ᕼᐋᑭᕐᓂᕐᒧᑦ ᐃᓕᓐᓂᐊᖅᑎᑎᒍᑎᑦ ᐃᓚᐅᕕᐅᓚᐅᖅᐳᑦ 200-ᑲᓴᖕᓄ ᓄᑕᖃᓄᑦ

by Darrell Greer- October 24, 2017

ᓯᑕᒪᖓᓂ ᐊᕐᕌᒍᑕᒫᖅᓯᐅᑎᒥ ᕼᐋᑭᕐᓇᖅ ᐱᒋᐊᓕᕐᒥᑎᓪᓗᒍ ᐃᓕᓐᓂᐊᖅᑎᑎᓂᖅ ᑲᔪᓯᑦᓯᐊᓚᐅᖅᐳᖅ ᑲᖏᖅᖠᓂᕐᒥ ᐱᓇᓱᐊᕈᓯᐅᓚᐅᖅᑐᒥ, 180 ᓄᓇᓕᖕᓂ ᕼᐋᑭᖅᑎᐊᓛᑦ ᐃᓚᐅᑉᓗᑎᒃ ᐊᒻᒪ ᖁᓕᑦ ᑲᖏᖅᖠᓂᕐᒥᐅᑕᐅᖏᑦᑐᑦ ᐃᓚᐅᓚᐅᖅᖢᑎᒃ.

ᐃᓕᓐᓂᐊᖅᑎᑎᓂᖅ ᐊᑐᖅᑕᐅᓚᐅᖅᖢᓂ ᐊᒃᑐᐱᕆ 16-ᒥᑦ 21-ᒧᑦ ᐃᓕᓐᓂᐊᖅᑎᑕᐅᑉᓗᑎᒃ ᕼᐋᑭᕐᓂᕐᒧᑦ ᐊᒻᒪ ᐃᓕᓐᓂᐊᕐᕕᐅᑉ ᐃᓗᐊᓂ ᐃᓕᓐᓂᐊᖅᑎᑕᐅᖃᑦᑕᖅᖢᑎᒃ ᐅᖃᓕᒫᕆᐅᖅᓴᓂᕐᒧᑦ ᑎᑎᕋᕆᐅᖅᓴᓂᕐᒧᓪᓗ.

ᑕᒪᓐᓇ ᐃᓕᓐᓂᐊᖅᑎᑎᓂᖅ ᐊᑐᖅᑕᐅᓯᒪᓕᖅᖢᓂ ᓄᑕᖃᓄᑦ 600 ᐅᖓᑖᓄᑦ ᑲᖏᖅᖠᓂᕐᒥ ᓯᐊᕐᕆᔮᕐᕕᖕᒥ ᐊᑐᖅᑕᐅᖃᑦᑕᖅᖢᓂ ᐱᒋᐊᓚᐅᖅᓯᒪᑉᓗᓂ ᑕᐃᒪᖓᓂᑦ 2014-ᒥ.

ᐊᒻᒪ 2017-ᒥ ᑖᓐᓇ ᐃᑦᑐᐊᓇ ᑯᓱᒐᒃ ᐅᖃᓕᒫᕆᐅᖅᓴᓂᕐᒧᑦ ᑎᑎᕋᕆᐅᖅᓴᓂᕐᒧᓪᓗ ᐃᓕᓐᓂᐊᖅᑎᑦᓯᓯᒪᓕᖅᖢᓂ, ᐅᐃᖓ ᐳᔾᔫᑦ ᑯᓱᒐᒃ, ᓯᑯᓂ ᓯᐊᕐᕆᔮᕐᓂᕐᒧᑦ ᐃᓕᓐᓂᐊᖅᑎᑦᓯᖃᑦᑕᖅᖢᓂ.

ᐃᓕᓐᓂᐊᕐᓂᕐᒧᑦ ᐊᐅᓚᑦᓯᔨᐅᔪᖅ ᐃᓕᓐᓂᐊᖅᑎᑦᓯᖃᑕᐅᖃᑦᑕᖅᖢᓂᓗ ᓯᕗᓪᓕᖅᐸᐅᑉᓗᓂ ᑏᕕᑦ ᑲᓛᒃ ᐅᖃᓚᐅᖅᐳᖅ ᐱᓕᕆᔨᑖᓚᐅᕐᒪᑕ ᒪᒃᑯᒃᑐᓂᒃ ᐃᑲᔪᕈᓐᓇᕋᔭᖅᑐᓂᒃ ᐱᓇᓱᐊᕈᓯᒥ ᐃᓕᓐᓂᐊᖅᑎᑎᓯᖃᑕᐅᑉᓗᑎᒃ.

“ᒪᒃᑯᖕᓂᖅᓴᐃᑦ ᓯᕗᓕᖅᑎᐅᔪᑦ ᐃᑲᔪᓚᐅᖅᑐᑦ ᐊᐅᓪᓛᖅᑎᑦᓯᑎᓪᓗᑕ ᐃᓕᓐᓂᐊᖅᑐᓂᒃ ᐃᓕᓐᓂᐊᕐᕕᒡᔪᐊᒥᑦ ᐃᓕᓐᓂᐊᕌᓂᓵᕐᒪᑕ ᑕᒪᒃᑯᐊ ᑕᑯᑉᓗᒋᑦ ᓴᕆᒪᓇᑦᓯᐊᖅᐳᑦ, ᐱᓗᐊᖅᑐᒥᒃ ᐊᒥᓱᑦ ᐃᓚᐅᓯᒪᖕᒪᑕ ᐃᓕᓐᓂᐊᖅᑎᑦᓯᖃᑕᐅᓂᕐᒧᑦ ᐅᑭᐅᓄᑦ ᐱᖓᓱᓄᑦ ᐊᒻᒪ ᐃᑲᔪᖅᖢᑎᒡᓗ ᐊᐅᓚᑕᐅᓂᖓᓄᑦ ᑕᒪᓐᓇ ᐱᐅᑦᓯᐊᖅᖢᓂ,” ᐅᖃᓚᐅᖅᐳᖅ ᑲᓛᒃ.

ᐃᓕᓐᓂᐊᕐᕕᒃ ᐱᐊᓂᓚᐅᖅᐳᖅ ᐱᓐᖑᐊᖅᑎᑕᐅᓚᐅᖅᖢᑎᒃ ᓄᖅᑲᕈᑎᒥᒃ ᓴᓇᑦᑕᐃᓕᐊᕈᓯᕐᒥ, ᐊᒃᑐᐱᕆ 21-ᒥ. ᐱᓇᓱᐊᕈᓯᖅ ᐱᕙᓪᓕᐊᑎᓪᓗᒍ, ᐱᓐᖑᐊᖅᑎᑦ ᐱᓐᖑᐊᕈᑎᓂᒃ ᐅᑕᕿᖑᓕᓚᐅᖅᐳᑦ ᕿᓚᓈᖅᖢᑎᒃ.

“ᐃᓕᓐᓂᐊᕈᒪᑦᓯᐊᓚᐅᕐᒪᑕ ᖁᕕᐊᓱᐃᓐᓇᓚᐅᖅᖢᑎᒡᓗ ᐱᓇᓱᐊᕈᓯᓗᒃᑖᖅ,” ᐅᖃᓚᐅᖅᐳᖅ ᑲᓛᒃ.

“ᕼᐋᑭᖅᑐᓕᕆᓂᖅ ᐊᔪᖏᓴᕈᑕᐅᕙᓪᓕᐊᑐᐃᓐᓇᖅᐳᖅ ᓯᐊᕐᕆᔮᕐᓂᕐᒧᑦ ᐃᓕᓐᓂᐊᖅᑎᑕᐅᒍᑕᐅᑉᓗᓂᓗ ᑕᐃᒪᓐᓇ ᒪᓕᒃᓴᖅᓯᒪᕗᒍᑦ ᐱᕙᓪᓕᐊᑎᑦᓯᑉᓗᑕᓗ ᐱᓐᖑᐊᖅᑎᓂᒃ.”

ᑲᓛᒃ ᐅᖃᓚᐅᖅᐳᖅ ᐃᓕᓐᓂᐊᖅᑎᑎᔪᑦ ᐅᖃᐅᓯᖃᓗᐊᖃᑦᑕᖏᑉᐳᑦ ᐸᕐᓇᒃᓯᒪᒍᑎᒃᓴᓂᒃ ᐅᕙᓘᓐᓃᑦ ᖃᓄᐃᓕᐅᕈᑕᐅᒋᐊᖃᖅᑐᓂᒃ ᐱᓇᓱᐊᕈᓯᒥ, ᑭᓯᐊᓂ ᐱᓕᕆᐊᖃᖃᑦᑕᕐᓂᖅᓴᐅᑉᓗᑎᒃ ᐊᑕᐅᓯᐅᓈᖅᖢᒋᑦ ᐃᓕᓐᓂᐊᖅᑎᑎᓂᕐᒥᒃ, ᑕᒪᕐᒥᒃ ᑕᐱᕇᖏᓪᓗᑎᒃ.

“ᐃᓕᓐᓂᐊᖅᑎᑎᓂᖅ ᐱᔾᔪᑎᖃᖅᐳᖅ ᐊᑐᓂ ᑕᒪᕐᒥᒃ ᐱᓐᖑᐊᖅᑎᑦ ᐃᓚᐅᔪᑦ ᐊᔪᖏᓕᖅᑎᑕᐅᓂᖅᓴᐅᖁᑉᓗᒋᑦ,” ᐅᖃᓚᐅᖅᐳᖅ. “ᑕᐃᒪᓐᓇ ᐱᓕᕆᐊᖃᕐᓂᐊᖅᐳᑦ ᑕᐱᕇᒡᓗᑎᒃ ᖃᓄᐃᓕᐅᕆᐊᖃᕐᓂᖏᓐᓄᑦ ᐱᓐᖑᐊᖃᑕᐅᓕᕌᖓᒥᒃ, ᑖᓐᓇ ᐃᓕᓐᓂᐊᕐᓂᖅ ᐱᔾᔪᑎᖃᖅᑎᓪᓗᒍ ᐊᔪᖏᓴᕐᓂᕐᒧᑦ.”

ᑲᓛᒃ ᐅᖃᓚᐅᖅᐳᖅ ᑮᓇᐅᔭᖅᑖᕋᓱᐊᒃᑲᓐᓂᕐᓂᐊᕋᒥ ᓯᕗᓂᒃᓴᐅᓂᐊᖅᑐᒥ ᑕᐃᒪᓐᓇ ᐃᓕᓐᓂᐊᖅᑎᑎᒍᒪᒃᑲᓐᓂᖅᖢᓂ.

“ᐅᑉᓗᕈᒥᑕᕐᓇᐅᓇᔭᖅᑐᒥᒃ ᐃᓚᓕᐅᔾᔨᒍᒪᕗᖓ ᐊᒃᓱᕈᕐᓇᖃᑦᑕᕐᒪᑦ ᐊᖓᔪᖄᕆᔭᐅᔪᓄᑦ, ᐱᓐᖑᐊᖅᑎᓄᓪᓗ, ᐅᑉᓗᕈᒥᑕᕐᓇᖏᑦ ᐊᔾᔨᒌᒃᑎᑕᐅᖃᑦᑕᖏᒻᒪᑕ ᐃᑲᕋᖏᑦ. ᑕᒪᓐᓇ ᐱᕙᓪᓕᐊᒍᒪᑉᓗᒍ 2018-ᒥ ᐃᓕᓐᓂᐊᖅᑎᑦᓯᓕᕈᑉᑕ,” ᐅᖃᓚᐅᖅᐳᖅ. “ᓄᓇᑉᑎᓐᓂ ᑕᐃᒪᓐᓇ ᐃᓕᓐᓂᐊᖅᑎᑎᓂᖅ ᑭᓯᐊᓂ ᐱᒋᐊᖅᑎᑕᐅᔪᓐᓇᖅᐳᖅ. ᑕᒪᒃᑯᐊ ᑕᒪᕐᒥᒃ ᐃᓕᓐᓂᐊᕆᐊᖃᑕᐅᓯᒪᔪᑦ ᑲᖏᖅᖠᓂᕐᒥᐅᑕᐅᖕᒪᑕ, ᓴᕆᒪᒋᑦᓯᐊᖅᖢᒍᓗ ᑕᐃᒪᓐᓇ ᐅᖃᖅᖢᖓ. ᑕᒪᓐᓇ ᐱᒋᐊᖅᑕᐅᓯᒪᑉᓗᓂ ᓴᓇᔭᐅᓯᒪᑉᓗᓂᓗ ᑲᖏᖅᖠᓂᕐᒥ ᐊᐅᓚᑕᐅᑉᓗᓂ ᓄᓇᓕᖕᓂᒥᐅᓄᑦ ᑲᖏᖅᖠᓂᕐᒥᐅᓄᑦ, ᐊᒻᒪ ᑕᐃᒪᓐᓇ ᐃᖢᐊᕆᑉᓗᑎᒍᓗ.”

ᑲᖏᖅᖠᓂᕐᒥ ᕼᐋᑭᖅᑎᐊᓛᑦ ᑲᑐᔾᔨᖃᑎᒌᒃᑯᖏᑦ ᐋᑕᒻᑯᓐᓄᑦ ᐃᓕᓐᓂᐊᖅᑎᑎᔨᐅᓇᔭᖅᑐᒥᒃ ᕿᓂᖅᐳᑦ, ᑕᐃᒪᓐᓇ ᐅᖃᓚᐅᖅᐳᖅ, ᐃᓕᓐᓂᐊᖅᑎᑎᔨᑖᕆᐊᖃᓕᖅᖢᑎᒡᓗ ᐱᓇᓱᐊᕈᓯᖅ ᐊᓂᒍᓕᕐᒪᑦ.

“ᐃᓱᒫᓗᒍᑎᒋᕙᕋ, ᑕᐃᒪᓐᓇ ᐅᖃᕈᓐᓇᖅᐳᖓᓗ ᕼᐋᑭᕆᐊᕐᓂᐊᓕᕐᒥᖕᒪᑕ ᒫᓐᓇᓵᖑᓂᐊᖅᑐᒥ,” ᐅᖃᓚᐅᖅᐳᖅ ᑲᓛᒃ.

Leave a Comment:

Your email address will not be published. Required fields are marked *