ᓵᓚᒃᓴᑐᐃᓐᓇᕆᐊᖃᖅᐳᑦ

by Darrell Greer- January 11, 2018

ᖁᕕᐊᑦᓴᒃᐸᓪᓕᐊᕗᖅ ᐃᒡᓗᓕᒑᕐᔪᖕᒥ ᑲᖏᖅᖠᓂᕐᒥᓗ ᓵᓚᒃᓴᐅᑎᖃᑕᐅᑐᐃᓐᓇᕆᐊᖃᕐᒪᑎᒃ Arctic Inspiration Prize (AIP) ᒥᒃ ᑕᒡᕙᓂ ᑕᖅᑭᒥ.

ᕕᒃᑐ ᓴᒻᒧᖅᑐᖅ ᐃᓕᓐᓂᐊᕐᕕᖓᓂ ᐃᓕᓐᓂᐊᖅᑎᑦᓯᔨ ᒋᓕᓐ ᐳᕈᑯᐸᐃᒃ ᐃᓕᓐᓂᐊᖅᑎᑦᓯᔪᖅ ᓕᓐᑕ ᑰᓕᒥᒃ ᑲᖏᖅᖠᓂᕐᒥᐅᑕᖅ ᖃᔭᓕᐅᕐᓂᕐᒥᒃ ᓯᑉᑕᐱᕆᐅᓚᐅᖅᑐᒥ ᐃᒡᓗᓕᒑᕐᔪᖕᒥ. ᐳᕈᑯᐸᐃᒃ ᐱᓕᕆᐊᖓ ᑭᖑᓪᓕᖅᐹᖅᓯᐅᓕᖅᐳᖅ ᓵᓚᒃᓴᐅᑎᖃᖃᑕᐅᓂᕐᒧᑦ ᑕᒡᕙᓂ Arctic Inspiration Prize−ᒧᑦ. ᓵᓚᒃᓴᖅᑐᑦ ᑐᓴᖅᑎᑕᐅᓂᐊᖅᖢᑎᒃ ᔭᓐᓄᐊᕆ 31-ᖑᓕᖅᐸᑦ.

ᑲᖏᖅᖠᓂᕐᒥ ᕼᐋᑭᕐᓂᕐᒧᑦ ᐃᓕᓐᓂᐊᖅᑎᑎᖃᑦᑕᖅᑐᑦ Rankin Rock Hockey Camp – ᐋᖅᑭᒃᓱᖅᑕᐅᓯᒪᔪᑦ ᓄᓇᓕᖕᓂ ᐱᓐᖑᐊᖅᑐᓕᕆᓂᕐᒧᑦ ᑐᑭᒧᐊᒃᑎᑎᔨᒧᑦ, ᑏᕕᑦ ᑲᓛᒃ − ᓵᓚᒃᓴᐅᑎᖃᑐᐃᓐᓇᕆᐊᖃᖅᐳᑦ $100,000ᓂᒃ, ᕕᒃᑐ ᓴᒻᒧᖅᑐᖅ ᐃᓕᓐᓂᐊᕐᕕᖓᓂ ᐃᓕᓐᓂᐊᖅᑎᑎᔨ ᒋᓕᓐ ᐳᕈᑯᐸᐃᒃ ᐋᖅᑭᒃᓯᓯᒪᑉᓗᓂ ᐃᓕᓐᓂᐊᖅᑎᑎᔨᐅᑉᓗᓂᓗ ᖃᔭᓕᐅᓂᕐᒧᑦ ᓵᓚᒃᓴᖃᑕᐅᑐᐃᓐᓇᕆᐊᖃᕆᑉᓗᓂ.

ᓵᓚᒃᓴᐅᑎᖃᖅᑐᑦ ᑐᓴᖅᑎᑕᐅᓂᐊᖅᖢᑎᒃ ᔭᓐᓄᐊᕆ 31-ᖑᓕᖅᐸᑦ.

ᐳᕈᑯᐸᐃᒃ ᐅᖃᓚᐅᖅᐳᖅ ᑕᒪᓐᓇ ᐱᓕᕆᐊᖅ ᑎᒃᑯᐊᖅᑕᐅᒍᑎᒋᓚᐅᖅᐸᖓ ᑖᓄ ᐊᒡᒐᖕᒧᑦ ᐱᓕᕆᖃᑎᖃᓚᐅᖅᑐᖅ ᐳᕈᑯᐸᐃᒃᒥᒃ ᖃᔭᓕᕆᓂᕐᒧᑦ ᐃᓕᓐᓂᐊᖅᖢᓂ ᒍᕇᑦ 6-ᒥ.

ᐅᖃᓚᐅᖅᐳᖅ ᐊᔾᔨᐅᖏᑦᑑᓚᐅᕐᓂᖓᓄᑦ ᓂᕈᐊᖅᑕᐅᑉᓗᓂ ᐃᓕᓐᓂᐊᖃᑕᐅᓚᐅᖅᓯᒪᔪᒧᑦ ᐃᓕᓐᓂᐊᕌᓂᒃᓯᒪᓕᖅᖢᓂᓗ ᖃᔭᓕᐅᕐᓂᕐᒧᑦ, ᐊᑯᓂ ᑕᐃᒪᓐᓇᐃᓕᐅᖅᓯᒪᓕᖅᖢᓂᓗ.

“ᑕᐃᒪᓐᓇ ᑕᒡᓕᑎᑐᑦ ᓂᕈᐊᖅᑕᐅᓂᖅ ᐱᓕᕆᐊᑉᑎᓐᓄᑦ − ᓄᓇᓕᖕᓂ ᐃᓱᒪᖃᖅᖢᓂ, ᐃᓱᒪᑦᓯᐊᖅᖢᓂᓗ, ᖃᔭᓕᕆᖃᑕᐅᓂᕐᒧᑦ ᐃᓕᓐᓂᐊᖃᑕᐅᓯᒪᑉᓗᓂᓗ, ᐅᒃᐱᕈᓱᒃᖢᓂᓗ, ᖃᐅᔨᒪᑉᓗᓂᓗ ᖁᕕᐊᓇᕐᓂᖓᓂᒃ − ᐃᓱᒪᒋᔭᐅᓐᓂᕋᑉᑕ ᐊᑎᕗᑦ ᐃᓕᔭᐅᑉᓗᓂ ᐅᐱᓐᓇᑦᓯᐊᖅᐳᖅ,” ᐅᖃᓚᐅᖅᐳᖅ ᐳᕈᑯᐸᐃᒃ.

“ᓵᓚᒃᓴᕐᓂᕈᑉᑕ, ᑮᓇᐅᔭᖃᓕᕐᓂᐊᖅᐳᒍᑦ ᑕᐃᒪᓐᓇᑎᒋ ᑮᓇᐅᔭᖃᓚᐅᖅᓯᒪᖏᑦᖢᑕ ᐅᑭᐅᓂ ᑕᐃᒪᖓᓂᑦ ᐊᐅᓪᓛᓕᓚᐅᖅᓯᒪᒐᑉᑕᓂᑦ.

“ᑕᒪᒃᑯᐊ ᓂᐱᐅᑎᑦ ᑎᖕᒥᒑᖃᑦᑕᖅᑐᓪᓗ ᓂᐱᐅᑎᑦ ᐊᐅᒃᑕᔫᑦ ᐊᑐᖅᓯᒪᓕᖅᐸᕗᑦ ᐊᑎᖏᓐᓂ ᖃᔭᐃᑦ ᑭᕕᑦᑕᐃᓕᖁᑉᓗᒋᑦ ᑕᐃᒪᓐᓇᐃᒋᐊᖃᕋᔭᖏᑉᐳᒍᑦ ᓵᓚᒃᓴᕐᓂᕈᑉᑕ.

“ᑕᒪᓐᓇ ᓵᓚᒃᓴᐅᑎᒃᓴᖅ ᐅᑭᐅᓄᑦ ᖁᓕᓄᑦ ᖃᔭᓕᕆᒍᑎᒋᔪᓐᓇᕋᔭᖅᐸᕗᑦ.”

ᐳᕈᑯᐸᐃᒃ ᐅᖃᓚᐅᖅᐳᖅ ᖁᒃᓴᓱᑦᓯᐊᕐᓂᐊᕋᒥ ᔭᓐᓄᐊᕆ 31-ᖑᓕᖅᐸᑦ, ᖃᔭᓕᕆᒍᑎᓂᒡᓗ − ᑕᒪᒃᑯᐊᓗ ᐃᒫᓃᒍᑎᑦ ᐊᒻᒪ ᐅᓗᕆᐊᓇᖅᑕᐃᓕᒍᑎᑦ ᐃᓕᓐᓂᐊᖅᑎᓄᑦ ᐊᑐᖅᑕᐅᓚᐅᖅᑐᑦ ᐃᓕᓐᓂᐊᖅᑎᑕᐅᑉᓗᑎᒃ − ᑕᐃᒪᓐᓇ ᓄᑖᓂᒃ ᓂᐅᕕᕐᓂᖅ ᐊᔪᕐᓇᖏᓐᓂᖅᓴᐅᓂᐊᓕᖅᐳᖅ ᑕᐃᒪᑐᖅ.

ᐅᖃᓚᐅᖅᖢᓂᓗ ᐊᑐᕚᓕᐊᕈᒪᓂᐊᕋᒥ ᐊᒻᒪ, ᓵᓚᒃᓴᐅᑎᖃᕈᒪᒐᓗᐊᖅᖢᓂ, ᑮᓇᐅᔭᓕᐅᕈᑎᒃᓴᖃᒃᑲᓐᓂᕈᒪᑉᓗᓂ ᐱᕈᖅᐸᓪᓕᐊᑎᑕᐅᔪᒃᓴᓂᒃ ᑕᐃᒪᓐᓇ ᓵᓚᒃᓴᖏᓐᓂᖅᐸᑕ.

“ᑕᐃᑲᓂ ᓵᓚᒃᓴᐅᑎᒃᓴᓂ ᐱᓕᕆᔨᑦ ᐊᓯᖏᓐᓄᑦ ᑎᒥᐅᔪᓄᑦ ᑐᕌᖅᑎᑦᓯᓇᓱᐊᕐᒪᑕ ᐅᕙᑉᑎᓐᓂᒃ ᐅᕙᓘᓐᓃᑦ ᐃᓄᖕᓄᑦ ᑮᓇᐅᔭᖃᖅᑎᑦᓯᒍᓐᓇᖅᑐᓄᑦ ᓵᓚᒃᓴᖏᓐᓂᕈᑉᑕ, ᑕᐃᒪᓐᓇ ᐃᖢᐊᖅᓯᕚᓪᓕᒍᑕᐅᔪᓐᓇᕋᔭᖅᖢᓂ.

“ᑭᓯᐊᓂ, ᒫᓐᓇᐅᓂᖓᓂ, ᑲᔪᓯᑦᓯᐊᕋᓱᐊᖅᐳᖓ ᑕᐃᒪᑐᖅ ᑲᔪᓯᑦᓯᐊᕐᓂᐊᖅᐳᒍᑦ.”

ᑲᓛᒃ ᑕᐃᒪᓐᓇᑦᑕᐅᖅ ᓵᓚᒃᓴᕈᑎᖃᕈᒪᕗᖅ, ᑭᓯᐊᓂ ᐃᓱᒫᓗᒍᑎᖃᖏᑉᐳᖅ ᐱᓕᕆᐊᖃᓗᐊᒧᑦ ᐊᒥᓱᓂᒃ ᐱᓕᕆᐊᓪᓚᕆᖓᑕ ᓴᓂᐊᒍᑦ.

ᐅᖃᓚᐅᖅᐳᖅ ᑲᖏᖅᖠᓂᕐᒥᐅᑦ Rankin Rock Hockey Camp ᓂᕈᐊᖅᑕᐅᓚᐅᖅᖢᓂ ᓵᓚᒃᓴᐅᑎᒃᓴᒥᒃ ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᖏᓐᓄᑦ, ᑕᒪᒃᑯᐊ ᐱᓕᕆᐊᖃᖃᑕᐅᑉᓗᑎᒃ ᐊᓈᓇᐅᔪᒧᑦ ᕼᐋᑮᖅᑎᓄᑦ (ᑭᓕ ᒍᕌᒻ), ᓄᓇᕗᒥ ᐅᖃᓕᒫᕆᐅᖅᓴᓂᕐᒧᑦ ᑎᑎᕋᕆᐅᖅᓴᓂᕐᒧᓪᓗ ᑲᑎᒪᔨᖏᓐᓂᑦ, ᑕᒪᓐᓇ ᐱᓕᕆᐊᕆᔭᐅᖃᑕᐅᑉᓗᓂ ᓇᖕᒥᓂᖅ ᐱᓕᕆᐊᕆᒍᒪᓯᒪᑉᓗᓂᐅᒃ.

“ᐃᑐᐊᓇ (ᑯᓱᒐᒃ) ᐊᒻᒪ ᑭᓕ ᐱᓕᕆᐊᖃᒻᒪᕆᒃᓯᒪᖕᒪᑕ ᑕᒪᑐᒥᖓ,” ᐅᖃᓚᐅᖅᐳᖅ ᑲᓛᒃ.

“ᐊᒃᓱᕈᕐᓇᖅᑐᓕᕆᓯᒪᑉᓗᑎᒃ.”

2017-ᒥ ᐃᓕᓐᓂᐊᖅᑎᑎᔪᑦ ᐱᐊᓂᓵᕈᑎᖃᓚᐅᖅᐳᑦ ᐃᓕᓐᓂᐊᖅᑎᑎᒍᑎᒥᒃ ᐃᓱᓕᓚᐅᖏᓐᓂᖏᓐᓂ ᑖᒃᑯᐊ ᓵᓚᒃᓴᐅᑎᒃᓴᓕᕆᔨᒃᑯᑦ.

ᑲᓛᒃ ᐊᑯᓂ ᐃᑲᕋᓂ ᐱᓕᕆᓯᒪᕗᖅ ᐱᓇᓱᐊᕈᓯᓗᒃᑖᖅ ᐃᓕᓐᓂᐊᖅᑎᑎᖃᑕᐅᑉᓗᓂ, ᐊᒻᒪ ᖁᔭᓐᓇᒦᑦᓯᐊᖅᖢᓂ ᑯᓱᒐᕐᒥᒃ ᐊᒻᒪ ᒍᕌᒻᒥᒃ ᐱᓕᕆᓯᒪᓂᖏᓐᓄᑦ ᐃᑲᔪᖅᓯᒪᓂᖏᓐᓄᓪᓗ ᑕᒪᓐᓇ ᑐᒃᓯᕋᐅᑦ ᐱᐊᓂᒃᑕᐅᓚᐅᕐᓂᖓᓄᑦ.

ᐅᖃᓚᐅᖅᐳᑦ ᓵᓚᒃᓴᐅᑎᖃᖅᐸᑕ ᐊᖏᒡᓕᒋᐊᖅᑕᐅᓇᔭᖅᐳᖅ ᑲᖏᖅᖠᓂᕐᒥ ᐃᓕᓐᓂᐊᖅᑎᑎᖃᑦᑕᕐᓂᖅ, ᐊᒻᒪ ᑭᕙᓪᓕᕐᒥ ᓄᓇᓕᖕᓄᑦ ᐊᑐᖅᑕᐅᓕᕐᓗᓂ.

“ᑭᖑᓪᓕᖅᐹᖑᖃᑕᐅᓕᖅᐳᒍᑦ ᓵᓚᒃᓴᐅᑎᑖᕐᓂᕐᒧᑦ ᐊᒻᒪ, ᓵᓚᒃᓴᐅᑎᖃᕈᑉᑕ, ᐃᓕᓐᓂᐊᖅᑎᑎᓂᖅ ᐊᑐᕈᓐᓇᕋᔭᖅᐸᕗᑦ ᐊᕐᕕᐊᓂ ᖃᒪᓂ’ᑐᐊᒥᓗ.

“ᑕᐃᒪ, ᐱᖓᓱᓂᒃ ᐅᑭᐊᒃᓵᒃᑯᑦ ᐃᓕᓐᓂᐊᖅᑎᑎᖃᑦᑕᕋᔭᖅᐳᒍᑦ ᐱᖓᓱᓂ ᑭᕙᓪᓕᐅᑉ ᐃᓗᐊᓂ ᓄᓇᓕᖕᓂ, ᐱᓕᕆᐊᒃᓴᖃᖅᑐᒻᒪᕆᐅᓗᑕᓗ, ᖁᕕᐊᓱᑦᓯᐊᖅᐳᒍᓪᓗ ᑕᐃᒪᓐᓇᐃᓐᓂᕈᑉᑕ.

“ᑕᐃᒪᑐᖅ, ᑐᓴᖅᑎᑕᐅᓂᐊᖅᐳᒍᑦ ᑐᓴᕐᓂᖅᑐᓂᒃ ᑭᖑᓂᐊᓂ ᑕᖅᑭᐅᑉ ᖁᕕᐊᓇᖅᑐᓂᒃ ᐱᓕᕆᐊᕆᔪᓐᓇᖅᑕᑉᑎᓐᓂᒃ ᐱᒋᐊᕈᓐᓇᕐᓂᐊᕋᑉᑕ.

“ᖁᕕᐊᒋᔭᖃᖅᓗᑕᓗ ᕼᐋᑭᖅᑐᓕᕆᓂᕐᒥᒃ, ᐃᓕᓐᓂᐊᖅᑎᑎᒍᒪᑦᓯᐊᖅᖢᑕᓗ ᓄᑕᖃᓂᒃ ᕼᐋᑭᕐᓂᕐᒧᑦ ᐊᒻᒪ ᐃᓅᓯᕐᒧᑦ ᐃᓕᓐᓂᐊᕐᓂᕐᒧᑦ.”

ᑲᓛᒃ ᐅᖃᓚᐅᖅᐳᖅ ᐅᒃᐱᕈᓱᐃᓐᓇᖅᐸᒃᑲᒥ Rankin Rock Hockey Camp, ᕼᐋᑭᕐᓂᕐᒧᑦ ᐃᓕᓐᓂᐊᖅᑐᓂᒃ ᐊᒻᒪ ᑭᖑᓪᓕᖅᐹᖑᖃᑕᐅᑉᓗᓂ ᓵᓚᒃᓴᑐᐃᓐᓇᕆᐊᖃᕐᓂᕐᒧᑦ, ᑕᐃᒪᓐᓇ, ᓴᓐᖏᔪᒻᒪᕆᒃᑯᑦ ᐃᓕᑕᕆᔭᐅᒍᑕᐅᕗᖅ ᐱᓕᕆᐊᕆᔭᐅᔪᒧᑦ ᑕᒪᓐᓇᓗ ᐊᖏᒡᓕᕙᓪᓕᐊᑐᐃᓐᓇᖅᖢᓂ ᐱᐅᓯᕙᓪᓕᐊᑐᐃᓐᓇᖅᖢᓂᓗ, ᐊᒻᒪ ᐃᑲᔪᖅᐸᓪᓕᐊᑦᓯᐊᖅᖢᓂ ᑕᒪᐃᓐᓂᒃ ᓄᑕᖃᓂᒃ ᐊᔪᖏᓴᖅᑎᑕᐅᑉᓗᑎᒃ, ᑕᐃᒪᓐᓇ ᐱᒋᐊᕈᑕᐅᓚᐅᖅᓯᒪᖕᒪᑦ ᑕᐃᒪᓐᓇᐃᓕᐅᕆᒍᒪᑉᓗᓂ.

“ᐅᒃᐱᕈᓱᑦᓯᐊᖅᐳᖓ ᐃᖃᐃᓕᓴᐅᑎᑦ ᑕᐃᒪᓐᓇᐃᑦᑐᑦ ᐃᓅᓯᑉᑎᓐᓄᑦ ᐊᓯᔾᔨᕈᑕᐅᕙᖕᒪᑕ ᐃᖢᐊᕐᓂᖅᓴᒥᒃ ᐃᓅᓯᖃᕈᓐᓇᕈᒪᑉᓗᑕ ᐅᑭᐅᖅᑕᖅᑐᒥ.

“ᐊᒻᒪ, ᑕᐃᒪᓐᓇ ᑕᒡᕙ, ᖁᔭᓐᓇᒦᕈᒪᕙᒃᑲ ᑕᒪᕐᒥᒃ ᒪᒃᑯᒃᑐᑦ ᓯᕗᓕᖅᑎᑦ ᐃᑲᔪᖅᓯᒪᖕᒪᑕ ᐱᕈᖅᐸᓪᓕᐊᑎᑕᐅᓂᖓᓄᑦ ᐅᑭᐅᖑᓯᒪᓕᖅᑐᓂ.

“ᑕᐃᒪᓐᓇ ᐱᕚᓪᓕᕈᑎᖃᕋᔭᖏᑉᐳᒍᑦ ᐃᑲᔪᖅᑕᐅᖏᓐᓂᕈᑉᑕ ᓄᑕᖃᓄᑦ ᑕᒪᒃᓄᖓ.”

Leave a Comment: