ᐃᓕᓐᓂᐊᕐᓂᖅ ᑮᓇᐅᔭᓕᕆᓂᕐᒥᒃ

by Darrell Greer- October 31, 2017

ᐃᓕᓐᓂᐊᖅᑎᑦ ᖃᐅᔨᒪᓂᖅᓴᐅᓕᖅᐳᑦ ᖃᑉᓯᑐᖃᑦᑕᕐᓂᖏᓐᓄᑦ ᐱᓕᕆᑉᓗᓂ ᑭᕙᓪᓕᕐᒥ ᐃᓚᐅᓚᐅᖅᖢᑎᒃ ᐃᓕᓐᓂᐊᕈᑎᓂᒃ ᑑᒑᓕᒃ ᐃᓕᓐᓂᐊᕐᕕᒡᔪᐊᖓᓂ ᓇᐅᔮᓂ ᑕᖅᑭᐅᓚᐅᖅᑐᒥ.

ᐃᓕᓐᓂᐊᖅᑎᓄᑦ ᐃᑲᔪᖅᑎ ᓯᑎᓯ ᐸᐸᑦᓯ, ᓴᐅᒥᐊᓂ, ᐊᒻᒪ ᐃᓕᓐᓂᐊᖅᑎ ᓰᓐ ᒪᑉᓴᓛᒃ, ᕿᑎᐊᓂ, ᐊᒻᒪ ᐋᓐᑐᓃᔅ ᒪᑉᓕᒃ, ᖃᐅᔨᓴᖅᑐᑦ ᐊᑭᖏᓐᓂᒃ ᓂᐅᕕᐊᒃᓴᐃᑦ ᓇᐅᔮᓂ ᑯᐊᐸᒃᑯᓐᓂ. photo courtesy of Lloyd Francis

ᑕᒪᓐᓇ ᐃᓕᓐᓂᐊᕈᑕᐅᓚᐅᖅᑐᖅ ᐊᖏᕈᑕᐅᓯᒪᓚᐅᖅᐳᖅ ᒍᕇᑦ 9-ᒥ ᐃᓕᓐᓂᐊᖅᑎᓄᑦ ᐃᓕᓐᓂᐊᖅᑎᑕᐅᖁᔭᐅᑉᓗᓂ ᓈᓴᐅᑎᓕᕆᓂᕐᒧᑦ ᐋᓐᓂᐊᖃᕐᓇᖏᑦᑐᓕᕆᓂᕐᒧᓪᓗ ᐃᓕᓐᓂᐊᕈᑕᐅᑉᓗᓂ.

ᐃᓕᓐᓂᐊᖅᑎᑎᔨ ᓗᐃᑦ ᕗᕋᐃᓐᓯᔅ ᐅᖃᓚᐅᖅᐳᖅ ᐃᓕᓐᓂᐊᖅᑎᑦ ᐃᓕᓐᓂᐊᖅᑎᑕᐅᓚᐅᖅᐳᑦ ᑮᓇᐅᔭᓂᒃ ᒥᐊᓂᖅᓯᑦᓯᐊᕐᓂᕐᒥᒃ, ᓂᐅᕕᐊᒃᓴᖃᕐᓂᖅ ᐊᒻᒪ ᖃᓄᖅ ᑖᒃᓰᔭᐃᔭᕈᑎᑦ ᐱᓕᕆᐊᕆᔭᐅᕙᖕᓂᖏᓐᓄᑦ ᓂᐅᕕᐊᒃᓴᓄᑦ ᐋᖅᑭᒃᑕᐅᑉᓗᑎᒃ.

ᐃᓕᓐᓂᐊᖅᑎᑦ ᐃᓕᓐᓂᐊᕐᕕᐅᑉ ᓯᓚᑖᓄᐊᓚᐅᖅᐳᑦ ᖃᐅᔨᓴᕆᐊᖅᖢᑎᒃ ᓂᐅᕕᐊᒃᓴᓂᒃ ᓂᐅᕕᕐᕕᖕᒥ ᑯᐊᐸᒃᑯᓐᓂᓗ ᓄᓇᒥᖕᓂ.

ᑕᒪᒃᑯᐊ 90 ᓂᐅᕕᐊᒃᓴᐃᑦ ᖃᐅᔨᓴᖅᑕᐅᑉᓗᑎᒃ, ᐃᓕᓐᓂᐊᖅᑎᑦ ᖃᐅᔨᓚᐅᖅᐳᑦ 37-ᖏᑦ ᐊᑭᑭᓐᓂᖅᓴᐅᓚᐅᖅᖢᑎᒃ ᓂᐅᕕᕐᕕᖕᒥ, 32 ᐊᑭᑭᓐᓂᖅᓴᐃᑦ ᑯᐊᐸᒃᑯᓐᓂ, ᐊᒻᒪ 21 ᐊᔾᔨᒌᒃᑐᓂᒃ ᐊᑭᖃᖅᖢᑎᒃ ᑕᒪᒃᑭᖕᓂ ᓂᐅᕕᕐᕕᖕᓂ.

ᕗᕋᐃᓐᓯᔅ ᐅᖃᓚᐅᖅᐳᖅ ᐃᓕᓐᓂᐊᖅᑎᑦ ᐃᓕᑉᐹᓪᓕᕈᑎᖃᕈᒪᓚᐅᕐᒪᑕ ᓱᖕᒪᑦ ᐊᑭᑐᓗᐊᕐᒪᖔᑕ ᓄᓇᒥᖕᓂ ᓂᐅᕕᐊᒃᓴᐃᑦ.

“ᑕᒪᒃᑯᐊ ᐃᓕᓐᓂᐊᖅᑎᑦ 18 ᐃᓚᐅᓚᐅᖅᐳᑦ ᖃᐅᔨᓴᕈᑎᖃᖅᖢᑎᒃ ᐊᑭᖏᓐᓂᒃ, ᐊᒻᒪ ᑕᒪᓐᓇᓗ ᖁᕕᐊᒋᔭᐅᓚᐅᖅᖢᓂ ᑲᒪᓇᕆᔭᐅᓚᐅᖅᖢᓂ,” ᐅᖃᓚᐅᖅᐳᖅ.

“ᐊᕕᒃᑐᖅᓯᒪᑉᓗᑎᒃ 9−ᖑᖅᓯᒪᑉᓗᑎᒃ ᒪᕐᕈᐃᓕᖓᔪᑦ, ᐊᑐᓂ ᑕᒪᒃᑯᐊ ᑕᐱᕇᑦ ᒪᕐᕈᐃᓕᖓᑎᑕᐅᔪᑦ ᖁᓕᓂᒃ ᐊᔾᔨᒌᖏᑦᑐᓂᒃ ᖃᐅᔨᓴᕆᐊᖃᓚᐅᖅᖢᑎᒃ, ᖃᐅᔨᓚᐅᖅᐳᓪᓗ, ᑕᒪᐃᑎᒍᑦ ᓂᐅᕕᕐᕕᖕᓂ ᐊᔾᔨᒌᑲᓴᓚᐅᕐᒪᑕ ᐊᑭᖏᑦ.”

ᓇᐅᔮᓂ ᑯᐊᐸᒃᑯᑦ ᐊᐅᓚᑦᓯᔨᖓᑦ ᑐᕈᐃ ᓚᐸᓛᒃ ᐃᓕᓐᓂᐊᕐᕕᓕᐊᓚᐅᖅᐳᖅ ᐅᖃᓪᓚᒋᐊᖅᑐᖅᓯᒪᑉᓗᓂᓗ ᐃᓕᓐᓂᐊᖅᑎᓄᑦ ᓱᖕᒪᑦ ᐊᑭᖏᑦ ᑕᐃᒪᓐᓇ ᐋᖅᑭᒃᑕᐅᓯᒪᖕᒪᖔᑕ, ᖃᑉᓯᓂᒡᓗ ᑮᓇᐅᔭᐃᔭᖃᑦᑕᕐᓂᖏᑦ ᐱᓕᕆᔨᓄᑦ 43-ᓄᑦ ᐱᓕᕆᔨᓄᑦ ᑯᐊᐸᒃᑯᓐᓂ, ᐊᒻᒪ ᐊᔾᔨᒌᖏᓐᓂᖏᑦ ᑎᑭᑎᑕᐅᒋᐊᖃᕐᓂᖏᑦ ᐅᒥᐊᕐᔪᐊᒃᑯᑦ ᐊᒻᒪ ᑎᖕᒥᓲᒃᑯᑦ.

ᓚᐸᓛᒃ ᓈᓴᐅᑎᓕᕆᓂᕐᒥᒃ ᐃᓕᓐᓂᐊᖅᑎᑦᓯᑉᓗᓂ ᐃᓕᓐᓂᐊᖅᑎᓂᒃ, ᐊᒥᓱᓪᓗ ᖃᐅᔨᓚᐅᖅᐳᑦ ᐊᔾᔨᒌᖏᓐᓂᖏᓐᓂᒃ ᐅᒥᐊᕐᔪᐊᒃᑯᑦ ᑎᑭᑎᑕᐅᔪᑦ ᑎᖕᒥᓲᒃᑯᓪᓗ ᑐᑭᓯᕚᓪᓕᕈᑕᐅᓚᐅᖅᖢᓂᓗ, ᐊᑭᖏᓪᓗ ᖃᐅᒻᒪᖁᑎᑦ ᐅᖅᓱᐊᓗᖏᓪᓗ ᓂᐅᕕᕐᕕᖕᓂ ᐊᑐᖅᑕᐅᒋᐊᖃᖅᐸᒃᑐᑦ.

ᑭᓐᑐᕋ ᑭᖓᔭᒃ ᖁᕕᐊᒋᔭᖃᓚᐅᖅᖢᓂ ᐃᓕᓐᓂᐊᕈᑎᓂᒃ ᐊᒻᒪ ᐅᖃᓚᐅᖅᐳᖅ ᑕᒪᒃᑯᐊ ᐃᓕᑉᐹᓪᓕᕈᑎᒋᓚᐅᖅᑕᖏᑦ ᓂᕆᐅᒋᓚᐅᖏᑉᐸᖏᑦ.

“ᓂᕆᐅᒋᓚᐅᖏᑉᐸᒃᑲ ᐊᔾᔨᒌᖏᓐᓂᖏᑦ ᑎᑭᑎᑕᐅᑎᓪᓗᒋᑦ ᐅᒥᐊᕐᔪᐊᒃᑯᑦ ᑎᖕᒥᓲᒃᑯᓪᓗ,” ᐅᖃᓚᐅᖅᐳᖅ ᑭᖓᔭᒃ.

“ᖃᐅᔨᒪᓚᐅᖏᓐᓇᒪ ᑎᖕᒥᓲᒃᑯᑦ ᐊᑭᑐᓂᖅᓴᐅᖃᑦᑕᕐᒪᑕ ᐅᓯᔭᐅᔪᑦ.”

ᒥᓚᓂ ᑲᐅᓇᒃ ᐅᖃᓚᐅᖅᐳᖅ ᓂᕆᐅᓚᐅᖏᒻᒥᒐᒥ ᐃᓕᑉᐹᓪᓕᓚᐅᖅᖢᓂᓗ ᐊᓯᖏᓐᓄᑦ ᐊᑭᓕᐅᑕᐅᒃᑲᓐᓂᕆᐊᖃᖃᑦᑕᕐᒪᑕ ᑯᐊᐸᒃᑯᑦ, ᓂᐅᕕᖅᑎᒃᑯᓪᓗ, ᐊᓯᖏᓪᓗ ᓂᐅᕕᕐᕕᑦ.

“ᖃᐅᔨᑉᓗᒋᑦ ᑕᒪᒃᑯᓂᖓ ᐊᑭᓕᐅᑕᐅᒋᐊᖃᖅᐸᒃᑐᓂᒃ ᑕᒪᒃᑯᓄᖓ − ᐅᖅᓱᐊᓗᖕᒧᑦ, ᐊᒃᑕᖅᑕᐅᓂᕐᒧᑦ, ᖃᐅᒻᒪᖁᑎᓄᑦ, ᑮᓇᐅᔭᓕᐅᕈᑎᓄᑦ ᐱᓕᕆᔨᖏᓐᓄᑦ − ᑕᐃᒪᓐᓇ ᓂᕿᐅᑉ ᐊᑭᖓᓄᐊᖅᑕᐅᖃᑦᑕᖅᐳᑦ,” ᐅᖃᓚᐅᖅᐳᖅ ᑲᐅᓇᒃ.

ᐳᕆᔾᔭᒃ ᒪᓕᑭ ᑐᑭᓯᐅᒪᓂᕋᖅᖢᓂᐅᒃ ᐊᑭᑐᓂᖓᓄᑦ ᐊᑭᓕᐅᑕᐅᒋᐊᖃᖅᐸᒃᑐᑦ, ᓱᓕ ᐊᑭᖏᑦ ᓂᐅᕕᐊᒃᓴᐃᑦ ᐊᑭᑐᓗᐊᖅᐳᑦ.

“ᐊᑭᑐᔪᒻᒪᕆᐊᓗᖕᓂᒃ ᐊᑭᓕᖅᑐᐃᒐᑉᑕ ᓂᕿᓄᑦ ᓇᐅᔮᓂ,” ᐅᖃᓚᐅᖅᐳᖅ ᒪᓕᑭ.

“ᑎᒥᒧᑦ ᐱᐅᔪᑦ ᓂᕿᑦ, ᐱᓗᐊᖅᑐᒥᒃ, ᐊᑭᑭᓐᓂᖅᓴᐅᒋᐊᖃᖅᐳᑦ.”

ᑎᐊᕈ ᐊᖑᑎᖑᐊ ᑕᑯᓐᓇᖅᐸᖓ ᑕᒪᓐᓇ ᐃᒥᐅᑦ ᑕᑖᕐᓂᖅᓴᐅᓂᖓᓄᑦ ᓲᕐᓗ, ᐃᓕᓐᓂᐊᖃᑎᖓ ᑎᒍᒥᐊᖅ ᕼᐊᖅᐱ, ᓄᖑᑉᐸᓪᓕᐊᓂᖓᓄᑦ ᐃᒪᖅ.

“ᐊᑭᑭᒡᓕᕙᓪᓕᐊᓂᐊᖅᐳᑦ,” ᐅᖃᓚᐅᖅᐳᖅ ᐊᖑᑎᖑᐊ.

“ᑕᐃᒪᓐᓇ ᓯᑯᖃᓕᖅᐸᑦ ᐅᒥᐊᕐᔪᐊᖅᑕᖃᕐᓂᖅᓴᐅᓂᐊᖅᐳᖅ ᑎᑭᑕᐅᓗᑕᓗ ᐅᒥᐊᕐᔪᐊᒧᑦ ᑕᒡᕗᖓ, ᐃᒻᒪᖄᓗ ᖃᖓᐅᒐᓗᐊᑭᐊᖅ, ᐊᖅᑯᑎᑕᖃᕈᒫᖅᐳᖅ ᖃᑉᓗᓈᑦ ᓄᓇᖓᓐᓄᑦ.”
ᕼᐊᖅᐱ ᐅᖃᓚᐅᖅᐳᖅ ᑕᐃᒪᓐᓇ ᑭᐳᖔᖓᒍᑦ ᖃᓄᐃᓕᐅᕐᓂᐊᖅᑐᖃᕐᓂᖓᓄᑦ.

“ᐊᑭᑦᑐᖅᐸᓪᓕᐊᑐᐃᓐᓇᕐᓂᐊᕐᒪᑕ ᓂᕿᑦ, ᖃᑉᓗᓈᑦ ᓄᓇᖓᓐᓂᓘᓐᓃᑦ, ᐊᑭᑦᑐᖅᐸᓪᓕᐊᖕᒪᑕ, ᐊᑭᑦᑐᖅᕈᐸᓪᓕᐊᑐᐃᓐᓇᕐᓂᐊᖅᐳᑦ ᑕᒫᓂ,” ᐅᖃᓚᐅᖅᐳᖅ ᕼᐊᖅᐱ.

Leave a Comment:

Your email address will not be published. Required fields are marked *