖁᑎᒃᓴᖏᑦᑐᑦ ᐊᒥᓱᓄᑦ ᑕᑯᓐᓇᖅᑕᐅᓂᕐᒧᑦ ᑎᑕᖕᓂᕐᒧᓪᓗ ᐊᒥᓱᓄᑦ ᐃᓄᖕᓄᑦ.

“ᖁᕕᐊᒋᒐᒃᑯ,” ᐅᖃᓚᐅᖅᐳᖅ.

ᑖᒃᑯᐊ ᐃᓐᖏᖅᑎᑦ ᑎᑕᒃᑎᑦ 5 ᒑᓚᐃᑦ Jerry Cans ᐊᒻᒪ Trade-offs ᓯᕗᓪᓕᖅᐸᐅᓪᓗᑎᒃ ᑐᓴᕐᓂᕆᓪᓗᓂᒋᑦ, ᐊᓯᖏᓪᓗ.

“ᑕᒪᕐᒥᒃ ᓄᓇᕗᒥ ᑎᑕᒃᑎᑦ ᐊᔪᖏᑦᓯᐊᖅᐳᑦ,” ᐅᖃᓚᐅᖅᐳᖅ.

Leave a Comment:

Your email address will not be published. Required fields are marked *