ᓱᓇᑐᐃᓐᓇᓕᕆᓂᒃᑯᑦ ᖃᓄᑐᐃᓐᓇᖅ ᓴᓇᐅᒐᖃᕐᓂᖅ ᐊᓯᖏᓐᓂᒡᓗ ᖃᐅᔨᓴᕈᑎᓕᕆᓂᖅ

by Darrell Greer- December 6, 2017

ᐃᓕᓐᓂᐊᖅᑎᑦ ᑑᒑᓕᒃ ᐃᓕᓐᓂᐊᕐᕕᒡᔪᐊᖓᓐᓂ ᖁᕕᐊᓱᓚᐅᖅᐳᖅ ᓄᑖᒥᒃ ᐱᓕᕆᐊᖃᓚᐅᕐᓂᕐᒧᑦ ᓄᑕᐅᖏᑦᑐᒥᒃ ᐱᓕᕆᐊᕆᔭᐅᓯᒪᔪᒥᑦ ᐱᓇᓱᐊᕈᓯᐅᓚᐅᖅᑐᒥ.

ᐃᓕᓐᓂᐊᖅᑎᑎᔨ ᑑᓂ ᑲᓚᓐᔅ, ᓴᐅᒥᐊᓂ, ᒋᐅᕆ ᓚᐅᓐᑕ, ᐳᕆᑕᓂ ᕼᐅᒻ ᐊᒻᒪ ᐱᐊ ᕋᐃᔭᓐ ᐆᒃᑐᖅᑐᑦ ᐃᓕᓐᓂᐊᖅᑎᑦ ᓴᓇᓂᐊᖅᑕᖏᓐᓂᒃ ᐃᓕᓐᓂᐊᕐᕕᐅᑉ ᐃᖃᐃᓕᓴᕐᕕᐊᓂ ᓱᓇᑐᐃᓐᓇᓕᕆᓂᕐᒥᒃ ᓵᓚᒃᓴᐅᑎᖃᑦᑕᐅᑎᓂᐊᖅᓗᑎᒃ ᑑᒑᓕᒃ ᐃᓕᓐᓂᐊᕐᕕᒡᔪᐊᖓᓂ ᓇᐅᔮᓂ ᓄᕕᐱᕆ 29-ᒥ.

ᑲᓇᑕᒥ ᐃᑲᔪᖅᑎᑦ ᐃᑲᔪᖅᑕᐅᒋᐊᖃᖅᑐᓂᒃ Actuaᑯᑦ ᐊᐅᓚᑦᓯᓂᐊᓕᖅᐳᖅ ᑲᒪᓂᐊᓕᖅᐳᑦ ᐊᕐᕌᒍᒥ ᓱᓇᑐᐃᓐᓇᓕᕆᓂᕐᒥᒃ ᓴᓇᐅᒐᖃᖅᑎᓪᓗᒋᑦ ᐊᓯᖏᓐᓂᒡᓗ ᓱᓇᑐᐃᓐᓇᓕᕆᒍᑎᓂᒃ ᓵᓚᒃᓴᐅᑎᖃᑦᑕᐅᑎᓗᑎᒃ. (ᓱᓇᑐᐃᓐᓇᓕᕆᓂᖅ, ᖃᕆᑕᐅᔭᓕᕆᓂᖅ, ᓴᓇᒪᔪᓕᕆᓂᖅ ᓇᓴᐅᑎᓕᕆᓂᕐᓗ).

ᑕᒪᓐᓇ ᐊᑐᖅᑕᐅᓚᐅᖅᑐᖅ ᓇᐅᔮᓂ ᐊᑎᖃᓚᐅᖅᖢᓂ Catch the Pollutants ᒍᕇᑦ 7-ᓂᑦ 8-ᓄᑦ ᐊᒻᒪ Wind Power ᒍᕇᑦ 9-ᓂᑦ 12-ᒧᑦ.

ᔨᓂᕗ ᓯᐱᓐᓱ ᐊᐅᓚᑦᓯᔨᒻᒪᕆᐅᖃᑕᐅᕗᖅ ᐃᓕᓐᓂᐊᖅᑐᓕᕆᓂᕐᒧᑦ ᖃᓄᐃᓕᐅᕈᑕᐅᔪᒃᓴᓕᕆᓂᕐᒧᓪᓗ ᑖᒃᑯᓄᖓ Actuaᑯᓐᓄᑦ. ᐅᖃᓚᐅᖅᐳᖅ ᑖᒃᑯᐊ Actua ᐱᓕᕆᓯᒪᓕᖅᖢᑎᒃ ᓄᓇᕗᒥ ᐅᑭᐅᓄᑦ 15ᓄᑦ ᐃᓕᓐᓂᐊᕐᕕᖕᓂ ᓱᓇᑐᐃᓐᓇᓕᕆᓂᕐᒧᓪᓗ ᖃᐅᔨᓴᕈᑎᓂᒃ ᐃᓕᓐᓂᐊᖅᑎᑦᓯᒍᑎᖃᖅᐸᒃᖢᑎᒃ ᐊᐅᓪᓛᖃᑎᖃᖅᐸᒃᖢᑎᒡᓗ ᐃᓕᓐᓂᐊᖅᑎᓂᒃ ᓄᓇᒧᑦ ᐃᓕᓐᓂᐊᖅᑎᑎᔭᖅᑐᖅᖢᑎᒃ. ᐅᖃᓚᐅᖅᐳᖅ Actuaᑯᑦ ᑕᒪᒃᑯᓂᖓ ᐱᓕᕆᐊᖃᕐᓂᐊᕐᒪᑕ ᐱᓇᓱᐊᕈᓯᓗᒃᑖᖅ ᐊᐅᔭᒃᑯᑦ ᐊᐅᓪᓚᖅᑎᑦᓯᓯᒪᓗᑎᒃ ᑕᒪᐃᓐᓂ ᓄᓇᕗᒥ ᓄᓇᓕᖕᓂ.

ᑕᐃᒪᓐᓇ ᐱᓕᕆᖃᑎᖃᖅᐸᓪᓕᐊᓯᒪᕗᒍᑦ ᐃᓕᓐᓂᐊᖅᑎᑎᔨᓪᓗ ᐊᒻᒪ ᐃᓕᓐᓂᐊᖅᑎᑎᓂᕐᒧᑦ ᐃᓕᓐᓂᐊᖅᑎᑦᓯᖃᑦᑕᖅᖢᑕ ᖃᓄᕐᓗ ᓱᓇᑐᐃᓐᓇᓕᕆᓂᕐᒧᑦ ᖃᐅᔨᓴᕈᑎᓕᕆᓂᖅ ᐊᒃᑐᐊᓂᖃᖁᓪᓗᒍ ᐃᓕᓐᓂᐊᕐᕕᖕᒧᑦ,” ᐅᖃᓚᐅᖅᐳᖅ ᓯᐱᓐᓱ.

ᖁᕕᐊᓱᒃᐳᒍᑦ ᑕᒪᓐᓇ ᐱᓕᕆᐊᕆᓂᐊᕋᑉᑎᒍᑦ ᐃᓕᓐᓂᐊᖅᑎᑎᔨᓪᓗ ᑕᐃᒪᓐᓇ ᓵᓚᒃᓴᐅᑎᖃᑦᑕᐅᑎᖃᑦᑕᕐᓂᖅ ᓴᓇᐅᒐᐊᖃᕐᓗᓂ ᓇᓂᑐᐃᓐᓇᖅ ᐱᖓᓱᓂ ᐊᕕᒃᑐᖅᓯᒪᔪᓂ ᓄᓇᓕᕐᔪᐊᓂ ᐊᑐᖅᑕᐅᖃᑦᑕᓕᖁᑉᓗᒍ.”

ᓯᐱᓐᓱ ᐅᖃᓚᐅᖅᐳᖅ Actua ᑲᑎᒪᑎᑦᓯᓚᐅᖅᐳᑦ ᓄᓇᕗᒥ ᐃᓕᓐᓂᐊᖅᑎᑎᔨᓂᒃ ᓄᓇᕗᒥ ᐅᐱᖔᖑᓚᐅᖅᑐᒥ, ᐱᓗᐊᖅᑐᒥᒃ ᑕᒪᒃᑯᐊ ᐃᓕᓐᓂᐊᖅᑎᑎᔨᑦ ᓱᓇᑐᐃᓐᓇᓕᕆᓂᕐᒧᑦ ᑲᑎᒪᔨᐊᓛᖑᖃᑕᐅᔪᑦ.

ᐅᖃᓚᐅᖅᓗᓂᓗ ᖃᓄᐃᓕᐅᕈᑎᒃᓴᓂᒃ ᐋᖅᑭᒃᓱᐃᓪᓗᑎᒃ, ᐃᓕᓐᓂᐊᕈᑎᓄᑦ ᐊᒃᑐᐊᑎᑦᖢᒋᑦ ᐃᓕᓐᓂᐊᖅᑎᑎᔨᓄᑦ ᐊᑐᒐᒃᓴᐃᑦ ᐊᒻᒪ, ᐊᕙᒧᒐᖃᑦᑕᐅᑎᓪᓗᑎᒃ ᐸᕐᓇᒃᓯᒪᒍᑕᐅᔪᓐᓇᖅᑐᒥᒃ ᐋᖅᑭᒃᓱᐃᓚᐅᖅᐳᑦ.

ᑕᐃᒪ 34−ᖑᖕᒪᑕ ᐃᓕᓐᓂᐊᕐᕕᑦ ᓄᓇᕗᒥ, ᑕᒪᐃᓐᓂᑦ ᐱᖓᓱᓂᑦ ᐊᕕᒃᑐᖅᓯᒪᔪᓂᑦ ᓄᓇᓕᕐᔪᐊᓂᑦ ᑕᐃᒪᓐᓇᐃᓕᐅᖃᑦᑕᖅᑐᑦ, 8 ᐃᓕᓐᓂᐊᕐᕕᑦ ᕿᑎᕐᒥᐅᓂ, 13 ᑭᕙᓪᓕᕐᒥ ᐊᒻᒪ 13 ᕿᑭᖅᑕᓂ,” ᐅᖃᓚᐅᖅᐳᖅ ᓯᐃᓐᓱ.

ᑕᐃᒪᓐᓇ ᖃᓄᐃᓕᐅᕈᑎᒃᓴᓂᒃ ᑕᒪᐃᓐᓄᑦ ᐃᓕᓐᓂᐊᖅᑎᓄᑦ ᐋᖅᑭᒃᓱᐃᓚᐅᖅᐳᒍ, ᐃᓕᓐᐊᓕᓵᖅᑐᓂᑦ ᒍᕇᑦ 12-ᒧᑦ, ᑕᓪᓕᒪᑦ ᓵᓚᒃᓴᐅᑕᐅᔪᓐᓇᖅᖢᑎᒃ.

ᑕᒪᓐᓇ ᖃᐅᔨᒍᑎᒋᓂᐊᖅᐸᕗᑦ ᒫᓐᓇᓵᖑᓂᐊᖅᑐᒥ ᕿᒥᕐᕈᓂᐊᖅᐸᕗᓪᓗ ᖃᓄᐃᓕᐅᕈᑕᐅᓯᒪᔪᑦ ᓵᓚᒃᓴᐅᑕᐅᓂᐊᖅᑐᑦ ᑕᑯᓐᓇᕐᓗᒋᑦ ᐊᑐᓂ ᓵᓚᒃᓴᐅᑎᖃᑦᑕᐅᑎᒍᑕᐅᔪᓂ ᓄᓇᓕᕐᔪᐊᒥ ᐊᒻᒪ ᑕᒪᐃᓐᓂ ᐱᖓᓱᓂ ᓄᓇᓕᕐᔪᐊᓂ ᐊᑐᓂ ᓵᓚᒃᓴᐅᑎᖃᑦᑕᐅᑎᒍᑎᑦ, ᑕᐃᒪᓐᓇᓗ.”

Leave a Comment:

Your email address will not be published. Required fields are marked *