ᑮᓇᐅᔭᖅᑖᖅᑎᑕᐅᔪᑦ ᐃᒡᓗᓕᒑᕐᔪᖕᒥᐅᑦ ᖃᔭᓕᐅᕐᓂᕐᒧᑦ ᐃᓕᓐᓂᐊᕈᑎᒃᓴᓂᒃ

by Darrell Greer- February 8, 2018

ᑭᕙᓪᓕᕐᒥᐅᑦ ᓵᓚᒃᓴᐅᑎᖃᓚᐅᖅᐳᑦ Arctic Inspiration Prize (AIP)ᓂᒃ ᑐᓂᐅᖃᐃᑎᓪᓗᒋᑦ ᐊᑐᕚᒥ ᔭᓐᓄᐊᕆ 31-ᖑᓚᐅᖅᑐᒥ.

ᑏᕕᑦ ᑲᓛᒃ ᑲᖏᖅᖠᓂᕐᒥᐅᑕᖅ ᖁᖓᑦᓯᐊᖅᑐᖅ ᑮᓇᐅᔭᒃᓴᒥᒃ ᑕᑯᑎᑦᓯᑉᓗᓂ $80,000−ᓂᒃ ᑲᖏᖅᖠᓂᕐᒥ ᕼᐋᑭᕐᓂᕐᒧᑦ ᐃᓕᓐᓂᐊᖅᑎᑎᒍᑎᒃᓴᑦ ᑕᒡᕙᓂ ᐊᑐᕚᒥ ᐃᓕᑕᕆᔭᐅᒍᓯᐊᓚᐅᖅᑎᓪᓗᒋᑦ Arctic Inspiration Prizeᒥᒃ ᔭᓐᓄᐊᕆ 31-ᒥ.

ᒋᓕᓐ ᐳᕈᑯᐸᐃᒃ ᓯᕗᓕᖅᑎᒋᔭᐅᑉᓗᓂ ᖃᔭᓕᐅᕐᓂᕐᒧᑦ ᐃᒡᓗᓕᒑᕐᔪᖕᒥ ᐱᑎᑕᐅᓚᐅᖅᐳᑦ $140,000−ᓂᒃ ᖃᔭᓕᐅᕈᑕᐅᔪᒃᓴᐃᑦ, ᐊᒻᒪ ᓇᓚᐅᑦᓵᖅᑕᐅᓚᐅᕐᒪᑦ ᔭᓐᓄᐊᕆ 31-ᒥ ᑭᕙᓪᓕᕐᒥ ᓂᐱᕗᒃᑯᑦ, ᑏᕕᑦ ᑲᓛᒃᒧᑦ ᓯᕗᓕᖅᑎᒋᔭᐅᑉᓗᓂ ᑲᖏᖅᖠᓂᕐᒥᐅᑦ ᕼᐋᑭᕐᓂᕐᒧᑦ ᐃᓕᓐᓂᐊᖅᑎᑎᖃᑦᑕᖅᑐᑦ Rankin Rock Hockey Camp ᐱᑎᑕᐅᓚᐅᖅᖢᑎᒃ $80,000.

ᑲᑎᑦᖢᒋᑦ, ᑖᒃᑯᐊ ᑐᓂᐅᖃᐃᖃᑦᑕᖅᑐᑦ AIP ᑐᓂᓯᓚᐅᖅᐳᑦ $2.4 ᒥᓕᔭᓐᑖᓚᓂᒃ 8−ᓄᑦ ᑕᐱᕇᓄᑦ ᐅᑭᐅᖅᑕᖅᑐᒥᐅᓄᑦ ᐱᓇᓱᐊᕈᓯᐅᓚᐅᖅᑐᒥ.

ᐳᕈᑯᐸᐃᒃ ᐅᖃᓚᐅᖅᐳᖅ ᖃᔭᓕᐅᕐᓂᖅ ᑐᓴᖅᑎᑕᐅᒍᑕᐅᑎᓪᓗᒍ ᓵᓚᒃᓴᕐᓂᖏᓐᓄᑦ, ᐅᖃᓪᓚᒐᓱᐊᖅᖢᓂ ᕿᐊᓯᓚᐅᖅᐳᖅ, ᑭᓯᐊᓂ ᐅᖃᓪᓚᒐᓱᐊᕋᓗᐊᖅᖢᓂ ᕿᐊᓕᓚᐅᖅᐳᖅ.

ᐅᖃᓚᐅᖅᐳᖅ ᐊᔪᖏᓴᓚᐅᖅᖢᓂ ᖃᓄᐃᓕᐅᕐᓂᐊᕐᒪᖔᕐᒥ ᐊᕙᑎᖏᖅᑕᖅᖢᓂ ᐃᓚᖏᑦ ᐅᖃᐅᓯᕆᔭᖏᑦ ᕿᐊᒍᑎᒋᓚᐅᖅᖢᓂᒋᑦ.

“ᐅᖃᐃᓐᓇᕋᓗᐊᖅᖢᖓ ᐃᖕᒥᓄᑦ ᐊᔪᖏᑦᓯᐊᕋᒪ ᐅᖃᓪᓚᒍᓐᓇᖅᖢᖓᓗ ᐃᓄᖕᓄᑦ ᓵᖓᓗᖓ, ᑕᒃᐸᐅᖓᐅᓪᓗᖓ ᕿᐊᓯᑉᓗᖓᓗ,” ᐅᖃᓚᐅᖅᐳᖅ ᐳᕈᑯᐸᐃᑦ.

“ᕿᐊᓚᐅᖅᐳᖓᓗ, ᑏᕕᑦ ᑲᓛᒃ ᕿᐊᓯᓚᐅᕐᒪᑦᑕᐅᖅ ᐅᖃᓪᓚᒃᖢᓂ, ᐅᕙᒻᓂᑦ ᓯᕗᓪᓕᐅᓚᐅᖅᖢᓂᓗ.”

ᐳᕈᑯᐸᐃᒃ ᐅᖃᓚᐅᖅᐳᖅ ᖁᕕᐊᓱᓚᐅᕋᒥ ᓵᓚᒃᓴᐅᑎᖃᕋᒥᒃ, ᐃᖢᐊᖅᓴᓚᐅᖏᒃᑲᓗᐊᖅᖢᓂ ᐃᓚᖏᑦ ᑕᐱᕇᖑᖃᑕᐅᔪᑦ (ᔪᓖᓐ ᐃᐱᐊᒃ ᐊᒻᒪ ᐋᓇ ᓖᔅᒪᓐ) ᐱᑕᖃᓚᐅᖏᒻᒪᑎᒃ.

ᐅᖃᓚᐅᖅᖢᓂᓗ ᐃᐱᐊᒃ ᐊᒻᒪ ᓖᔅᒪᓐ ᓄᖅᑲᖓᔪᓐᓇᓚᐅᖏᒻᒪᑕ ᕕᒃᑐ ᓴᒻᒧᖅᑐᖅ ᐃᓕᓐᓂᐊᕐᕕᖓᓐᓂᑦ ᐊᐅᓪᓚᖃᑕᐅᔪᓐᓇᓚᐅᖏᑉᐳᑦ.

“ᑕᑯᑐᖅᖢᒋᑦ ᐊᓯᖏᑦ ᑐᓂᔭᐅᓚᐅᖅᑐᑦ 15-ᓂᒃ ᐃᓄᖕᓂᒃ ᑎᑭᑎᑦᓯᖃᑕᐅᓚᐅᕐᒪᑕ ᑕᐅᓄᖓ, ᐊᕙᓪᓗᐊᖏᑦ ᐃᒡᓗᓕᒑᕐᔪᖕᒦᓚᐅᖅᖢᑎᒃ ᐋᓇ, ᔪᓖᓐ ᐊᒻᒪ ᐃᓐᓇᑐᖃᖅ ᓴᐃᒪᓐ ᐊᒡᒐᒃ, ᐋᓐᓂᐊᕐᕕᓕᐊᕆᐊᖃᓚᐅᖅᖢᓂ.

“ᐅᐱᓐᓇᑦᓯᐊᖅᐳᖅ ᐅᑭᐅᓂ 14-ᓂ, ᐱᑎᑕᐅᓚᐅᕋᑉᑕ ᑮᓇᐅᔭᓂᒃ ᑐᖔᓂ $110,000 ᑲᑎᑦᖢᒋᑦ ᐅᑉᓗᒥᒧᑦ ᑎᑭᑦᖢᒍ, ᐊᖏᔪᒥ ᑮᓇᐅᔭᖅᑖᖅᑎᑕᐅᓚᐅᖅᐳᒍᑦ ᑕᒪᓐᓇ ᖃᔭᓕᐅᕐᓂᖅ ᐱᓕᕆᐊᕆᔭᐅᒃᑲᓐᓂᖁᑉᓗᒍ.

“ᓂᑲᓪᓗᖓᓚᐅᖅᐳᖓ ᐃᓗᒃᑯᑦ ᑕᒪᒃᑯᐊ ᐊᕙᖏᑦ ᐃᑲᔪᖃᑕᐅᕐᔪᐊᓚᐅᖅᑐᑦ ᑎᑭᖃᖁᑕᐅᓚᐅᖏᒻᒪᑕ.

“ᖃᐅᔨᓚᐅᖅᐳᖓᓗ ᐃᓕᓐᓂᐊᕐᕕᖕᒦᓐᓂᖅ ᐃᓕᓐᓂᐊᖅᑎᑕᐅᓂᕐᓗ ᐱᒻᒪᕆᐅᖕᒪᑕ ᑭᓯᐊᓂ ᑕᐃᒪᓐᓇ ᐅᓐᓄᖃᓚᐅᖅᓯᒪᓂᐊᖏᑉᐳᒍᑦ ᖁᕕᐊᓇᑦᓯᐊᓚᐅᕐᒪᑦ ᓵᓚᒃᓴᐅᑎᖃᖅᖢᓂ.”

ᐳᕈᑯᐸᐃᒃ ᐅᖃᓚᐅᖅᐳᖅ ᑖᒃᑯᐊ ᑮᓇᐅᔭᑦ $140,000 ᖃᔭᓕᐅᕈᑕᐅᔪᓐᓇᕐᓂᐊᖅᐳᑦ ᐅᑭᐅᓄᑦ ᖁᓕᓄᑦ.

ᐅᖃᓚᐅᖅᖢᓂᓗ ᐅᑭᐅᓂ ᐊᓂᒍᖅᓯᒪᓕᖅᑐᓂ ᓂᐅᕕᖃᑦᑕᖅᓯᒪᕗᖅ ᓂᐱᐅᑎᓂᒃ ᑕᒪᒃᑯᐊ ᓄᑕᖃᑦ ᐃᒫᓃᒍᑎᖏᑦ ᐊᖕᒪᔪᖃᓕᕐᒪᑕ ᓂᐅᕕᕈᓐᓇᕐᓂᐊᓕᖅᖢᓂᓗ ᐃᒫᓃᒍᑎᓂᒃ 40-ᓂᒃ ᓄᑖᓂᒃ.

“ᖁᕕᐊᓇᑦᓯᐊᖅᐳᖅ ᑮᓇᐅᔭᖅᑖᖅᑎᑕᐅᑉᓗᓂ ᑕᐃᒪᓐᓇ.

“ᑕᒪᑉᑕ ᑕᐅᓄᖓᐅᓚᐅᖅᑐᒍᑦ ᖁᕕᐊᓱᑦᓯᐊᓚᐅᖅᐳᒍᑦ, ᑭᓯᐊᓂ, ᐃᓱᒪᓚᐅᖅᐳᖓ, ᖁᕕᐊᓇᕐᓂᖅᓴᐅᒐᔭᓚᐅᕐᓂᖓᓄᑦ ᑕᒪᕐᒥᒃ ᐃᓚᒋᔭᐅᔪᑦ ᖃᐃᖃᑕᐅᓚᐅᕐᓂᖅᐸᑕ.

“ᑕᐃᒪᓐᓇ ᐃᓕᓐᓂᐊᖅᑎᑎᒍᑕᐅᔪᓐᓇᖅᑐᑦ, ᐊᒻᒪ ᒫᓐᓇᑲᐅᑎᒋ, ᐃᓕᑕᕆᔭᐅᑉᓗᓂᓗ ᐱᓕᕆᐊᒧᑦ, ᐃᓕᑕᕆᔭᐅᒍᒪᑉᓗᓂᓗ ᑕᒪᑐᒧᖓ.

“ᑕᐃᒪᓐᓇᐃᓕᐅᖃᑦᑕᕋᑉᑕ ᑭᓇᐅᓂᕗᑦ ᒪᓕᒃᖢᒋᑦ ᓱᓇᓂᒡᓗ ᐱᓕᕆᐊᖃᕈᒪᑉᓗᑕ ᐊᒻᒪ, ᓲᖃᐃᒻᒪ, ᓄᑕᖃᑦ ᐃᑲᔪᖅᑕᐅᖁᑉᓗᒋᑦ; ᐅᖃᐅᑎᔭᐅᑉᓗᓂᓗ ᐱᑦᓯᐊᕐᓂᑉᑎᓐᓄᑦ ᐃᑲᔪᕈᒪᑉᓗᑕᓗ, ᑕᒪᒃᑯᐊ ᑐᓴᖅᑕᐅᒐᔪᖃᑦᑕᖏᒻᒪᑕ ᓄᓇᖃᖅᖢᓂ ᐅᑭᐅᖅᑕᖅᑐᒥ.”

ᐳᕈᑯᐸᐃᒃ ᐅᖃᓚᐅᖅᐳᖅ ᕕᒃᑐ ᓴᒻᒧᖅᑐᖅ ᐃᓕᓐᓂᐊᕐᕕᖓ ᒥᑭᖕᒪᑦ ᖃᔭᓕᐅᕐᓂᕐᒧᑦ ᐃᓕᓐᓂᐊᕈᑎᑦ ᐱᑕᖃᕋᓗᐊᖅᑎᓪᓗᒋᑦ ᖁᒡᕙᕆᐊᕈᑕᐅᑎᓪᓗᒋᓪᓗ ᐃᓕᓐᓂᐊᕈᑎᖏᓐᓄᑦ ᑕᐃᒪᓐᓇ ᐃᓕᓐᓂᐊᕈᑕᐅᖃᑕᐅᖕᒪᑕ, ᑮᓇᐅᔭᖅᑕᖃᖏᑦᖢᓂᓗ ᐃᓕᓐᓂᐊᕐᕕᖕᒥ ᑕᐃᒪᓐᓇ ᐃᓕᓐᓂᐊᖅᑎᑎᒍᑎᒃᓴᓂᒃ.’

ᐅᖃᓚᐅᖅᐳᖅ ᐃᒡᓗᓕᒑᕐᔪᖕᒥᐅᑕᐅᓯᒪᓕᕋᒥ ᐊᑯᓂ ᖃᐅᔨᒪᑉᓗᓂᓗ ᑮᓇᐅᔭᑦ ᐊᑐᖅᑕᐅᒋᐊᖃᕐᒪᑕ.

“ᑮᓇᐅᔭᓂᒃ ᓇᑭᑐᐃᓐᓇᖅ ᐱᓐᓇᖏᒻᒪᑦ ᐊᓯᐊᓂᑦ ᐲᖅᑕᐅᓗᓂ ᐊᓯᐊᓄᑦ ᐃᓕᔭᐅᓗᓂ ᐊᑐᖅᑕᐅᓗᓂᓗ, ᑕᐃᒪ ᐊᑯᓂᒧᑦ ᐃᓱᒪᒋᔭᐅᔭᕆᐊᖃᓕᕐᒪᑦ ᓴᓇᓗᓂᓗ ᖃᔭᓂᕐᓂᒃ 30-ᓂᒃ; ᐊᒥᓱᓂᒃ ᖃᔭᖃᕐᓗᑎᒃ ᐃᓕᓐᓂᐊᖅᑎᑦ ᓄᑖᓂᒃ ᐃᓕᓐᓂᐊᕈᓐᓇᐅᑎᖃᕐᒪᑕ, ᓴᓇᓗᑎᒃ, ᓴᓇᓗᑎᒡᓗ ᓇᖕᒥᓂᖅ ᖃᔭᕆᓂᐊᖅᑕᒥᖕᓂᒃ ᐃᓕᓐᓂᐊᕐᓗᑎᒡᓗ ᐊᑐᖅᑕᐅᖃᑦᑕᕐᓂᖏᓐᓄᑦ.

“ᓂᐅᕕᕐᓗᓂ ᐊᑐᖅᑕᐅᒋᐊᖃᖅᑐᓂᒃ, ᑮᓇᐅᔭᑭᒃᓴᐃᓐᓇᖅᖢᓂᓗ ᐋᖅᑭᒃᓱᖅᑕᐅᓯᒪᑎᑦᓯᓇᓱᐊᕐᓗᓂ ᓄᑕᐅᖏᓕᖅᑐᓂᒃ, ᑕᐃᒪᖓᓗᒃᑖᖅ ᑕᐃᒪᓐᓇᐃᓕᐅᕐᓇᖅᖢᓂᓗ, ‘ᑕᐃᒪ ᑮᓇᐅᔭᖃᒃᑲᓐᓂᐊᕐᔪᖕᓂᕈᒪ, 17−ᓂᒃ ᓂᐱᐅᑎᓂᒃ ᓂᐅᕕᕆᐊᖃᕋᔭᖏᑉᐳᖓ.’

“ᐅᕙᖓᑐᐊᖅ ᐱᔪᓐᓇᖅᑐᑐᐊᖑᖏᓐᓇᒪ ᐃᓕᓐᓂᐊᕐᕕᖕᒥ, ᑕᒪᒃᑯᐊ ᐊᑐᖅᑕᐅᒋᐊᖃᕐᒪᑕ ᓱᕋᑲᐅᑎᒋᓂᐊᖏᑦᑐᑦ, ᑕᐃᒪᓐᓇ ᑮᓇᐅᔭᑦ ᐊᑐᑦᓯᐊᕐᓂᐊᖅᐸᕗᑦ ᑕᐃᒪᓐᓇ.

“ᐱᓕᕆᐊᕆᓚᐅᐱᓪᓚᑐᐃᓐᓇᕐᓂᐊᖏᓐᓇᑉᑎᒍ ᓇᓂᑐᐃᓐᓇᕐᓗ ᐱᓕᕆᐊᕆᔭᐅᔪᓐᓇᖏᑦᖢᓂ, ᓄᓇᑉᑎᓐᓂ ᐊᐅᓪᓛᑦᓯᐊᕐᒪᑦ ᑲᔪᓯᑦᓯᐊᖅᖢᓂᓗ.”

ᐳᕈᑯᐸᐃᒃ ᐅᖃᓚᐅᖅᐳᖅ ᑕᒪᓐᓇᑐᐊᖅ ᐃᓕᓐᓂᐊᕈᑕᐅᖃᑦᑕᖏᒻᒪᑦ ᐊᓯᖏᓐᓂᒃ ᐃᓕᓐᓂᐊᕈᑎᖃᖃᑦᑕᖅᖢᑕᓗ ᐊᒻᒪ ᐊᕕᒃᑐᖅᓯᒪᔪᓂᒃ ᐃᓕᓐᓂᐊᕈᑎᖃᖅᐸᒃᖢᑕᓗ.

ᐅᖃᓚᐅᖅᖢᓂᓗ ᐃᓕᓐᓂᐊᖅᑎᑦ ᐃᓕᓐᓂᐊᕈᑎᖃᕐᒪᑕ ᐃᓅᓯᕆᓂᐊᖅᑕᒥᓂᒃ, ᐃᖕᒥᓂᒃ ᐃᑲᔪᕆᐊᖃᕐᓂᕐᒧᑦ ᐊᒻᒪ ᓇᓗᒐᓛᕈᓐᓇᕐᓗᑎᒃ.

“ᖃᐃᖁᔭᐅᓚᐅᕋᒪ ᑮᓇᐅᔭᓂᒃ ᑐᓂᔭᐅᓂᐊᖅᖢᑕ ᑐᓴᓚᐅᖅᐳᖓᓗ ᐃᕆᐊᓛᖅᑐᓂᒃ ᓂᓪᓕᐊᔪᓂᒡᓗ ᐃᓕᓐᓂᐊᖅᑎᓂᒃ ᐃᒡᓗᓕᒑᕐᔪᖕᒥ.

“ᑕᒪᓐᓇ ᐱᐅᔪᒻᒪᕆᐅᕗᖅ ᐃᓕᓐᓂᐊᕈᑦ ᐅᔾᔨᖅᑐᑦᓯᐊᕆᐊᖃᕐᓂᕐᒧᓪᓗ ᐅᒫᓂ ᐃᓕᓐᓂᐊᖅᐸᒃᖢᑕ, ᐃᓕᓐᓂᐊᖅᑎᓪᓗ ᓱᖁᑎᒃᓴᕆᐊᖃᖏᓐᓂᖏᑦ ᐱᑦᓯᐊᕆᐊᖃᕐᓂᖏᓪᓗ ᐃᒫᓂ, ᑕᐃᒪᓐᓇ ᐃᓕᓐᓂᐊᖅᑎᑎᒍᒪᕗᒍᑦ ᓄᑕᖃᓂᒃ ᑲᓇᑕᒥ.

“ᐊᒥᓱᓂᒃ ᐃᐱᔪᖃᖅᐸᖕᒪᑦ ᐃᒫᓂ ᐊᕐᕌᒍᑕᒫᑦ ᑕᒡᕙᓂ ᑕᐃᒪᐃᑦᑐᖃᕆᐊᖃᖏᒻᒪᑦ?

“ᐊᒻᒪ ᐅᑭᐅᓂ ᖁᓕᓂ ᑕᒪᓐᓇ ᐱᓕᕆᐊᕆᔪᓐᓇᕐᓂᐊᕋᑉᑎᒍ ᐊᒥᓱᓂᒃ ᐃᓕᓐᓂᐊᖅᑎᑦᓯᓗᑕ ᓄᑕᖃᓂᒃ, ᖁᔭᓐᓇᒦᑦᓯᐊᖅᐳᖓᓗ ᑕᒪᒃᑯᓂᖓ ᐱᓕᕆᐊᑉᑎᓐᓂᒃ ᐅᒃᐱᕈᓱᒃᑐᓂᒃ ᑲᔪᓯᔪᓐᓇᑦᓯᐊᖁᑉᓗᑕ ᐃᓕᑕᕆᔭᐅᒍᑎᑖᖅᓯᒪᓕᖅᖢᑕᓗ ᑮᓇᐅᔭᓂᒃ.”

Leave a Comment: