ᒪᒥᐊᓇᖅ. ᐊᐱᖅᑯᑏᑦ ᑐᑭᓯᑦᑎᐊᖏᓐᓇᒃᑯ!

by Darrell Greer- March 9, 2018

ᐊᐱᕆᔭᐅᓚᐅᕋᒪ ᐱᓇᓱᐊᕈᓯᐅᓚᐅᖅᓯᒪᔪᒥᒃ ᑕᑯᒐᔪᖏᑦᑕᓐᓂᒃ ᐃᒻᒪᖄ ᐊᕐᕌᒍᑦ 15-ᐸᓗᖕᓂ ᐊᒻᒪᓗ ᐃᓱᒪᒃᑯᑦ ᐃᕼᐃᐊᕆᒐᓗᐊᖅᖢᒍ, ᑭᓯᐊᓂ ᐃᓗᒃᑯᑦ ᑭᐅᙳᐊᕈᓐᓇᓚᐅᖏᑦᑕᕋᓘᓐᓃᑦ.

Kivalliq News editor Darrell Greer

ᐅᔾᔨᕈᓱᙱᓐᓂᐅᓂᖅᓴᐅᖅᑰᔨᔪᖅ (ᖃᐅᔨᒪᙱᓐᓂᐅᔪᒥ) ᑭᓱᓕᒫᓂᑦ ᑎᑭᐅᑎᕙᓪᓕᐊᔪᒧᑦ ᑐᙵᓇᙱᑦᑐᐊᓗᖕᒥ, ᐊᐱᖅᑯᑎᖓ ᐱᑦᑎᐊᖏᓐᓇᓱᖅᑰᔨᖏᒃᑲᓗᐊᖅᖢᓂ.

ᐊᐱᖅᑯᑎ: ᖃᓄᐊᓗᒃ ᓱᓕ ᑕᒫᓃᑉᐳᖓ? ᐊᐱᖅᑯᑎ ᐃᓱᒪᒃᓴᖅᓯᐅᕈᓘᔭᕐᓇᓚᐅᖅᐳᖅ ᓇᒦᓂᑦ ᐃᓱᒪᒋᕈᓘᔭᖅᑕᓐᓂ ᐊᒻᒪ ᐅᒃᐱᕆᔭᓐᓂᑦ ᐃᒃᓯᓐᓇᐃᑦᑎᐊᖅᖢᖓ ᐊᒻᒪᓗ ᑭᐅᑦᑎᐊᕐᓂᖅᐹᖑᔪᓄᑦ

ᐃᖅᑲᖅᓴᖅᓯᐅᕐᓇᖅᖢᓂᓗ – 60-ᓂ ᐊᕐᕌᒍᓂᒃ ᐃᓕᓯᒪᔭᓐᓂᒃ, ᐊᑐᖅᓯᒪᔭᓐᓂᒃ ᐊᐱᖅᑯᑕᐅᕙᒃᓯᒪᔪᓪᓗ – ᐃᓱᒪᒋᔭᑐᐊᕆᔪᓐᓇᓚᐅᖅᐸᕋ ᖃᓄᖅ ᑐᑭᖃᕈᓐᓇᕐᒪᑦ?

ᖃᓄᖅ ᐊᐱᕆᓇᓱᒃᑲᕕᑦ? ᑕᐃᒪᓐᓇ ᑭᓯᐊᓂ ᑭᐅᔪᓐᓇᓚᐅᖅᐸᕋ. ᐅᐊᑲᓪᓚᖔ.

ᖃᓄᐃᓕᑳᓪᓚᖕᓂᐅᓚᐅᖅᑐᖅ ᑐᑭᓯᓇᖏᖦᖢᓂᓗ, ᑐᓐᓂᐊᓇᖅᓯᓚᐅᖅᐳᖅ, ᑎᑎᕋᕈᓘᔭᓲᖅᑐᓪᓗ ᐊᑐᓕᓚᐅᖅᐳᖓ – ᖃᓄᐃᓕᖓᖅᑲᐅᓂᑦᑎᓐᓂᒃ ᐃᓱᒪᒃᓴᖅᓯᐅᖅᑐᐊᓗᑐᐃᓐᓇᐅᓕᓚᐅᖅᐳᖓ ᐃᓱᒻᒫᓪᓚᒃᖢᖓᓗ ᑭᐅᑦᑎᐊᖏᓐᓂᓐᓄᑦ.

ᖃᐅᔨᓇᓱᒋᐊᖃᓕᖅᖢᖓ ᑭᓲᖕᒪᖔᑦ ᐃᓗᐊᖏᔾᔪᑎᒋᔭᕋ.

ᐊᒻᒪᓗ ᑕᐃᑲᓂ, ᕿᓚᒻᒥᑯᓘᒐᓗᐊᕐᒥ, ᓴᖅᑭᖦᖢᓂ ᑭᓇᓕᒫᒧᑦ ᑕᑯᔭᐅᔪᓐᓇᖅᖢᓂ, ᓴᙲᓐᓂᕆᓛᓐᓂᑦ ᐃᓱᓕᑦᑐᓐᓇᙱᑦᑐᒥ ᐅᓇ ᐱᔾᔪᑎᒋᓗᐊᖅᖢᓂᐅᒃ ᐃᓗᐊᖏᔾᔪᑎᒃᓴᕆᓚᐅᖏᓐᓇᒃᑯ.

ᓇᓗᓇᐃᖅᖢᓂ ᐃᕐᖐᓐᓇᖅ ᐃᓅᖃᓐᓂᕐᓂᐊᕈᒪᖃᑦᑕᕐᓂᓐᓄᑦ.

ᐅᖃᐅᓯᕆᒐᓛᑐᐃᓐᓇᕐᓗᒍ, ᐊᑲᐅᔫᓐᓃᖅᑎᑕᐅᓚᐅᕐᓂᓐᓂᒃ ᖃᓄᐃᑦᑑᓂᓐᓂ, ᑐᑭᓯᐅᒪᑦᑎᐊᖏᑦᑕᓐᓂᒃ ᖃᓄᖅᑑᑲᐃᓐᓇᕈᓐᓇᖏᔾᔪᑎᒋᓪᓗᒍ, ᐃᒃᐱᒋᔭᒃᑲᓗ ᖃᓅᖕᒪᖔᑕ ᑐᑭᓯᓇᒋᑦ ᓯᕐᓈᖅᑎᖃᕐᓇᖓ.

ᓇᐃᓈᕐᓗᒍ, ᐃᓗᐊᕈᓐᓃᖅᑎᑕᐅᓚᐅᕐᓂᓐᓂᒃ ᐃᒻᒥᓂᒃ ᖃᓄᐃᒋᙱᒃᑲᓗᐊᖅᑎᓪᓗᖓ.

ᐊᖑᒻᒪᑎᕈᓘᔭᖅᐸᒃᑐᖓ ᐊᑭᓕᖅᑕᐅᓚᐅᖅᑎᓐᓇᖓ ᓱᓕ, ᓈᓚᕋᕐᓈᕈᓘᔭᖅᖢᖓ ᑐᓴᕐᓂᕆᔭᓐᓂᒃ, ᖃᐅᔨᒪᓪᓗᖓ ᐅᖃᐅᓯᕆᔪᒪᔭᓐᓂᒃ ᓂᓪᓕᖅᑕᐃᓕᔪᓐᓇᕆᓪᓗᖓᓗ.

ᓇᒡᓕᒃᑎᒋᔭᖃᓗᐊᖅᐸᕐᓇᖓ, ᖃᐅᔨᒪᕗᖓ ᐃᓄᑑᖏᓐᓂᓐᓂ. ᐊᒻᒪᓗ ᐅᒃᐱᕐᓂᕆᔭᑐᐊᕋ ᖃᐅᔨᒪᔭᓐᓂᑦ ᐃᓗᐊᒍᑦ-ᖃᐅᔨᒪᓂᐅᔪᒥ ᓵᓚᒃᓴᖅᑐᖃᕐᓂᐊᖅᐸᑦ ᐅᕙᖓᐅᔾᔮᖏᓐᓂᖓᓂᒃ.

ᓱᓕᓪᓗᖓ ᐅᖃᕈᓐᓇᖅᐳᖓ, ᐃᒻᒥᓂᑐᐊᖅ ᐃᓱᒪᒋᒐᔪᙱᓐᓇᒪ ᐃᓅᓯᓕᒫᓐᓂᒡᓗ ᑐᑭᓯᔾᔮᓇᒍ ᑕᐃᒪᓐᓇ.

ᐃᖅᑲᓇᐃᔮᕋᓗ ᖁᕕᐊᒋᔭᕋ ᓱᓕ, ᕼᐋᑭᖅᑐᓃᑦᑐᒪᐃᓐᓇᐅᒐᒪ ᑲᖏᖅᖠᓂᕐᒦᖏᓐᓇᕈᒪᓪᓗᖓᓗ. ᐅᐊᑲᓪᓚᖔ. ᐊᖏᕐᕋᕆᒐᒃᑯ.

ᐊᑲᐅᒋᕙᖏᑦᑕᕋ ᐊᐱᕆᔭᐅᒐᔪᖕᓂᓐᓄ ᐅᓄᖅᑐᓄᑦ ᑭᓱᒥᒃ ᑐᑭᓯᖏᒻᒪᖔᕐᒪ. ᑲᖏᖅᖠᓂᕐᒥᐅᑦ ᑭᕙᓪᓕᕐᒥᐅᓪᓗ ᐊᔾᔨᖃᕐᒪᖔᑕ ᓄᓇᓕᖕᓂ ᐊᓯᖏᓐᓂ. ᐱᖅᑯᓯᖏᑦ ᐊᔾᔨᒋᖏᑉᐸᖐᑦ? ᓲᖃᐃᒻᒪ, ᑭᓯᐊᓂ ᓂᕆᑎᑕᐅᔾᔮᖏᒃᑯᒪ ᑐᒃᑑᑉ ᐅᔨᖓᓂᒃ, ᓂᕆᑎᔾᔮᖏᓐᓇᒃᑭᑦ ᕼᐋᒋᔅᒥ ᐱᔪᒪᖏᓪᓚᒃᑲᓗᐊᕈᕕᑦ.

ᖃᓄᐃᖅᑰᔨᖏᑦᑐᖅ ᐅᕙᓐᓄᑦ.

ᐱᐅᓂᖅᓴᐅᓂᕐᒨᖔᖏᑦᑐᖅ. ᐃᒪᓐᓇᐅᖔᖅᑐᖅ, ᐊᑲᐅᒋᖃᑦᑕᐅᑎᖏᑦᑕᑦᑎᓐᓂᒃ ᕿᓂᙱᖔᕐᓗᑕ. ᓱᕙᓕᑭᐊᖑᕗᖅ ᐱᐅᒋᖃᑦᑕᐅᑎᖏᑦᑕᑦᑎᓐᓂ ᕿᓂᕈᑦᑕ ᐱᑕᖃᖏᑦᑐᒥ. ᐃᕿᐊᓇᕐᒪᑦ ᖃᐅᔨᓪᓗᓂᓗ ᐊᑭᕋᖅᑑᑎᓂᖅᑕᖃᖅᑎᓪᓗᒍ ᐋᖅᑭᐅᒪᔪᖃᔾᔮᖏᓚᖅ, ᐱᓇᓱᖕᓂᖅᑕᖃᕈᓐᓃᕐᓗᓂᓗ.

ᖄᖓᒍᑦ, ᓱᖁᑎᒋᑐᐃᓐᓇᕈᓐᓃᕐᓂᕐᒨᖓᖏᑦᑐᖅ. ᐊᖏᖅᓯᒪᓂᕐᒨᖓᕗᖅ. ᐅᖃᕈᓐᓇᑦᑎᐊᖅᐳᖓ ᑲᖏᖅᖠᓂᕐᒦᓯᒪᓕᖅᑎᓪᓗᖓ 20-ᓂ ᐊᕐᕌᒎᓪᓗᐊᖅᑐᓂᒃ ᖃᓄᐃᑦᑑᓂᓐᓂᒃ ᓂᓪᓕᖅᑐᖃᓚᐅᖅᓯᒪᖅᑰᔨᖏᓐᓂᖓᓂᒃ.

ᓴᖅᑭᑕᐃᓐᓇᕈᓗᒃᑲᓐᓂᖅᐸᖅᑲᐃ ᓲᕐᓗ 2033-ᒥ, ᓴᖅᑭᑦᑐᖃᑕᐃᓐᓇᓛᖅᐳᖃᐃ ᑲᖏᖅᖠᓂᕐᒥ ᓈᒻᒪᒋᖏᑦᑕᓐᓂ.

ᖁᕕᐊᒋᑐᐃᓐᓇᓕᖅᐸᕋ ᒫᓐᓇ ᐊᐱᖅᑯᑎᖓ ᐃᓱᒫᓗᒋᖏᓐᓇᒃᑯ. ᐃᒪᓐᓇᓪᓚᕆ.

Leave a Comment: