ᐸᕐᓇᐅᑎᖃᕐᓂᖅ ᓵᓚᒃᓴᕈᒪᓂᕐᒧᑦ

by Darrell Greer- January 31, 2018

ᓂᕆᐅᒋᔭᖃᑦᓯᐊᓕᖅᐳᑦ ᑲᖏᖅᖠᓂᕐᒥ ᕼᐋᑭᕐᓂᕐᒧᑦ ᐃᓕᓐᓂᐊᖃᑕᐅᖃᑦᑕᖅᑐᑦ ᑖᓐᓇ ᑮᓇᐅᔭᓂᒃ ᓵᓚᒃᓴᐅᑕᐅᓂᐊᖅᑐᖅ Arctic Inspiration Prize (AIP) ᑐᓴᖅᑎᑕᐅᓂᐊᕐᒪᑦ ᒪᒃᑯᒃᑐᓄᑦ ᐱᓕᕆᐊᕆᔭᐅᕙᒃᑐᓄᑦ ᑮᓇᐅᔭᒃᑖᕈᑎᒃᓴᐃᑦ ᐅᓐᓄᒃ, ᔭᓐᓄᓂᐊᕆ 31 ᐊᑐᕚᒥ.

ᒪᒃᑯᒃᑐᖅ ᓯᕗᓕᖅᑎᑦ ᑕᐃᒪᓐᓇᑎᑐᑦ ᐄᑕᓐ ᒪᒃᐸᑎᑐᑦ, ᓴᐅᒥᐊᓂ, ᐊᒻᒪ ᔮᓪ (ᐸᐸ) ᒪᒃᑕ, ᑕᓕᖅᐱᐊᓂ, ᐱᓐᖑᐊᖃᐅᔪᑦ ᐃᓕᓐᓂᐊᕐᓂᕐᒧᑦ ᑕᒡᕙᓂ Rankin Rock Hockey Camp−ᒥ ᒪᒃᑯᒃᑐᓂᒃ ᐱᓕᕆᖃᑎᖃᖅᖢᑎᒃ ᒪᑐᓂᖓ ᔨᑕᓐ ᕘᐱᒃ, ᑐᖏᓕᐊᓂ ᓴᐅᒥᐊᓂᑦ, ᐊᒻᒪ ᑕᓖᓐ ᕗᕇᓴᓐ 2016-ᒥ ᐃᓕᓐᓂᐊᖅᑎᑕᐅᑎᓪᓗᒋᑦ ᕼᐋᑭᕐᓂᕐᒧᑦ ᑲᖏᖅᖠᓂᕐᒥ. NNSL File Photo

ᑲᖏᖅᖠᓂᕐᒥ ᐱᓐᖑᐊᖅᑐᓕᕆᓂᕐᒧᑦ ᑐᑭᒧᐊᒃᑎᑎᔨ ᑏᕕᑦ ᑲᓛᒃ−ᒧᑦ ᐱᒋᐊᖅᑕᐅᓯᒪᔪᖅ ᑲᖏᖅᖠᓂᕐᒥᑕ ᕼᐋᑭᕐᓂᕐᒧᑦ ᐃᓕᓐᓂᐊᖅᑎᑎᓂ ᑭᖑᓪᓕᖅᐹᖑᖃᑕᐅᕗᖅ ᓵᓚᒃᓴᐅᑎᒃᓴᖅᑖᖃᑕᐅᔪᓐᓇᖅᖢᓂ ᒪᒃᑯᒃᑐᓕᕆᓂᕐᒧᑦ ᑐᕌᖅᖢᓂ − ᑕᒪᓐᓇ ᓵᓚᒃᓴᐅᑎᖃᕈᓐᓇᖅᖢᑎᒃ ᑎᑭᓪᓗᒍ $100,000ᓂᒃ 7−ᓄᑦ ᐱᓐᖑᐊᖅᑎᓄᑦ − ᐊᒻᒪ ᐅᖃᐅᓯᕆᔭᐅᓯᒪᑉᓗᓂᓗ ᑖᒃᑯᐊ ᐃᓕᓐᓂᐊᖅᑎᑦᓯᖃᑦᑕᖅᑐᑦ ᕼᐋᑭᕐᓂᕐᒧᑦ ᒪᒃᑯᒃᑐᓂᒃ ᓵᓚᒃᓴᑐᐃᓐᓇᕆᐊᖃᕐᓂᖏᓐᓄᑦ.

ᑲᓛᒃ ᐊᐅᓪᓚᓚᐅᖅᐳᖅ ᑲᖏᖅᖠᓂᕐᒥᑦ ᐊᑐᕚᒧᑦ ᓯᑕᒻᒥᐅᓚᐅᖅᑐᒥ, ᑎᑭᓐᓂᐊᖅᖢᓂ ᓯᕗᓂᐊᒍᑦ ᑕᐃᒪᓐᓇ ᑕᐅᑐᖃᑕᐅᔪᓐᓇᕈᒪᑉᓗᓂ ᐃᑲᔪᕈᓐᓇᕈᒪᑉᓗᓂᓗ ᐱᓐᖑᐊᖅᑎᓂᒃ Rankin Wolves ᐱᓐᖑᐊᕐᓂᐊᖅᑎᓪᓗᒋᑦ ᐊᖅᓴᕐᓂᕐᒧᑦ ᐊᑐᕚᒥ ᐃᓚᐅᓚᐅᖏᓐᓂᕐᒥᓂ ᓵᓚᒃᓴᐅᑎᖃᕐᓂᕐᒧᑦ ᖁᕕᐊᓱᒍᑎᖃᕐᓂᐊᖅᑐᓂᒃ ᒪᒃᑯᒃᑐᓕᕆᓂᕐᒧᑦ.

ᐅᑉᓗᒃ ᒪᕐᕉᖕᓂ ᐱᓕᕆᔪᒻᒪᕆᐅᓚᐅᖅᐳᖅ ᑲᓛᒃ, ᑮᓇᐅᔭᓂᒃ ᓵᓚᒃᓴᐅᑎᖃᕈᓂ ᐊᖏᒡᓕᒋᐊᖅᑎᑦᓯᓂᐊᖅᖢᓂ ᐃᓕᓐᓂᐊᖅᑎᑦᓯᖃᑦᑕᕐᓂᕐᒥᖕᓂᒃ ᕼᐋᑭᕐᓂᕐᒧᑦ ᓯᓚᑖᓂ ᑲᖏᖅᖠᓂᐅᑉ ᓯᕗᓪᓕᖅᐹᑦᓯᐊᒥ ᑕᐃᒪᓐᓇᐃᓕᐅᕐᓂᐊᖅᖢᓂ.

ᐊᒻᒪ, ᐱᖓᓱᓂᒃ ᓄᓇᓕᒃᑕᖃᕐᓂᐊᖅᖢᓂ ᐃᓚᐅᓂᐊᖅᑐᓂᒃ ᐃᓕᓐᓂᐊᕐᕕᐅᓂᐊᖅᑐᑦ, ᑲᓛᒃ ᑮᓇᐅᔭᓂᒃ ᓵᓚᒃᓴᐅᑎᖃᖅᐸᑕ ᑕᐃᒪᓐᓇ ᐃᓕᓐᓂᐊᖅᑎᑎᓂᕐᒧᑦ ᐊᓯᖏᓐᓂᒃ ᓄᓇᓕᖕᓂ ᐱᓕᕆᐊᖃᕐᓂᐊᖅᐳᖅ.

ᐸᕐᓇᐅᑎᖃᖅᐳᖓ ᐃᓕᓐᓂᐊᖅᑎᑦᓯᓂᕐᒧᑦ ᕼᐋᑭᖅᐸᒃᑐᓂᒃ ᑕᐃᒪᓐᓇ ᓵᓚᒃᓴᐅᑎᖃᕐᓂᖅ ᐊᐅᓚᑕᐅᖃᑦᑕᕐᒪᑦ ᑕᐃᒪᓐᓇ, ᑕᐃᒪᓐᓇ ᖃᐅᔨᕙᓪᓕᐊᓂᖅ ᐸᕐᓇᐅᑕᐅᓂᐊᖅᑐᓂᒃ ᑮᓇᐅᔭᑦ ᓵᓚᒃᓴᐅᑕᐅᓚᐅᖅᑐᑦ ᒪᓕᒃᖢᒋᑦ,” ᐅᖃᓚᐅᖅᐳᖅ ᑲᓛᒃ.

ᑕᐃᒪᓐᓇ ᐱᒻᒪᕆᐊᓘᓪᓗᓂ ᒪᓕᒐᖃᑦᓯᐊᖅᖢᓂᓗ ᖃᓄᐃᓕᐅᕆᐊᖃᕐᓂᕐᒧᑦ ᓵᓚᒃᓴᕐᓗᓂ ᑮᓇᐅᔭᓂᒃ, ᖃᐅᔨᒍᒪᖕᒪᑕ ᓇᒧᖓᐅᓂᐊᕐᓂᖏᓐᓄᑦ ᑮᓇᐅᔭᑦ ᖃᓄᖅ ᐊᑐᖅᑕᐅᓂᐊᕐᓂᖏᓐᓄᓪᓗ.

ᑕᐃᒪ, ᐸᕐᓇᐅᑎᖃᖅᐸᒌᖅᐳᖓ ᑕᐃᒪᓐᓇ ᐋᖅᑭᐅᒪᑦᓯᐊᕆᐊᖃᕐᒪᑕ ᑐᒃᓯᕋᐅᑎᖃᕐᓂᐊᕐᓗᓂ ᓵᓚᒃᓴᐅᑎᖃᕐᓂᕐᒧᑦ.
ᐅᖃᓚᐅᖅᖢᓂᓗ,
Rankin Rock Hockey Camp ᕼᐋᑭᕐᓂᕐᒧᑦ ᐃᓕᓐᓂᐊᖅᑎᑦᓯᖃᑦᑕᕐᓂᕐᒧᑦ ᑎᒥᐅᔪᖅ ᓵᓚᒃᓴᐅᑎᖃᓚᐅᕐᒪᖔᑕ.

ᐅᖃᓚᐅᖅᖢᓂ ᑖᒃᑯᐊ ᐃᓕᓐᓂᐊᖅᑎᑦᓯᖃᑦᑕᕐᓂᖅ ᓵᓚᒃᓴᖅᐸᒌᖅᓯᒪᓂᖏᓐᓄᑦ ᐃᓚᐅᑎᑕᐅᑉᓗᑎᒃ ᓵᓚᒃᓴᐅᑎᖃᕐᓂᐊᖅᑐᓄᑦ, ᑕᐃᒪᓐᓇ ᐃᓚᐅᓂᐊᖅᖢᓂ ᐱᕕᒡᔪᐊᖅᑎᑕᐅᔪᓄᑦ ᓵᓚᒃᓴᖃᑕᐅᓇᓱᐊᕐᓂᐊᕐᓗᓂ.

ᑕᐃᒪ ᐊᖏᒡᓕᕙᓪᓕᐊᓂᐊᕋᑉᑕ ᒪᕐᕉᖕᓄᑦ ᓄᓇᓕᖕᓄᐊᕐᓂᐊᖅᖢᑕᓗ ᕼᐋᑭᖅᑐᓕᕆᔨᒥᒃ ᐊᑐᖅᐸᓪᓕᐊᒍᒪᕗᒍᑦ, ᐱᓗᐊᖅᑐᒥᒃ ᓄᓇᓕᐊᓛᖑᓂᖅᓴᐅᔪᓂ.

ᑕᐃᒪᓐᓇᐃᓕᐅᕈᒪᕗᒍᑦ ᓄᓇᓕᐊᓛᖑᓂᖅᓴᐅᔪᓄᑦ ᐊᒻᒪ ᒪᒃᑯᒃᑐᓂᒃ ᓄᑕᖃᓂᒃ ᐊᑐᓂ ᓄᓇᓕᖕᓂ ᐃᓕᓐᓂᐊᖅᑎᑦᓯᓂᕐᒧᑦ ᐃᓚᐅᑎᑦᓯᒍᒪᕗᒍᑦ ᐃᓕᓐᓂᐊᖅᑎᑦᓯᖃᑦᑕᕋᔭᖅᑐᓂᒃ.
“ᖃᐅᔨᒪᓕᐊᓂᒃᑲᒪ ᑭᕙᓪᓕᕐᒥ ᐱᓐᖑᐊᖅᑎᓂᒃ ᑕᒪᐃᓐᓂᑦ ᒪᒃᑯᒃᑐᑦ ᑲᓇᒃᔅᑯᓐᓂᑦ ᐊᒻᒪ ᑭᕙᓪᓕᖅ ᑲᓇᒃᔅᑯᓐᓂᑦ ᐃᓚᐅᔪᓂᒃ, ᑕᐃᒪ ᓄᑕᖃᑦ ᐃᓱᒪᒋᒌᖅᓯᒪᕙᒃᑲ ᐊᐱᕆᓂᐊᖅᖢᒋᓪᓗ ᐃᑲᔪᕈᓐᓇᖁᑉᓗᒋᑦ ᐃᓕᓐᓂᐊᖅᑎᑦᓯᓕᕈᑉᑕ ᓄᓇᖏᓐᓂ.

ᕼᐋᑭᕐᓂᖅ ᒥᑭᔫᖕᒪᑦ ᐱᑦᓯᐊᕋᓱᐊᖃᑦᑕᖅᐳᖓ ᑕᒪᐃᓐᓂᒃ ᐃᓕᓐᓂᐊᑎᖏᑦᖢᒋᑦ − ᐃᓕᓐᓂᐊᖅᑎᑦᖢᒋᓪᓗ ᐊᒃᓱᕈᖅᑎᓐᓇᓱᐊᖃᑦᑕᖅᐸᒃᑲ − ᐱᖃᓐᓇᖃᑦᓯᐊᖅᖢᖓᓗ ᑭᕙᓪᓕᕐᒥ, ᐊᒻᒪ ᐊᒥᓱᑦ ᐃᓄᐃᑦ ᓄᓇᓕᖕᓂᒥᐅᑕᐃᑦ ᐃᓚᐅᑎᓐᓇᓱᐊᖃᑦᑕᖅᐸᒃᑲ ᐱᔪᓐᓇᕌᖓᑕ, ᑕᐃᒪ ᐱᓕᕆᖃᑎᖃᕐᓗᓂ ᐱᖃᓐᓇᒻᓂᒃ ᓄᓇᓕᖕᓂ ᑕᒪᓐᓇ ᖁᕕᐊᒋᑦᓯᐊᖅᖢᒍ.”

ᑲᓛᒃ ᐅᖃᓚᐅᖅᐳᖅ ᑕᐃᒪᓐᓇ ᐃᓕᓐᓂᐊᖅᑎᑦᓯᓂᐊᕐᓗᓂ ᐊᓯᖏᓐᓂ ᓄᓇᓕᖕᓂ, ᐊᖏᒡᓕᒋᐊᖅᑎᑦᓯᓂᐊᖅᐳᒍᑦ ᐱᓕᕆᐊᑉᑎᓐᓂᒃ.

ᐅᖃᓚᐅᖅᖢᓂᓗ, ᐃᓱᒪᑦᓯᐊᕐᓗᓂ, ᓇᓗᓇᐃᖅᓯᓯᒪᓕᐊᓂᒃᐳᖅ ᓯᕗᓪᓕᕐᓂᒃ ᒪᕐᕉᖕᓂᒃ ᓄᓇᓕᖕᓂᒃ ᐸᕐᓇᒃᓯᒪᒍᑎᒥᓂᒃ ᑕᒪᓐᓇ ᕼᐋᑭᕐᓂᕐᒧᑦ ᐃᓕᓐᓂᐊᖅᑎᑦᓯᓂᖅ ᐊᑐᖅᑕᐅᔪᓐᓇᖁᑉᓗᒍ.

ᐅᑉᓗᓂᒃ ᐋᖅᑭᒃᓯᓯᒪᓕᐊᓂᒃᐳᒍᑦ ᐊᕐᕕᐊᓂ ᐊᒻᒪ ᖃᒪᓂ’ᑐᐊᒥ, ᓯᕗᓪᓕᖅᐸᐅᓂᐊᖅᐳᑦ ᒪᕐᕉᒃ ᓄᓇᓖᒃ ᑮᓇᐅᔭᖅᑖᑉᑎᓐᓂᒃ ᐊᑐᕐᕕᒋᓂᐊᖅᑕᕗᑦ.

ᐊᒻᒪ ᓂᕆᑦᓯᐊᕙᓕᕆᓂᐊᖅᐳᒍᓪᓗ ᐊᒻᒪ, ᐃᒻᒪᖄ, ᓂᕿᓂᒃ ᐸᕐᓇᒃᑕᐅᓯᒪᔪᓂᒃ ᓄᑕᖃᓄᑦ ᓂᕆᑎᑕᐅᔪᒃᓴᐅᓂᐊᖅᑐᓂᒃ ᐱᓗᑕ ᐊᔪᖏᓐᓂᖅᓴᐅᓕᖁᑉᓗᒋᑦ ᓂᕆᑦᓯᐊᖃᑦᑕᕐᓗᑎᒃ ᓂᕿᑦᓯᐊᕙᖕᓂᒃ.

ᑕᐃᒪᓐᓇ ᓂᕿᑦᓯᐊᕙᒃᑐᕐᓂᕐᒥᒃ ᐱᓕᕆᐊᖃᕐᓂᖅᓴᐅᓂᐊᖅᐳᒍᑦ ᑕᒪᓐᓇ ᐃᒃᐱᖕᓇᖅᑎᑕᖁᑉᓗᒍ, ᐱᓇᓱᐊᕈᓯᓗᒃᑖᒥ ᓂᕿᑦᓯᐊᕙᓕᕆᓂᕐᒥᒃ ᐱᓕᕆᐊᖃᕐᓂᐊᖅᐳᒍᑦ.

ᕼᐋᑭᖅᑐᓕᕆᔨᖃᕐᓂᖅ ᐱᒻᒪᕆᐅᓂᐊᕐᒪᑦ ᐃᓕᓐᓂᐊᖅᑎᑎᓂᕐᒧᑦ ᑕᐃᒪᓐᓇ ᕼᐋᑭᖅᑐᓂ ᑕᐃᒪᓐᓇᐃᑦᑐᖃᐃᓐᓇᖅᐸᖕᒪᑦ, ᓄᓇᓕᖕᓂᓗ ᑕᒪᓐᓇ ᒪᓕᒃᑕᐅᕙᓪᓕᐊᑎᑕᐅᖁᒐᑉᑎᒍ ᓇᓗᓇᐃᒃᑯᑕᖃᖅᑐᓂᒃ ᐱᓕᕆᔨᖃᓕᖁᑉᓗᒋᑦ ᕼᐋᑭᖅᑐᖃᓕᕌᖓᑦ.”

ᑲᓛᒃ ᐅᖃᓚᐅᖅᐳᖅ ᑭᕙᓪᓕᕐᒥ ᕼᐋᑭᖅᑐᓕᕆᓂᖅ ᐊᒃᓱᕈᕐᓇᖅᐸᒃᐳᖅ, ᐱᓗᐊᖅᑐᒥᒃ ᐱᓐᖑᐊᕐᔪᐊᓕᕌᖓᑕ ᑕᖅᑭᓂ ᔭᓐᓄᐊᕆᒥ ᐄᐳᕈᒥᓗ.

ᐅᖃᓚᐅᖅᖢᓂᓗ ᓄᑕᖃᑦ ᑕᒪᕐᒥᒃ ᓯᑯᒦᑦᑐᑦ ᐱᓐᖑᐊᖃᑕᐅᒍᒪᔪᑦ ᓯᕗᓪᓕᖅᐸᐅᑎᓐᓂᐊᖅᐸᕗᑦ ᓯᕗᓕᒃᑎᖑᖅᑎᓐᓇᓱᐊᕐᓗᒋᑦ ᑭᕙᓪᓕᕐᒥ.

ᕼᐋᑭᕐᓂᖅ ᑭᕙᓪᓕᕐᒥ ᐱᒋᒐᑉᑎᒍ ᐊᑐᐃᓐᓇᐅᖁᑉᓗᒍᓗ ᐃᓄᖕᓄᑦ.

ᐊᓯᔾᔩᓂᐊᖏᑦᑐᒍᑦ ᓄᑕᖃᓄᑦ ᐃᓕᓐᓂᐊᖃᑕᐅᔪᓄᑦ, ᐊᔾᔨᐅᖏᑦᑐᓂᒃ ᐊᐅᓚᑦᓯᒍᒪᒐᑉᑕ ᐊᔪᖏᓐᓂᖅᓴᐅᓕᖅᐸᓪᓕᐊᖁᑉᓗᒋᑦ ᕼᐋᑭᕐᓂᕐᒧᑦ, ᑭᓯᐊᓂ ᑕᒪᐃᓐᓂ ᓯᑯᒥ ᐃᓕᓐᓂᐊᕐᕕᐅᑉ ᐃᓗᐊᓂᓗ.

ᒪᒃᑯᒃᑐᕗᑦ ᓯᕗᓕᖅᑎᑦ ᐊᕐᕕᐊᓂ ᖃᒪᓂ’ᑐᐊᒥᓗ ᐊᔪᖏᓕᖅᑎᓐᓂᐊᖅᐸᕗᑦ ᑕᐃᒪᓐᓇ ᐃᑲᔪᕐᓂᐊᕐᒪᑕ ᐃᓕᓐᓂᐊᖅᑎᑦᓯᒍᑎᒋᔭᑉᑎᓐᓄᑦ.

ᐊᔪᖏᑦᑐᓂᒃ ᐱᑕᖃᕐᒪᑦ ᐃᓕᓐᓂᐊᖅᑎᑦᓯᓂᕐᒧᑦ ᐱᓕᕆᐊᖃᖅᑐᓂᒃ ᕼᐋᑭᕐᓂᕐᒧᑦ, ᐊᒻᒪ ᖁᕕᐊᓱᒃᖢᑎᒡᓗ ᐊᐅᓪᓚᖅᓯᒪᖃᑕᐅᓂᕐᒧᑦ ᑲᑎᑦᓯᓂᕐᒧᓪᓗ ᓄᑖᓂᒃ ᓄᑕᖃᓂᒃ ᐊᔪᖏᓕᖅᐸᓪᓕᐊᖁᑉᓗᒋᑦ ᑕᒪᐃᓐᓂ ᕼᐋᑭᕐᓂᕐᒧᑦ ᐃᓅᓯᕐᒧᓪᓗ ᖃᐅᔨᒪᑦᓯᐊᕐᓂᕐᒧᑦ ᖃᓄᐃᓕᐅᕆᐊᒃᓴᖅ.”

Leave a Comment:

Your email address will not be published. Required fields are marked *