ᐅᑭᐅᑦ 34 ᓴᕆᒪᓱᒃᓯᒪᔪᖅ ᐱᓕᕆᑦᓯᐊᖅᓯᒪᑉᓗᓂᓗ

by Darrell Greer- November 28, 2017

ᕿᐊᓱᖑᓇᖃᑦᑕᓚᐅᖅᐳᖅ ᐅᓐᓄᒃᑯᑦ ᖃᑉᑎᕆᔨ ᒪᐃᑯ ᐊᒃᓴᒡᔪᐊᒃ ᐃᓕᑕᕆᔭᐅᓚᐅᕐᒪᑦ 34ᓂᒃ ᐅᑭᐅᓂᒃ ᐱᓕᕆᓯᓕᕐᓂᖓᓄᑦ ᑲᖏᖅᖠᓂᕐᒥ ᐊᑭᓕᖅᑐᖅᑕᐅᖏᑦᖢᑎᒃ ᖃᑉᑎᕆᔨᓄᑦ ᐃᓕᑕᕆᔭᐅᑉᓗᓂ ᐱᓕᕆᔨᖃᑎᒥᓄᑦ ᓄᓇᓕᖕᓂᒥᐅᓄᓪᓗ ᓄᕕᐱᕆ 18−ᒥ.

ᐊᑯᓂ ᐊᑭᓕᖅᑐᒐᐅᖏᑦᖢᓂ ᖃᑉᑎᕆᔨᐅᓯᒪᓕᖅᑐᖅ ᒪᐃᑯ ᐊᒃᓴᒡᔪᐊᒃ, ᑕᓕᖅᐱᐊᓂ, ᖃᓄᐃᓕᐅᕆᐊᒃᓴᖅ ᓇᓗᓕᖅᑐᖅ ᖃᑉᑎᕆᔨᐅᖃᑎᖓ ᑲᐃᔪ ᓘ ᐊᒻᒪ ᔪᐊᔾ ᐊᒃᓴᒡᔪᐊᒃ (ᒪᐃᑯᑉ ᐃᕐᓂᖓ) ᓇᓗᓇᐃᒃᑯᑕᒥᒃ ᑎᒍᒥᐊᖅᑐᑦ ᑐᓂᔭᐅᓂᐊᖅᖢᓂ ᒪᐃᑯᒧᑦ ᐅᑭᐅᑦ 34 ᐱᓕᕆᓯᒪᓕᕐᓂᖓᓄᑦ ᓄᓇᓕᖕᓂ ᖃᑉᑎᕆᔨᓂ, ᐃᑲᔪᖅᑎᖓ ᐊᖓᔪᖄᑉ ᓈᑕᓂᐅ ᕚᑦᓴᓐ ᑕᐅᑐᒃᑎᓪᓗᒍ ᑐᓄᐊᓂ ᑲᖏᖅᖠᓂᕐᒥ ᓄᕕᐱᕆ 18-ᒥ.

ᓂᕆᕕᒡᔪᐊᓚᐅᖅᐳᑦ ᖁᕕᐊᓱᒃᑎᑕᐅᕌᓂᒃᖢᑎᒃ, ᐊᒻᒪ ᓄᓇᓕᖕᓂᒥᐅᓪᓗ ᒧᒥᖅᑎᑕᐅᓚᐅᖅᖢᑎᒃ ᓂᕆᕕᒡᔪᐊᕌᓂᖕᒪᑕ ᐊᒃᓴᒡᔪᐊᑉ ᐱᓕᕆᐊᕆᓯᒪᔭᖏᓐᓂᒃ ᖁᕕᐊᓱᒍᑎᖃᖅᖢᑎᒃ ᐅᓐᓄᒃᑯᑦ.

ᑲᖏᖅᖠᓂᕐᒥ ᖃᑉᑎᕆᔨᑦ ᐊᖓᔪᖄᖓᑦ ᒫᒃ ᕙᐃᐊᑦ ᐅᖃᓚᐅᖅᐳᖅ ᑕᐃᒪᓐᓇᐃᓕᐅᕆᐊᕈᒪᓚᐅᕐᒪᑕ ᑎᑎᕋᕐᕕᖓᑦ ᖃᑉᑎᕆᔨᒃᑯᑦ ᐊᖓᔪᖄᕐᔪᐊᖓᑦᑕ ᑐᓂᓯᔪᓐᓇᓕᓚᐅᕐᒪᑦ ᐊᒃᓴᒡᔪᐊᒥᒃ ᓴᖃᕐᒥᖓᓂᒃ ᐅᑭᐅᓄᑦ 30-ᓄᑦ ᐱᓕᕆᓯᒪᓕᕐᓂᖓᓄᑦ.

ᐅᖃᓚᐅᖅᖢᓂᓗ ᑕᐃᒪᓐᓇ ᐱᓕᕆᓯᒪᓕᖅᐳᖅ ᐊᑯᓂᐊᓗᒃ, ᑕᐃᒪᓐᓇᓗ ᑭᒃᑯᑐᐃᓐᓇᐃᑦ ᐃᓚᐅᑎᑕᐅᓗᑎᒃ ᓂᕆᕕᒡᔪᐊᑎᑕᐅᖅᖢᑎᒃ.

ᖁᕕᐊᓱᒃᑎᑎᒋᐊᓕᓚᐅᖅᐳᒍᑦ, ᖃᑉᑎᕆᔨᒃᑰᑉᓗᑕ, ᒪᐃᑯ 34-ᓂᒃ ᐱᓕᕆᓯᒪᓕᕐᓂᖓᓄᑦ ᖃᑉᑎᕆᔨᒃᑯᓐᓂ,” ᐅᖃᓚᐅᖅᐳᖅ ᕙᐃᐊᑦ.

ᑐᓂᔭᐅᓚᐅᖅᖢᓂ ᖃᑉᑎᕆᔨᑦ ᐊᖓᔪᖄᖓᑦᑕ ᐃᑲᔪᖅᑎᖓᓐᓄᑦ ᓇᑕᓂᐅ ᕚᑦᓴᓐ, ᓇᓗᓇᐃᒃᑯᑕᖅᑖᖅᖢᓂᓗ ᐊᒻᒪ ᐅᑭᐅᓄᑦ 30-ᓄᑦ ᓴᖅᑲᕐᒥᖕᒥᒃ ᓇᓗᓇᐃᒃᑯᑕᖅᑖᓕᖅᖢᓂᓗ ᖃᑉᑎᕆᔨᒃᑯᓐᓂᑦ.

ᓄᓇᓕᖕᓂᒥᐅᑦ ᖃᐃᖁᓚᐅᖅᐸᕗᑦ ᐃᓚᐅᖃᑕᐅᖁᑉᓗᒋᑦ ᒪᐃᑯ ᖁᕕᐊᓱᒃᑎᑕᐅᑎᓪᓗᒍ, ᐊᒻᒪ ᑕᐃᒪᓐᓇ ᓂᕆᕕᒡᔪᐊᖅᑎᓚᐅᖅᐸᕗᑦ, ᐋᖅᑭᒃᓱᐃᓚᐅᖅᖢᑕᓗ ᓯᕗᓪᓕᕐᒥ ᓂᕆᕕᒡᔪᐊᕐᓂᕐᒥᒃ ᒧᒥᖅᑎᑦᓯᓂᕐᒥᒡᓗ ᑲᔪᓯᑦᓯᐊᓚᐅᖅᖢᓂᓗ.”

ᐊᒃᓴᒡᔪᐊᒃ, ᐱᖃᑎᒋᔭᐅᓚᐅᖅᖢᓂ, ᓄᓕᐊᒥᓄᑦ ᒥᐅᕆᐋᓐ ᐊᒻᒪ ᐃᕐᓂᖓ, ᔪᐊᔾ, ᐃᓚᒋᔭᐅᖃᑕᐅᑉᓗᑎᒡᓗ ᑲᖏᖅᖠᓂᕐᒥ ᖃᑉᑎᕆᔨᒃᑯᓐᓄᑦ, ᕿᐊᖃᑦᑕᓚᐅᖅᖢᑎᒡᓗ ᖃᑉᑎᕆᔨᓄᑦ ᑐᓂᔭᐅᒐᒥ ᓇᓗᓇᐃᒃᑯᑕᒥᒃ ᐃᓕᑕᕆᔭᐅᒍᓯᐊᒥᒃ.

ᕙᐃᐊᑦ ᐅᖃᓚᐅᖅᐳᖅ ᐃᓄᒃᑕᖃᓚᐅᕐᒪᑦ 150-ᓂᒃ ᓄᓇᓕᖕᓂᒥᐅᓂᒃ ᐃᓚᐅᔪᓂᒃ.

ᐅᖃᓚᐅᖅᖢᓂᓗ ᐊᒥᓲᓂᖅᓴᐅᒃᑲᓐᓂᕋᔭᓚᐅᕋᓗᐊᖅᐳᑦ ᐱᓐᖒᖅᑐᖃᓚᐅᕐᓂᖓᓄᑦ $15,000-ᓂᒃ ᐊᒥᓲᖏᓐᓂᖅᓴᐅᓚᐅᖅᐳᑦ.

ᑖᒃᑯᐊᑦᓴᐃᓐᓇᐃᑦ ᖃᑉᑎᕆᔨᒃᑯᓐᓂ ᐃᑲᔪᓚᐅᖅᑐᑦ ᓱᓇᑐᐃᓐᓇᕐᓄᑦ ᑕᐃᒪᓐᓇ ᐊᐅᓚᑦᓯᓚᐅᖅᐳᑦ ᐋᖅᑭᒃᓱᐃᑉᓗᑎᒡᓗ ᒪᐃᑯ ᐅᓐᓄᒋᓂᐊᖅᑕᖓᓂᒃ.

ᐃᒻᒪᖄ 12-ᖑᓚᐅᖅᐳᑦ ᐃᓚᒋᔭᐅᔪᑦ ᓂᕆᕕᒡᔪᐊᖅᑐᓂ, ᐊᔾᔨᒌᖏᑦᑐᑦ ᐃᓄᐃᑦ ᐃᑲᔪᖅᖢᑎᒃ ᓂᕿᓕᐅᖅᖢᑎᒃ ᓂᕿᓂᒃ ᐊᑉᒍᐃᑉᓗᑎᒡᓗ ᐆᒃᑐᕋᖅᖢᑕ ᐅᓐᓄᖃᖅᑎᑦᓯᓚᐅᖏᓐᓂᑉᑎᓐᓂ ᑕᐃᒪᓐᓇᐃᓕᐅᓚᐅᖅᐳᒍᑦ ᓱᓇᑐᐃᓐᓇᕐᓂᒃ ᐸᕐᓇᒃᖢᑕ.

ᓂᕿᓕᐅᒐᒃᓴᖃᓚᐅᖅᐳᒍᑦ ᐊᒥᓱᓂᒃ ᑕᒪᒃᑯᐊ ᐃᖃᓗᐃᑦ ᐆᔪᐃᑦ ᖃᔪᖃᖅᑐᖅ, ᑐᒃᑐ ᐆᔪᓕᐅᖅᓯᒪᔪᑦ, ᐊᓯᖏᓐᓂᒃ ᐃᓚᓯᒪᔪᑦ ᑐᒃᑐ ᐃᒐᓯᒪᑉᓗᓂ, ᓇᓄᖅ ᐊᒻᒪ ᐊᕿᒋᕐᔪᐊᑦ ᐊᓯᖏᓪᓗ.

ᑕᐃᒪᓐᓇᐃᓕᐅᖅᑎᑦᓯᑉᓗᑕ ᐆᒻᒪᖅᐹᓪᓕᕈᑕᐅᕗᖅ ᖃᑉᑎᕆᔨᓄᑦ ᓴᕆᒪᓇᕐᒪᑦ ᖃᑉᑎᕆᔨᐅᖃᑕᐅᔪᖃᖅᑎᓪᓗᒍ ᐅᑭᐅᓂᒃ 34-ᓂᒃ ᐱᓕᕆᓯᒪᓕᖅᖢᓂ, ᐱᒻᒪᕆᐅᓚᐅᕋᑉᑎᒍ ᐃᓕᑕᕆᔭᐅᑎᑕᐅᖁᑉᓗᒍ ᒪᐃᑯ ᐅᐱᒋᔭᖃᖁᑉᓗᒍᓗ, ᑕᐃᒪᓐᓇᐃᓚᐅᖅᖢᓂᓗ ᓴᕆᒪᓱᑦᓯᐊᓚᐅᕐᒪᑦ ᑕᐃᒪᓐᓇ ᐃᓕᑕᕆᔭᐅᑉᓗᓂ ᐅᐱᒋᔭᐅᑉᓗᓂᓗ.”

ᒪᐃᑯ ᐅᑭᐅᓕᒃ 54-ᓂᒃ, ᐅᖃᓚᐅᖅᐳᖅ ᐅᑭᐅᑦ 34 ᖃᑉᑎᕆᔨᒃᑯᓐᓃᓕᖅᖢᓂ ᑕᐃᒪᓐᓇ ᕿᓚᒥᒻᒪᕆᐊᓘᔮᖅᐳᑦ ᐅᑭᐅᑦ ᓲᕐᓗ ᓯᑯᖏᓚᐅᐱᓪᓚᑐᐃᓐᓇᖅᖢᓂᑎᑐᑦ.

ᐅᖃᓚᐅᖅᖢᓂᓗ ᖁᕕᐊᓱᒃᑎᑕᐅᑉᓗᓂ ᓴᕆᒪᓱᑦᓯᐊᓚᐅᕋᒥ ᖁᕕᐊᓱᑦᓯᐊᖅᓗᓂᓗ.

ᖃᑉᑎᕆᔨᐅᖃᑕᐅᓯᒪᔪᑦ ᐅᐱᒋᔭᖃᓚᐅᖅᐳᑦ ᐅᕙᒻᓂᒃ ᖃᐃᑉᓗᑎᒃ ᕿᐊᖃᑎᒋᓚᐅᖅᐸᒃᑲᓗ,” ᐅᖃᓚᐅᖅᐳᖅ ᒪᐃᑯ.

ᐊᒥᓱᓂᒃ ᐱᓕᕆᖃᑎᖃᖅᓯᒪᒐᒪ ᖃᑉᑎᕆᔨᓂᒃ ᐅᑭᐅᓂ 34-ᖑᓯᒪᓕᖅᑐᓂ ᖃᑉᑎᕆᔨᒃᑯᓐᓂ.

ᖁᕕᐊᓱᒃᐳᖓ ᖃᑉᑎᕆᔨᒃᑯᓐᓂᒃ ᐊᐅᓪᓛᑦᓯᐊᓕᕐᒪᑕ ᒫᓐᓇ.

ᐊᔾᔨᒋᖏᓕᕐᒪᒍ ᑕᐃᑉᓱᒪᓂᐅᓚᐅᖅᑐᒥᑦ ᐃᑲᔪᖅᑕᐅᓂᖅᓴᐅᓕᖅᖢᑕᓗ ᖃᑉᑎᕆᔨᑦ ᐊᖓᔪᖄᖓᑦ ᐃᓄᑦᓱᓯᐊᖑᑉᓗᓂᓗ.”

ᒪᐃᑯ ᐅᖃᓚᐅᖅᐳᖅ ᖁᕕᐊᒋᑦᓯᐊᕋᒥᐅᒃ ᐊᑭᓕᖅᑐᒐᐅᖏᑦᖢᓂ ᖃᑉᑎᕆᔨᐅᓂᖅ.

ᐅᖃᓚᐅᖅᖢᓂᓗ ᓄᓇᓕᖕᓄᑦ ᐃᑲᔪᑦᓯᐊᕈᒪᒐᒥ ᑕᐃᒪᓐᓇ ᖁᕕᐊᒋᑉᓗᓂᐅᒃ ᐃᑲᔪᖅᖢᓂ, ᑭᓯᐊᓂ ᑖᒃᑯᐊᑐᐊᖑᖏᑦᖢᑎᒃ.

ᓲᕐᓗ ᖃᐅᒪᒍᑕᐅᑉᓗᓂ ᓄᓇᓕᖕᓂ, ᒫᓐᓇ, ᐊᒻᒪ ᖁᕕᐊᓇᖅᖢᓂᓗ ᐊᒥᓱᓄᑦ ᐃᓄᖕᓄᑦ ᐅᑭᐅᓄᑦ 34-ᓄᑦ ᐱᓕᕆᓯᒪᓕᖅᖢᖓ.

ᑕᑯᓚᐅᕋᑉᑭᑦ ᖁᖓᑦᑐᑦ. ᐊᒻᒪ, ᓱᓕ ᑎᒎᑎᖃᑦᑕᖅᖢᒋᑦ ᐊᒥᓱᑦ ᐃᓄᐃᑦ ᑕᒡᕙᓂ.”
“ᕿᐊᓗᖓ ᑭᓯᐊᓂᐅᓚᐅᕐᒪᑦ ᑕᑯᒐᑉᑯ ᐃᓕᑕᕆᔭᐅᒍᑦ ᖃᑉᑎᕆᔨᒃᑯᓐᓂᖔᖅᑐᖅ ᑐᓂᔭᐅᖕᒪᑦ ᐅᕙᒻᓄᑦ.”

ᐱᒻᒪᕆᐅᑎᑦᖢᒍᓗ ᓄᓕᐊᕋ ᐃᕐᓂᕋᓗ ᐃᓚᒋᔭᐅᖕᒪᑕ ᖃᑉᑎᕆᔨᓄᑦ ᐃᓚᐅᓚᐅᖅᖢᑎᒡᓗ ᖁᕕᐊᓱᒃᑎᑕᐅᑎᓪᓗᖓ ᐊᒻᒪ, ᑕᐃᒪᑐᖅ, ᐅᓐᓄᒃ ᑕᒪᓐᓇ ᐱᓯᒪᐃᓐᓇᕐᓂᐊᖅᐸᖓᑦ ᑕᐃᒪᖓᓗᒃᑖᖅ.”

ᒪᐃᑯ ᐅᖃᓚᐅᖅᐳᖅ ᖃᐅᔨᒪᓚᐅᖏᓐᓇᒥ ᖃᓄᐃᑦᑑᓂᐊᕐᓂᖓᓄᑦ ᐃᓕᑕᕆᔭᐅᒍᑦ.

ᐅᖃᓚᐅᖅᖢᓂᓗ ᖃᓄᐃᓕᒋᐊᒃᓴᖅ ᓇᓗᓇᕐᓂᖓᓄᑦ ᐃᒃᐱᒍᓱᒍᑎᒋᓚᐅᖅᑕᒥᓂᒃ ᑐᓂᔭᐅᓂᐊᓕᕋᒥ.

ᐊᒥᓱᑦ ᐊᖑᑎᑦ ᐊᕐᓇᐃᓪᓗ ᐱᖁᑎᓂᒃ ᐃᓅᓯᕐᓂᒡᓗ ᐊᓐᓇᐃᓯᒪᖕᒪᑕ ᑲᖏᖅᖠᓂᕐᒥ ᐅᑭᐅᓂ ᐊᒥᓱᓂ ᖃᑉᑎᕆᔨᐅᖃᑕᐅᑉᓗᑎᒃ, ᐊᐱᕆᔭᐅᖏᓐᓇᖃᑦᑕᖅᖢᖓᓗ ᓱᓇᓂᒃ ᓇᒃᓴᕆᐊᖃᕐᒪᖔᕐᒪ ᖃᑉᑎᕆᔭᖅᑐᕐᓂᐊᕐᓗᖓ, ᐊᑐᖅᑕᐅᒋᐊᖃᖅᑐᓂᒃ, ᐃᓕᓐᓂᐊᕈᑕᐅᒋᐊᖃᖅᑐᓂᒡᓗ, ᐃᓕᓐᓂᐊᖅᑎᑕᐅᒍᒪᒃᐸᑕᓗ ᐊᑐᐃᓐᓇᐅᑦᓯᐊᖅᖢᖓ.

ᓱᓕ ᐅᓪᓚᒍᓐᓈᕐᔪᒃᑲᒪ, ᐊᑯᓂᐅᓂᖅᓴᖅ ᖃᑉᑎᕆᔨᓂ ᓱᓕ ᐱᓕᕆᔪᓐᓇᖅᐳᖓ.

ᓱᓕ ᐅᑭᐅᓂ ᐊᒥᓱᓂ ᐱᓕᕆᒃᑲᓐᓂᕈᓐᓇᖅᐳᖓ ᐊᑭᓕᖅᑐᖅᑕᐅᖏᓪᓗᑕ ᖃᑉᑎᕆᔨᐅᓂᕐᒧᑦ ᑲᖏᖅᖠᓂᕐᒥ.”

Leave a Comment:

Your email address will not be published. Required fields are marked *