ᐃᑲᔪᖅᑐᑦ ᑎᖕᒥᓲᓕᕆᔨᒃᑯᑦ

by Darrell Greer- January 9, 2018

ᓇᓗᓇᖏᑉᐳᖅ ᐊᐅᓚᑦᓯᔨᖏᓪᓗ ᐱᓕᕆᔨᖏᓪᓗ ᑳᒻᒥᐊᒃᑯᑦ ᓴᕆᒪᓱᖃᑦᑕᕐᒪᑕ ᐱᔨᑦᓯᕋᕆᐊᒃᓴᖅ ᐃᓄᖕᓂᑦ ᐊᕐᕌᒍᑕᒫᖅᓯᐅᑎᒥ ᖁᕕᐊᓱᒡᕕᖕᒥ ᓂᕆᕕᒡᔪᐊᖅᑎᑦᓯᖃᑦᑕᖅᖢᑎᒃ ᑭᕙᓪᓕᕐᒥ ᓄᓇᓕᖕᓂ.

ᓄᓇᓕᖕᓂ ᐃᓕᓐᓂᐊᖅᑐᓕᕆᓂᕐᒧᑦ ᑲᑎᒪᔨᑦ ᐊᐅᓚᑦᓯᔨᖓᑦ ᕕᓐᑎ ᑲᑐᕋ, ᓴᐅᒥᐊᓂ ᐊᒻᒪ ᓴᓗᒻᒪᖅᓴᐃᔨᑦ ᔪᓕᐊ ᓯᐅᓵᕐᓇᒃ ᐊᒻᒪ ᒥᐅᕆ ᑭᓪᓚᐱᒃ ᐅᑐᕿᔪᑦ ᓂᕆᓂᐊᖅᑕᒥᓂᒃ ᑳᒻᒥᐊᒃᑯᑦ ᐊᕐᕌᒍᑕᒫᖅᓯᐅᑎᒥᒃ ᓂᕆᕕᒡᔪᐊᖅᑎᑦᓯᑎᓪᓗᒋᑦ ᓇᐅᔮᓂ ᑎᓴᐱᕆ 1, 2017-ᒥ.

ᐱᓕᕆᖃᑎᖃᖅᖢᑎᒃ ᐃᓕᓐᓂᐊᕐᕕᖕᒥ ᐱᓕᕆᔨᓂᒃ ᓂᕆᕕᒡᔪᐊᖅᑎᑕᐅᖁᑉᓗᒋᑦ ᑭᕙᓪᓕᕐᒥᐅᑦ ᐅᑭᐅᓄᓪᓗ ᐊᕙᑎᑲᓴᐅᓕᖅᑐᓄᑦ ᐱᓕᕆᐊᕆᐅᓯᒪᓕᖅᖢᓂ.

ᓂᐅᕕᐊᒃᓴᓕᕆᓂᕐᒧᑦ ᐊᐅᓚᑦᓯᔨᖓᑦ Stephanie Thiessen, ᑎᑎᕋᖅᓯᒪᔪᖅᑕᖃᕐᒪᑦ ᑕᐃᑉᓱᒪᓂᑐᖃᖅ 2003-ᒥ ᓂᕆᕕᒡᔪᐊᖅᑎᑦᓯᖃᑦᑕᕆᐊᓕᓚᐅᖅᓯᒪᖕᒪᑕ.

ᐅᖃᓚᐅᖅᖢᓂᓗ ᓂᕆᕕᒡᔪᐊᖅᑎᑦᓯᓂᖅ ᐱᒻᒪᕆᐅᑎᑕᐅᑉᓗᓂᓗ ᑎᖕᒥᓲᓕᕆᔨᒃᑯᓐᓄᑦ.

“ᑕᐃᒪᓐᓇᐃᓕᐅᖏᓐᓇᕐᓂᐊᖅᐳᒍᑦ ᐊᕐᕌᒍᑕᒫᑦ, ᐊᒻᒪ ᐱᓗᐊᖅᑐᒥᒃ ᖁᕕᐊᓱᖕᓇᒥ, ᐊᒃᓱᕈᕐᓇᕋᓗᐊᖅᑎᓪᓗᒍ ᐃᓛᓐᓂᒃᑯᑦ ᑎᑭᓐᓇᓱᐊᕐᓗᓂ ᓄᓇᓕᖕᒧᑦ ᐱᔨᑦᓯᕋᕐᓂᐊᕐᓗᓂ ᓂᕆᑎᑦᓯᑦᓯᐊᕐᓗᓂ ᐃᓕᓐᓂᐊᖅᑎᓄᑦ, ᐃᓐᓇᑐᖃᓄᑦ ᐃᓕᓐᓂᐊᕐᕕᖕᒥ ᐱᓕᕆᔨᓄᑦ ᑕᐃᒪᓐᓇ ᐃᑲᔪᕈᑎᖃᕈᓐᓇᕋᑉᑕ.

“ᐊᒻᒪ, ᑕᐃᒪᓐᓇ ᖁᕕᐊᓱᒡᕕᐅᑎᓪᓗᒍ ᐃᑲᔪᕆᐊᒃᓴᖅ ᑕᐃᒪᓐᓇ ᐱᓗᐊᖅᑐᒥᒃ ᐱᒻᒪᕆᐅᑦᓯᐊᖅᐳᖅ ᐅᕙᑉᑎᓐᓄᑦ.”

ᑳᒻᒥᐊᒃᑯᑦ ᒪᕐᕈᐃᖅᑕᖅᖢᑎᒃ ᖁᕕᐊᓱᒡᕕᖕᒥ ᓂᕆᕕᒡᔪᐊᖅᑎᑦᓯᓚᐅᕐᒪᑕ ᓇᐅᔮᓂ ᐊᒻᒪ ᐱᖓᔪᖓᓂ ᑎᑭᕋᕐᔪᐊᒥ.

ᑲᑎᑦᖢᒋᑦ, ᑎᖕᒥᓲᓕᕆᔨᒃᑯᑦ ᐊᑭᓕᖅᑐᖅᑕᐅᖏᑦᖢᑎᒡᓗ ᐃᑲᔪᖅᑎᒋᔭᐅᕙᒃᑐᑦ ᓂᕆᕕᒡᔪᐊᖅᑕᐅᓂᐊᖅᑐᓂᒃ ᓂᕿᓕᐅᖅᖢᑎᒃ ᐸᕐᓇᖃᑕᐅᕙᒃᑐᑦ 900 ᐃᓕᓐᓂᐊᖅᑎᑦ ᐊᒻᒪ ᓄᓇᓕᖕᓂᒥᐅᑦ, ᐊᒻᒪ 100 ᐸᐅᓐᓂᒃ ᐅᖁᒪᐃᓐᓂᖃᖅᑐᓂᒃ ᐃᓚᒃᓴᓕᐅᖅᖢᑎᒃ ᐃᓗᐊᓂ ᐊᑭᒋᕐᔪᐊᑉ ᐊᒻᒪ 800 ᐸᐅᓐᔅ ᐅᖁᒪᐃᓐᓂᖃᖅᑐᑦ ᐸᑕᐃᑐᐃᑦ, ᑐᓂᐅᖃᐃᑉᓗᑎᒡᓗ 415 ᐸᐅᓐᔅᓂᒃ ᐅᖁᒪᐃᓐᓂᖃᖅᑐᓂᒃ ᒥᓗᑲᑖᓂᒃ.

ᑳᒻᒥᐊᒃᑯᑦ ᓂᕆᕕᒡᔪᐊᖅᑎᑦᓯᓚᐅᖅᐳᑦ 300 ᐅᖓᑖᓄᑦ ᐃᓕᓐᓂᐊᖅᑎᓂᒃ, ᐃᓐᓇᑐᖃᓂᒃ ᐃᓕᓐᓂᐊᕐᕕᖕᒥ ᐱᓕᕆᔨᓂᒡᓗ ᑐᓴᕐᕕᖕᒥ ᐃᓕᓐᓂᐊᕐᕕᐊᓛᖓᓂ ᐊᒻᒪ ᓱᓕᒃᑲᓐᓂᖅ ᐃᓄᐃᑦ 250 ᑑᒑᓕᒃ ᐃᓕᓐᓂᐊᕐᕕᒡᔪᐊᖓᓂ ᓇᐅᔮᓂ, ᐊᒻᒪ ᐱᖓᔪᖓᓂ ᓂᕆᕕᒡᔪᐊᖅᑎᑦᓯᓕᕆᑉᓗᑎᒃ 400-ᓄᑦ ᑎᑭᕋᕐᔪᐊᒥ.

ᑑᒑᓕᒃ ᐃᓕᓐᓂᐊᕐᕕᒡᔪᐊᖓᓐᓂ ᐊᖓᔪᖄᑉ ᑐᖏᓕᖓ ᔪᓕᐊ ᒪᒃᐴᓴᓐ ᐅᖃᓚᐅᖅᐳᖅ ᓂᕆᕕᒡᔪᐊᕐᓇᐅᓚᐅᖅᑐᖅ ᓇᐅᔮᓂ ᑲᔪᓯᑦᓯᐊᓚᐅᕐᒪᑦ.

ᐅᖃᓚᐅᖅᖢᓂᓗ ᐊᒥᓱᑦ ᐃᓄᐃᑦ ᐃᑲᔪᓚᐅᖅᐳᑦ ᐊᔾᔨᐅᖏᑦᑑᖁᔭᐅᑉᓗᓂ ᐊᑐᖅᑕᐅᔪᖅ ᓄᓇᓕᖕᓂᒥᐅᑕᓄᒃᑖᓄᑦ.

“ᐃᓕᓐᓂᐊᖅᑎᑦ, ᒍᕇᑦ 7-ᒥᑦ ᒍᕇᑦ 12-ᒧᑦ, ᖁᕕᐊᓱᑦᓯᐊᓚᐅᖅᐳᑦ ᓂᕆᕕᒡᔪᐊᖅᑎᑕᐅᓂᕐᒧᑦ ᐃᓕᓐᓂᐊᕐᕕᒡᔪᐊᒥ ᐃᓚᖏᓪᓗ ᓂᕿᒃᓴᖅᓯᐅᒃᑲᓐᓂᓚᐅᖅᖢᑎᒃ ᐃᓚᖏᑦ ᐱᖓᓱᐊᖅᑎᒻᒪᕆᒃᖢᑎᒃ,” ᐅᖃᓚᐅᖅᐳᖅ ᒪᒃᐴᓴᓐ.

“ᓂᕆᕕᒡᔪᐊᕌᓂᖕᒪᑕ, 22−ᓂᒃ ᐴᖅᓯᓚᐅᖅᐳᒍᑦ ᐊᒥᐊᒃᑯᓂᒃ ᓂᕿᓂᒃ, ᐊᒻᒪ ᐅᕙᖓᓗ ᐱᖓᓱᓪᓗ ᐃᓕᓐᓂᐊᖅᑎᑦ ᑐᓂᐅᖃᓚᐅᖅᐸᕗᑦ ᐅᐃᖃᖏᑦᑐᓄᑦ ᓄᓕᐊᖃᖏᑦᑐᓄᓪᓗ ᐃᓚᒌᓄᑦ ᓄᑕᕋᓕᖕᓄᑦ ᓂᕿᖃᑦᓯᐊᖁᑉᓗᒋᑦ ᓄᓇᓕᖕᒥ.”

ᐅᑭᐅᓂ ᐊᒥᓱᓂ, ᑳᒻᒥᐊᒃᑯᑦ ᖁᕕᐊᓲᓯᐊᒃᓴᓂᒃ ᐊᒡᔭᖅᑐᐃᓯᒪᑉᓗᑎᒡᓗ ᓄᓇᓕᖕᓄᑦ ᐊᑐᓂ ᓂᕆᕕᒡᔪᐊᖅᑎᑦᓯᑉᓗᑎᒡᓗ, ᑭᓯᐊᓂ ᐊᕐᕌᒍᒥ ᐊᑐᖅᑐᒥ ᐊᔾᔨᐅᖏᑦᑐᒥᒃ ᐱᓕᕆᐊᖃᓚᐅᖅᐳᑦ.

Thiessen ᐅᖃᓚᐅᖅᐳᖅ ᓯᕗᓪᓕᕐᒥ ᓯᕗᓪᓕᖅᐹᑦᓯᐊᒥᓗ, ᑎᖕᒥᓲᓕᕆᔨᒃᑯᑦ ᓂᕿᓂᒃ ᖁᕕᐊᓲᓯᐊᖅᑎᑦᓯᓚᐅᖅᐳᑦ ᐊᒻᒪ ᐊᐱᕆᑉᓗᑎᒃ ᐃᓕᓐᓂᐊᕐᕕᖕᒥ ᓱᓇᓂᒃ ᐱᒍᒪᒐᔭᕆᐊᒃᓴᖏᓐᓄᑦ ᐃᓕᓐᓂᐊᕐᕕᖕᒥ ᐊᑐᖅᑕᐅᔪᒃᓴᓂᒃ.

ᐅᖃᓚᐅᖅᖢᓂᓗ ᐃᓄᕐᓚᒃ ᐃᓕᓐᓂᐊᕐᕕᖓ ᑎᑭᕋᕐᔪᐊᒥ ᑐᒃᓯᕋᓕᓚᐅᖅᐳᑦ ᑎᖕᒥᓲᓕᕆᔨᒃᑯᓐᓂᑦ.

“ᑎᑭᕋᕐᔪᐊᒥ ᐃᓕᓐᓂᐊᕐᕕᖕᒥ ᓂᕿᓕᕆᓂᕐᒧᑦ ᐃᓕᓐᓂᐊᕐᕕᖃᕐᒪᑦ ᐃᓕᓐᓂᐊᕐᕕᒡᔪᐊᒥ ᐃᓕᓐᓂᐊᖅᑎᓄᑦ ᐃᓕᓐᓂᐊᕈᑕᐅᓂᐊᖅᖢᓂᓗ, ᑕᐃᒪᓐᓇ ᐊᑐᒐᒃᓴᖃᕆᐊᖃᓪᓚᕆᒃᖢᑕᓗ.

“ᑕᐃᒪ ᑎᑭᓴᐃᓗᐊᓚᐅᕋᑉᑕ ᓴᓗᒻᒪᖅᓴᐃᒍᑎᒃᓴᓂᒃ, ᐊᓘᑎᓂᒃ ᐊᓯᖏᓐᓂᒃ ᐊᒻᒪ ᑕᒪᒃᑯᓂᖓ ᐊᒥᐊᒃᑯᓂᒃ ᕿᒪᑐᐃᓐᓇᓚᐅᖅᐸᕗᑦ ᓄᓇᓕᖕᒧᑦ.

“ᐃᓕᓐᓂᐊᕐᕕᖕᒥ ᐱᓕᕆᔨᑦ ᐊᒻᒪ ᑕᒪᕐᒥᒃ ᓄᓇᓕᖕᓂᒥᐅᓪᓗ, ᐃᓕᓐᓂᐊᕐᕕᖕᒥ ᐊᖓᔪᖄᕆᔭᐅᔪᓪᓗ, ᐃᓕᓐᓂᐊᖅᑎᑦᓯᔨᓪᓗ ᐃᓕᓐᓂᐊᖅᑎᓪᓗ ᖁᔭᓐᓇᒦᑦᓯᐊᓚᐅᖅᐳᑦ ᐃᑲᔪᖅᑕᐅᓂᕐᒧᑦ ᐃᑲᔪᕆᐊᒃᓴᕐᓗ ᑕᐃᑲᓃᑎᑕᐅᑎᓪᓗᑕ ᐊᒃᓱᕈᑎᖃᑎᒌᓚᐅᖅᐳᒍᑦᔭ

“ᓄᓇᓕᖕᓂᒥᐅᑦ ᐊᒻᒪ ᑲᑉᐸᓂᕗᑦ ᑕᒪᕐᒥᒃ ᐃᑲᔪᖅᑎᒌᑦᓯᐊᓚᐅᖅᐳᑦ ᑕᐃᑲᓃᑎᓪᓗᑕ ᓂᕆᕕᒡᔪᐊᕐᓇᖅ ᑲᔪᓯᑦᓯᐊᖁᑉᓗᒍ.”

ᐊᒥᓲᓂᖃᖅᑐᑦ ᐊᕙᑎᑦ ᐅᖓᑖᓄᑦ ᑳᒻᒥᐊᒃᑯᓐᓂ ᐱᓕᕆᔨᑦ ᓇᐅᔮᓄᓪᓗ ᑎᑭᕋᕐᔪᐊᒧᓪᓗ ᑎᑭᖃᑕᐅᓚᐅᖅᐳᑦ ᐃᑲᔪᕆᐊᖅᓯᒪᑉᓗᑎᒃ ᓂᕿᓕᐅᕐᓂᕐᒧᑦ.

ᑕᐃᒪᓘᓐᓃᑦ Thiessen ᐅᖃᓚᐅᖅᐳᖅ, ᐊᒥᓱᑦ ᐱᓕᕆᔨᑦ ᐊᑎᕐᒥᖕᓂᒃ ᐃᓕᓯᓚᐅᖅᐳᑦ ᐃᑲᔪᕆᐊᕈᒪᑉᓗᑎᒃ ᐊᑭᓕᖅᑐᒐᐅᖏᓪᓗᑎᒃ ᐃᓚᖏᑦ ᕿᐱᓗᒃᑕᐅᒋᐊᖃᓚᐅᖅᐳᑦ ᐃᓂᒃᓴᖃᓚᐅᖏᓐᓂᖏᓐᓄᑦ ᓄᓇᓕᖕᓂ ᒪᕐᕉᖕᓂ.

ᑕᒪᐃᓐᓂᒃ ᐃᑲᔪᕈᒪᔪᓂᒃ ᐃᑭᒪᑎᑦᓯᒍᓐᓇᖏᒻᒪᑕ ᐃᓂᒃᓴᖃᖏᑦᖢᑎᒡᓗ ᐊᑐᓂ ᓄᓇᓕᖕᓂ ᐃᑲᔪᖅᑎᖃᕆᐊᒃᓴᖅ ᐃᖢᐊᕐᓂᖅᓴᐅᕗᖅ.

“ᖁᔭᓐᓇᒦᖅᑕᐅᓚᐅᖅᐳᑦ ᐳᑭᖅᑕᓕᑦ ᓇᐅᔮᓄᐊᖅᑎᓪᓗᑕ ᐃᑲᔪᓚᐅᖅᖢᑎᒡᓗ ᓂᖅᖠᐅᖃᑕᐅᓂᕐᒧᑦ ᓂᕆᕕᒡᔪᐊᖅᑕᐅᓂᐊᖅᑐᓂᒃ.

“(ᑕᐃᑲᓃᖃᑕᐅᑉᓗᓂ) ᓂᕆᕕᒡᔪᐊᕐᓇᐅᔪᓂ ᖁᕕᐊᓇᑦᓯᐊᖅᐳᖅ ᑲᑎᑦᓯᑉᓗᓂ ᐃᓄᖕᓂᒃ ᑲᑎᓚᐅᖅᓯᒪᖏᑕᕐᓂᒃ, ᐃᓚᒌᒃᑐᓗᒃᑖᖑᔮᖅᖢᑕᓗ, ᓂᕆᖃᑎᒌᒃᖢᑕᓗ.

“ᑕᐃᒪᓐᓇ ᖃᐅᔨᒪᖃᑦᑕᐅᑎᓕᕐᓇᖅᐳᖅ ᓂᕿᓕᐅᖃᑎᒌᒃᖢᓂ ᐅᓐᓄᒃᑯᑦ ᐊᖃᒍᕐᓗ ᓂᖅᖠᐅᖃᑕᐅᓕᖅᖢᓂ.

“ᓄᑕᐅᑦᑐᒥ ᓲᕐᓗ ᑕᐃᑉᓱᒪᓂᑐᖃᖅ ᖁᕕᐊᓱᒡᕕᒃᓯᐅᖅᑐᒍᑦ.

Leave a Comment: