ᐃᓄᖕᓄᑦ ᑐᕌᖅᑐᓂᒃ ᐱᑕᖃᓗᐊᔮᖏᒻᒥᔪᖅ $40B-ᒥ

NNSL- December 1, 2017

ᑕᐃᓱᒪᖓᓂᓂᑦ ᐅᖃᐅᓯᖃᓕᕌᖓᑕ ᐃᒡᓗᓕᕆᔪᑎᓂᒃ ᓄᓇᕗᒥ, ᐃᒪᓐᓇ ᐅᖃᒐᔪᖕᒪᑕ ᒐᕙᒪᑎᑐᖃᒃᑯᑦ ᐃᓄᐃᑦ ᓄᓇᓕᖕᓄᑦ ᓄᒃᑎᖅᐸᑕ ᐃᒡᓗᖃᖅᑎᑕᐅᓂᐊᕐᓂᕋᖅᑕᐅᓪᓗᑎᒃ.

ᑭᓯᐊᓂᓕ ᕿᒥᕐᕈᓪᓗᒋᑦ ᓄᓇᕗᒥᐅᑦ ᐃᒡᓗᖃᖅᑎᑕᐅᔪᓯᖏᑦ, ᐱᓗᐊᖑᐊᖅᑐᒥᒃ ᒐᕙᒪᑎᒃᑯᓐᓂᑦ ᐊᑐᖅᑐᐊᒐᓂᒃ ᐃᒡᓗᓂᒃ ᐃᓄᖅᓴᐃᓐᓇᓲᖑᖕᒪᑕ ‘ᕿᓚᓈᕆᔭᐅᔪᓂᑦ’ ᑲᓇᑕᒥᐅᓄᑦ ᐃᓄᖅᓴᓗᐊᖃᑦᑕᕐᓂᖏᓐᓄᑦ.

ᑕᒪᑐᒪᓂ ᐱᓇᓱᐊᕈᓯᑦᑎᓐᓂ $40-ᐱᓕᐊᓐᑖᓚᓂᒃ ᑲᓇᑕᒥ ᐃᒡᓗᓕᕆᔪᑎᒃᓴᓄᑦ ᒐᕙᒪᑎᑐᖃᒃᑯᑦ ᐊᓯᔾᔩᓂᕋᖅᑐᑦ ᐱᒻᒪᕆᐅᔫᒐᓗᐊᖅ ᑭᓯᐊᓂᓕ ᑕᑯᒃᓴᐅᓂᖅᓴᐅᓂᐊᖅᑰᕐᒪᑦ ᖃᓪᓗᓈᓂ ᐃᒡᓗᖃᖏᑦᑐᓂᒃ ᑲᒪᔪᑕᐅᖔᕐᓗᑎᒃ.

ᐸᕐᓇᐃᔪᑕᐅᓯᒪᔪᑦ ᐊᑕᐅᑦᑎᒃᑯᑦ ᐅᖃᐅᓯᐅᓚᐅᕐᒪᑕ ᓄᓇᓕᐸᐅᔭᓂ ᕚᓐᑰᕙᒥ ᑐᕌᓐᑐᒥᓗ, ᑖᒃᑯᐊ ᓄᓇᓕᖏᓐᓂ ᐊᖏᕐᕋᖃᖏᑦᑐᑦ ᐅᓂᒃᑳᖏᑦ ᐊᒥᓲᖃᑦᑕᕐᒥᖕᒪᑕ ᐊᑭᑭᑦᑐᓂᒃ ᐃᒡᓗᑭᒃᓴᖅᑐᑦ. ᑖᒃᑯᓄᖓᖔᖅ ᓄᓇᓕᐸᐅᔭᓄᑦ ᑎᒍᔨᔭᐅᖓᖃᑦᑕᕐᒪᑕ ᐊᖏᕐᕋᑦᑎᐊᕙᐅᓂᖅᓴᑦ – ᑕᐃᒪᐃᓐᓂᖓᓄᑦ ᐊᑭᑭᓐᓂᖅᓴᓂᒃ ᐊᑐᖅᑐᐊᒐᓂᒃ ᓄᖒᔨᔭᐅᓴᐅᑎᒋᖃᕐᑕᕋᑦᑕ ᑕᒪᓐᓇ ᐊᒃᓱᕉᑕᐅᓗᐊᓕᖃᑦᑕᖅᐳᑦ ᑕᒫᓂᕐᒥᐅᑐᖃᓄᑦ – ᐃᓄᒋᐊᓗᐊᓕᖃᑦᑕᕐᒪᑕ ᐃᒡᓗᒥᐅᑕᐃᑦ ᐸᖕᒥᐅᖅᑐᑦ ᐃᒡᓗᑭᒃᓴᓗᐊᓕᕌᖓᑕ ᐊᑭᑦᑐᓗᐊᖃᑦᑕᕐᒪᑕ ᑕᒪᐃᓐᓂ ᐃᒡᓗᐃᑦ ᓄᓇᓕᐸᐅᔭᓂ ᑖᒃᑯᓇᓂ ᓄᓇᓕ`ᖕᒥᐅᓄᑦ ᐊᑭᑐᓗᐊᓕᖃᑦᑕᕐᒪᑕ ᐃᓄᒋᐊᓗᐊᒧᑦ.

ᕚᓐᑰᕙᒥ ᐱᕙᓪᓕᐊᔪᓕᕆᔨᖏᑦ ᐅᓂᒃᑳᖃᑦᑕᖅᓯᒪᖕᒪᑕ ᐃᒡᓗᖃᖏᑦᑐᓂᒃ ᑭᒡᒐᖅᑐᖅᑎᖏᑦ ᕿᓚᓈᕐᓂᕋᖅᖢᑎᒃ ᑲᓇᑕᒥ ᐃᒡᓗᓕᕆᔪᑎᓄᒃ ᐸᕐᓇᐃᔪᑕᐅᓯᒪᔪᑦ – ᓯᕗᓪᓕᖅᐹᒥ ᑐᓴᖅᑕᐅᓂᕋᖅᑕᐅᓪᓗᑎᒃ ᐊᑯᓂ ᑲᓇᑕᒥᐅᓕᒫᓄᑦ ᐃᑲᔪᖅᓴᕈᑎᓂᒃ ᐃᒡᓗᖃᖏᑦᑐᓄᑦ ᐱᑕᖃᓚᐅᖅᓯᒪᖏᒻᒪᑦ, ᐃᑲᔪᕐᓂᐊᖅᑐᖅ ᑖᓐᓇ ᑮᓇᐅᔭᑎᒍᑦ. ᑮᓇᐅᔭᑦ ᓯᐊᒪᖅᑕᐅᓂᐊᕐᒪᑕ ᐅᑭᐅᓄᑦ ᖁᓕᓄᑦ ᑐᕌᖓᓪᓗᑎᒃ, ᐅᓐᓃᑦ ᔭᔅᑎᓐ ᑐᕉᑐ ᒐᕙᒪᑎᖏᑦ ᓕᐳᕈᓪᑯᑦ ᓂᕈᐊᖅᑕᐅᒃᑲᓐᓂᕋᓱᐊᕐᓂᐊᓕᕐᒥᖕᒪᑕ ᐅᑭᐅᑦ ᒪᕐᕉᒃ ᐊᑕᓂ. ᐱᒻᒪᕆᐅᔪᑎᒋᔭᖓ ᑮᓇᐅᔭᑦ ᑖᒃᑯᐊ, ᓯᕗᓪᓕᖅᐹᒥ $4-ᐱᓕᐊᓐ ᑐᕌᒐᖃᕐᒪᑦ $2,500-ᓂᒃ ᐊᕐᕉᒍᑕᒪᑦ ᐊᑐᖃᑦᑕᕐᓂᐊᕐᒪᑕ ᐊᑐᖅᑐᐊᒐᓄᑦ ᐊᑭᑭᓕᕚᓪᓕᕈᑕᐅᓗᓂ, ᐱᒋᐊᓚᖓᖕᒪᑦ 2020 ᑭᖑᓂᖓᓂ, ᓂᕈᐊᒃᑲᓐᓂᐊᓂᒃᐸᑕ ᑭᓯᐊᓂ.

ᒫᓐᓇᐅᓂᖓᓂ ᓇᓗᓇᖅᑐᖅ ᓱᓕ ᖃᓄᑎᒋ ᐊᒃᑎᒋᔪᒥᒃ ᐅᑭᐅᖅᑕᖅᑐᒥᐅᑦ ᐊᒥᐊᒃᑯᔭᐅᓂᐊᕐᒪᖔᑕ. ᖃᓄᑐᐃᓐᓇᖅ ᕿᒥᕐᕈᓪᓗᒍ ᓇᓗᓇᖏᑦᑐᖅ ᐃᓄᖅᓴᓗᐊᓚᖓᖕᒪᑦ.

ᑕᐃᒪᓐᓇ ᐱᑎᑕᐅᖃᑦᑕᕋᑦᑕ ᐊᑯᓂᐅᓕᖅᑐᖅ, ᓄᓇᕗᒥ ᐃᒡᓗᓕᐅᖅᑕᐅᔪᓐᓇᖅᑐᑦ ᐃᓄᖅᓴᐃᓐᓇᐅᔭᕐᒪᑕ ᐃᒡᓗᑖᕆᐊᓕᖕᓂᒃ ᐊᖑᒻᒪᑎᔮᖏᒻᒥᔪᑦ ᐃᓄᒋᐊᓕᖅᐸᓪᓕᐊᖏᓐᓇᕋᑦᑕ ᓄᓇᕗᒥ.

ᓄᓇᕗᒥ ᐃᒡᓗᓕᕆᔨᕐᔪᐊᒃᑯᑦ (NHC) ᐃᒡᓗᓕᐅᕈᓐᓇᕐᒪᑕ 100-ᓂᑦ 200-ᓄᑦ ᐊᕐᕌᒍᑕᒫᑦ. ᓯᓂᑐ ᑎᓂᔅ ᐹᑐᓯᓐ ᐅᖃᓚᐅᕐᒪᑦ ᓄᓇᕗᒥᐅᑦ ᐃᒡᓗᑖᕆᐊᖃᕐᓂᐊᕐᒪᑕ 3,000-ᓂᒃ ᒫᓐᓇ. ᐊᒻᒪᓗ ᐃᒡᓗᓕᕆᔨᕐᔪᐊᒃᑯᑦ ᐊᖓᔪᖅᑳᖓ ᑎᐅᕆ ᐊᐅᓪᓚᖅ ᐅᖃᖅᓯᒪᒋᓪᓗᓂ 38-ᐳᓴᖏᑦ ᐊᑐᖅᑐᐊᒐᐃᑦ ᐃᒡᓗᐃᑦ ᑕᑕᒻᒪᑕ ᐃᓄᒋᐊᓗᐊᒧᑦ. ᐊᒻᒪᓗ ᓄᓇᕗᒥᐅᑦ ᐃᓄᒋᐊᓕᖅᐸᓪᓕᐊᖏᓐᓇᖅᖢᑎᒃ ᑕᐃᒪᖓᓂᑦ ᓱᕐᓗ ᐃᒪᓐᓇ ᒪᓕᖕᒪᑦ ᓄᑖᒥᒃ ᐃᒡᓗᑖᖅᑐᖃᕌᖓᑦ ᑭᖑᓂᖓᓂ ᓱᓕ ᑕᐃᒪ ᓄᑖᒥᒃ ᕿᑐᖓᖅᑖᖅᑐᖃᕆᓪᓗᓂ. ᓇᓗᓇᖅᑐᖅ ᖃᖓᓕᑭᐊᖅ ᐃᒡᓗᐃᑦ ᐊᖑᒻᒪᑎᔪᓐᓇᖅᓯᔪᒫᖅᐸᑦ ᐃᓄᒋᐊᓕᖅᐸᓪᓕᐊᓂᑦᑎᓐᓂᒃ.

ᑕᐃᒪᖓᓄᓪᓕ ᐊᑭᒋᕙᒃᑕᖏᑦ ᐃᒡᓗᐃᑦ ᓴᓇᔭᐅᑎᓪᓗᒋᑦ ᐊᑐᓂ ᓄᓇᕗᒥ $400,000-ᓂᑦ $550,000-ᓄᑦ, ᐊᑭᖃᖃᑦᑕᕐᒪᑕ ᑕᐃᒪᐃᓐᓂᖓᓄᑦ ᐊᑭᖃᕋᔭᖅᐳᖅ $1.2B-ᒥᑦ $1.6B-ᒧᑦ ᑎᑭᓪᓗᒍ 3,000-ᓂᒃ ᐃᒡᓗᓕᐅᕐᓂᐊᖅᐸᑕ ᐅᓪᓗᒥ. ᐊᒻᒪᓗ ᑖᓐᓇ ᐊᑭᑦᑐᕆᐊᖅᐸᓪᓕᐊᓂᐊᖅᖢᓂ ᑕᐃᒪᖓᓂᑦ ᓂᐅᕕᐊᒃᓴᐃᑦ ᐊᑭᑦᑐᕆᐊᖅᐸᓪᓕᐊᓂᖏᑦ ᒪᓕᒃᓗᒋᑦ ᐊᖑᒻᒪᑎᔪᓇᔮᖏᑦᑐᑦ.

ᓱᓕᒃᑲᓐᓂᑦ ᐊᖑᒻᒪᑎᔪᓐᓇᔮᖏᒻᒥᔪᑦ ᐱᔭᕆᑐᓂᖅᐹᒥᒃ ᐊᑭᖏᓐᓂᒃ ᐋᕿᐅᒪᑎᑦᑎᔪᑏᑦ ᐃᒡᓗᒋᔭᐅᓕᖅᑐᓂᒃ. ᐃᖅᑲᐅᒪᓇᕐᒪᑦ ᐊᑕᐅᓯᕐᒥᒃ ᐃᒡᓗᒥᒃ ᓴᓇᔭᐅᔪᑎᖓ ᓄᓇᓕᖕᓃᓕᖅᖢᓂ $250,000-ᕌᕐᓂᕐᒪᑦ ᐊᑕᐅᓯᕐᒥ ᐅᑭᐅᒥ, ᐊᒻᒪᓗ ᐃᒡᓗᓕᕆᔨᕐᔪᐊᒃᑯᑦ ᑐᑭᑖᕈᑕᐅᒋᐊᖃᕐᓂᕐᒪᑦ ᓴᓇᔭᐅᒋᐊᖃᕐᒪᖔᑦ ᐅᕝᕙᓘᓐᓃᑦ ᐳᐃᒍᖅᑕᐅᖔᕆᐊᖃᕐᒪᖔᑦ. ᑕᐃᒪᓐᓇ ᐃᓱᒪᓕᐅᕆᐊᖃᖃᑦᑕᕐᒪᑕ ᐃᓚᖏᓐᓂ ᓄᓇᓕᖕᓂ.

ᐊᒻᒪᓗ ᐃᖅᑲᐅᒪᔪᒃᓴᐅᒋᕗᓯ ᓄᓇᕗᑦ ᒐᕙᒪᖓ ᐊᑐᖃᑦᑕᕐᒪᑕ $100-ᒥᓕᐊᓐᑖᓚᓂᒃ ᐊᕐᕌᒍᑕᒪᑦ ᐃᑯᒪᖅᑯᑎᓄᑦᑐᐊᖅ ᐊᑐᖅᑐᐊᒐᓂ ᐃᒡᓗᓂ.

ᖃᓄᕐᓕ ᑕᐃᒪ ᒐᕙᒪᑎᑐᖃᒃᑯᑦ ᐊᖑᒻᒪᑎᔪᓐᓇᕐᓂᐊᖅᐸᑦ ᐃᒡᓗᓕᕆᔪᑎᓂᒃ? ᐊᔪᕐᓇᖅᑐᖅ ᓲᖃᐃᒻᒪ.

ᑕᐃᒪᖓᓄᑦ ᕿᓚᓈᕈᓐᓇᖅᑐᒍᑦ ᖃᖓᑐᐃᓐᓇᖅ ᑖᓐᓇ ᐸᕐᓇᐃᔪᑕᐅᓯᒪᔪᖅ ᑲᓇᑕᒥ ᐃᒡᓗᓕᕆᔪᑎᓄᑦ ᓄᓇᕗᒥ ᐃᒡᓗᓕᕆᔨᕐᔪᐊᒃᑯᓐᓄᑦ ᐱᑖᖅᑎᑕᐅᓂᐊᕐᒪᖓᑕ ᐃᓚᖓᓂᒃ ᐊᒥᐊᒃᑯᖓᓂ ᐊᒃᓱᕈᓗᐊᔭᐃᒃᑯᑎᒃᓴᓂᒃ ᐃᒡᓗᓕᕆᔪᑎᑎᒍᑦ ᐱᔭᐅᒋᐊᓕᖕᓄᑦ ᓄᓇᓕᖕᓂ ᖃᐅᑕᒫᑦ ᐊᑐᒐᒃᓴᖏᓐᓄᑦ ᐱᑕᖃᕈᓐᓇᕐᓂᐊᕐᒪᑕ, ᓄᓇᕗᒥᐅᑦ ᐃᒡᓗᖃᖅᑎᑕᐅᒋᐊᖃᕐᒥᖕᒪᑕ ᑕᐃᒫᓴᐃᓐᓇᖅ ᐊᓯᖏᓐᓂ ᑲᓇᑕᒥᐅᓕᒫᑎᑐᑦ.

Leave a Comment:

Your email address will not be published. Required fields are marked *