ᖁᕕᐊᓲᑎᖃᕐᓂᖅ ᐃᓅᓯᕐᒥ ᕼᐋᑭᑎᒍᑦ

by Darrell Greer- April 4, 2018

ᑑᑑ ᐃᓚᒌᑦ ᐊᓕᐊᓇᐃᒍᓱᒃᐳᑦ ᑐᕌᒐᕆᔭᖓᓂ ᑎᐊᕆᓐᔅ ᑑᑑᒧᑦ ᐃᖅᑲᐅᒪᓂᐅᔪᒥ (TTM) ᐃᓐᓚᕐᓄᑦ ᐊᖑᑎᓄᑦ ᕼᐋᑭᒧᑦ ᓵᓚᖃᕋᓱᐊᕐᓂᐅᔪᒥ ᐱᓕᕆᕙᓪᓕᐊᓂᖓᓂ.

ᓵᓚᖃᕋᓱᐊᕐᓂᐅᔪᖅ, ᑭᐅᓗᒍᑕᐅᔪᓐᓇᖅᑐᒥ ᐊᓕᐊᓇᐃᒋᔭᐅᓛᖑᖃᑕᐅᔪᒥ ᐱᙳᐊᕐᓂᐅᔪᒥ ᖃᓄᐃᓐᓂᖓᓂ ᑲᖏᖅᖠᓂᕐᒥ, ᐊᑦᑎᖅᑕᐅᒃᑲᓐᓂᓚᐅᖅᐳᖅ ᑎᐊᕆᓐᔅ ᑑᑑᒧᑦ ᐃᖅᑲᐅᒪᓂᐅᔪᒥ ᐃᕐᙳᓯᖓᓄᑦ ᐊᕐᕌᒎᓚᐅᖅᑐᒥ ᐃᖅᑲᐅᒪᓂᕐᒧᑦ ᑎᐊᕆᓐᔅ ᑑᒨᑦ ᑐᖁᓚᐅᖅᑐᒥ ᐃᒻᒥᓃᕐᓂᕐᒧᑦ ᐅᑭᐅᖃᖅᑎᓪᓗᒍ 22-ᒥ 2002-ᖑᑎᓪᓗᒍ.

ᕼᐊᓐᑐᕐ ᑑᑑ, ᓴᐅᒥᖕᒥ, ᐸᑦᑕᒃᑐᖅᐳᖅ ᕉᔅ ᐊᒻᒪ ᐹᓂ ᑑᑑ ᓂᓪᓕᐅᔾᔨᑎᓪᓗᒋᑦ ᐃᓄᒋᐊᒃᑐᓂ ᒪᑐᕙᓪᓕᐊᓂᐅᔪᒥ ᖁᕕᐊᓱᒍᑎᖃᖅᑎᓪᓗᒋᑦ ᑎᐊᕆᓐᔅ ᑑᑑᒧᑦ ᐃᖅᑲᐅᒪᓂᐅᔪᒥ ᐃᓐᓇᕐᓄᑦ ᐊᖑᑎᓄᑦ ᕼᐋᑭᒥ ᓵᓚᖃᕋᓱᐊᕐᓂᐅᔪᒥ ᑲᖏᖅᖠᓂᕐᒥ ᒫᔾᔨ 11-ᖑᑎᓪᓗᒍ.

ᐊᑎᖃᓚᐅᖅᓯᒪᕗᖅ ᕘᔅᑎᐊ ᐊᕙᑕᖅ ᐃᕐᙳᓯᖓᓐᓂ.

ᐹᓂ ᑑᑑ, ᑎᐊᕆᓐᔅ ᐊᑖᑕᖓ, ᐅᖃᓚᐅᖅᐳᖅ ᑲᑎᒪᔨᕋᓛᖑᔪᑦ ᐊᐅᓚᑦᑎᔪᑦ ᖃᓄᐃᓐᓂᐅᔪᒥ ᐱᓕᕆᑦᑎᐊᕐᔪᐊᓚᐅᖅᐳᑦ ᐊᒻᒪ ᐅᐱᒍᓱᖕᓂᖃᓚᐅᖅᖢᓂ ᑲᑎᒪᔨᕋᓛᓄᑦ ᐃᓚᒋᔭᐅᔪᒧᑦ ᑐᕋᐃ ᐊᒃᓴᕐᓂᒃᒧᑦ.

“ᐅᓇᐅᓚᐅᙱᒃᑯᓂ (ᐊᒃᓴᕐᓂᖅ) ᐊᒻᒪᓗ ᐊᓯᖏᑦ ᐊᖑᑏᑦ ᑐᓄᐊᒍᑦ ᐱᓕᕆᔪᓄᑦ, ᐱᓕᕆᑦᑎᐊᕋᔭᓚᐅᙱᓚᖅ ᑕᒪᐅᖓ ᑎᑭᓪᓗᒍ,” ᐅᖃᓚᐅᖅᐳᖅ ᐹᓂ. “ᖃᐅᔨᒪᓪᓚᕆᓚᐅᙱᓚᖓ, ᐅᕙᓐᓄᑦ, ᖃᓄᑎᒋ ᐱᓕᕆᓂᖃᕆᐊᖃᕐᓂᖓᓂ ᑲᒪᒋᔭᖃᕐᓂᕐᒧᑦ ᖃᓄᐃᓐᓂᐅᔪᒥ ᑕᐃᒪᐃᑦᑐᒧᑦ.”

ᐹᓂ ᕼᐋᑭᒧᑦ ᐊᓕᐊᓇᐃᒋᔭᖃᐃᓐᓇᖅᐳᖅ ᐃᒃᓯᕚᖑᔮᕐᔪᒡᓗᓂ, ᐱᙳᐊᖅᑐᓂ ᖁᙱᐊᕐᓗᓂ ᐊᒻᒪᓗ ᐊᓕᐊᓇᐃᒋᓗᒍ ᓵᓚᖃᕋᓱᐊᕐᓂᐅᔪᒥ, ᐅᖃᓚᐅᖅᐳᖅ.

“ᐊᖅᑯᑎᑦᑎᐊᕙᒃᑰᑦᑎᐊᖅᑰᖅᐳᒍᑦ ᑕᑯᒃᓴᐅᑎᑕᐅᓂᖓᓂ ᖁᕕᐊᓱᒍᑕᐅᓂᖓᓂ ᐃᓅᓯᕐᒥ ᕼᐋᑭᒃᑯᑦ ᑕᐃᒪᐃᓪᓗᐊᓚᐅᕐᓂᖓᓂ. ᐊᒥᓱᑦ ᐊᖑᑏᑦ, ᓵᓚᖃᕋᓱᐊᕐᓂᖅ ᐱᐊᓂᖕᒪᑦ, ᐅᕙᑦᑎᓐᓄᑦ ᐃᒥᒐᕆᐊᖅᑐᓚᐅᖅᐳᑦ ᐊᒻᒪᓗ ᖁᕕᐊᓱᑦᑎᐊᖅᖢᑎᒃ ᖃᓄᐃᓕᖓᓚᐅᕐᓂᖓᓐᓂ.”

ᐹᓂ ᐃᓚᒋᐊᖅᓯᓚᐅᖅᐳᖅ ᐱᐅᒋᑦᑎᐊᓚᐅᕐᓂᖓᓐᓂ ᓇᖕᒥᓂᖅ ᑐᓐᓂᖅᑯᑕᐅᓚᐅᖅᑐᓂ ᓵᓚᓯᐊᓂᑦ ᐊᑦᑎᖅᑕᐅᓪᓗᑎᒃ ᐃᓄᖕᓄᑦ ᑲᖏᖅᖠᓂᕐᒥ ᐊᓕᐊᓇᐃᒋᔭᖃᑦᑎᐊᖅᑐᓂ ᕼᐋᑭᒥᑦ, ᐃᓱᒪᒋᔭᐅᓂᐅᓚᐅᕐᒥᔪᒥ ᓵᓚᖃᕋᓱᐊᕐᓂᐅᔪᒧᑦ ᑲᑎᒪᔨᕋᓛᓄᑦ.

“ᑲᒪᖃᑦᑕᖅᐳᖓ ᑭᓱᓂᒃ (ᐊᒃᓴᕐᓂᖅ) ᐊᒻᒪᓗ ᐊᖑᑎᐅᔪᑦ ᐃᓱᒪᒋᖃᑦᑕᖅᑕᖏᓐᓂ ᑎᐊᕆᓐᔅ ᑑᑑ ᐃᖅᑲᐅᒪᓂᐅᔪᒧᑦ,” ᐅᖃᓚᐅᖅᐳᖅ. “ᐅᑯᐊ ᐊᖑᑕᐅᔪᑦ ᐃᓱᒪᒃᓴᖅᓯᐅᕆᕐᔪᐊᖅᓯᒪᕗᑦ ᖃᓄᐃᓕᖓᖁᔨᓂᖏᓐᓂ ᓵᓚᖃᕋᓱᐊᕐᓂᐅᔪᒧᑦ, ᑕᐃᒫᒃ ᖃᐅᔨᒪᐸᓗᒃᐳᖓ ᐊᕐᕌᒎᓂᐊᖅᑐᒥ ᐊᖏᓂᖅᓴᐅᓂᐊᕐᓂᖓᓂ ᐊᒻᒪ ᐱᐅᓂᖅᓴᒻᒪᕆᐅᓗᓂ.”

ᐹᓂᐅᑉ ᓄᓕᐊᖓ ᕉᔅ ᑑᑑ ᐅᖃᓚᐅᖅᐳᖅ ᐃᕐᓂᖓᓄᑦ ᔪᐊᑕᓐᒧᑦ ᓂᕆᐅᓚᐅᖅᐳᖅ, ᐃᓅᓂᑰᔪᒥ ᑲᖏᖅᖠᓂᕐᒥ ᐊᒻᒪ ᓯᕗᓪᓕᐅᓪᓗᓂ ᐃᓅᓪᓗᓂ ᕼᐋᑭᖅᑎᐅᓪᓗᓂ ᐱᙳᐊᕐᓂᖓᓄᑦ ᑲᓇᑕᒥ ᕼᐋᑭᖅᑎᐅᔪᓄᑦ, ᑎᑭᑦᑐᓐᓇᓛᕐᓂᖓᓂ ᐊᕐᕌᒎᓂᐊᖅᑐᒧᑦ ᓵᓚᖃᕋᓱᐊᕐᓂᐅᔪᒧᑦ. ᔪᐊᑎᓐ ᒫᓐᓇᐅᔪᒥ ᐱᙳᐊᖅᐳᖅ ᕌᒃᕗᑦ ᐊᐃᔅᕼᐋᔅᓄᑦ ᐃᒥᐊᓕᑲᓄᑦ ᕼᐋᑭᖅᑎᓄᑦ, ᑳᓐᑐᕌᒃᑕᐅᓯᒪᓪᓗᓂ ᓯᑳᒍ ᐸᓛᒃᕼᐋᒃᔅᓄᑦ ᑲᓇᑕᒥ ᕼᐋᑭᖅᑎᐅᔪᓄᑦ.

ᐊᓈᓇᐅᓪᓗᓂ, ᐊᔪᕐᓇᐃᓐᓇᐅᔭᖅᑐᖅ ᐊᓂᒎᑎᓂᖓᓄᑦ ᐃᓚᖏᓐᓂ ᓵᓚᖃᕋᓱᐊᕐᓂᐅᔪᒥᑦ, ᐅᖃᓚᐅᖅᐳᖅ.

“ᑭᓯᐊᓂ, ᐃᓗᐊᓗᒥᒍᑦ, ᐱᒻᒪᕆᐅᕐᔪᐊᖅᐳᖅ ᐃᓚᑦᑎᓐᓄᑦ,” ᐅᖃᓚᐅᖅᐳᖅ ᕉᔅ. “ᐃᓄᐃᑦ ᓈᒻᒪᒃᓴᖅᓯᒪᕗᑦ ᐊᑲᐅᑦᑎᐊᖅᑐᒥ ᐃᖅᑲᐅᒪᓂᕆᔭᐅᓂᖓᓄᑦ ᑎᐊᕆᓐᔅᒧᑦ.”

Leave a Comment:

Your email address will not be published. Required fields are marked *