ᓄᓇᕗᖑᑉᓗᓂ, “ᓄᓇᕗᑦ,” ᖁᕕᐊᓲᑎᖃᖅᑐᖅ 25 ᐅᑭᐅᓄᑦ ᓇᓪᓕᐅᑎᓯᒪᓂᖓ, ᐊᒃᓱᕈᕐᓇᖅᑐᑦ ᐃᒪᐅᔪᑦ ᐱᒻᒪᕆᐅᓂᖃᖅᑐᒥᑦ ᑐᑭᓕᐅᕆᑉᓗᑎᒃ ᓇᓗᓇᐃᖅᑕᐃᓂᖓᓄᑦ ᓄᓇᕗᖑᑉᓗᓂ ᐊᒻᒪᓗ ᐱᖅᖁᓯᕆᔭᐅᔪᒥᒃ.
“ᓄᓇᕗᙳᕐᒪᑦ,” ᐅᖃᖅᑐᖅ ᑭᒡᒐᖅᑐᖅᑎᒋᔭᐅᔪᖅ ᐊᑕᓂᕐᔪᐊᒧᑦ ᒥᐅᕆ ᓴᐃᒪᓐ, ᓇᓗᓇᐃᖅᓯᔪᖅ ᑎᑭᐅᑎᓂᕐᒥᒃ ᓴᖅᕿᑕᐅᓂᖏᓐᓄᑦ ᓄᓇᖃᖅᖄᖅᑐᑦ ᐱᔪᖕᓇᐅᑎᖏᑦ, ᐱᓗᐊᖅᑐᒥᑦ ᐃᓄᐃᑦ ᐱᔪᖕᓇᐅᑎᖏᓐᓂᑦ, ᐊᒻᒪᓗ ᒥᐊᓂᕆᔭᐅᓂᖓ ᐊᒻᒪᓗ ᓴᖅᕿᔮᖅᑎᑕᐅᓂᖓ ᐃᓄᐃᑦ ᐱᖅᖁᓯᖓᑦ ᐊᒻᒪᓗ ᐅᖃᐅᓯᖓᑦ ᐊᒻᒪᓗ ᓇᑭᙶᖅᓯᒪᓂᖓᓐᓂᑦ.”
ᓄᓇᑖᕋᓱᖕᓂᖅ ᓴᖅᕿᑦᑎᓂᐊᕐᓗᓂ ᐱᓕᕆᐊᕆᓂᐊᕐᓗᒍ ᐊᑐᖅᑕᐅᓂᐊᖅᑐᓂᒃ ᐊᒻᒪᓗ ᒪᓕᒐᓂᒃ ᐃᓄᐃᑦ ᐅᖃᐅᓯᖓᓄᑦ ᐱᒋᐊᖅᑎᑕᐅᓂᖃᓚᐅᖅᑐᖅ 25 ᐅᑭᐅᑦ ᐊᓂᒍᖅᓯᒪᓕᖅᑐᓂᑦ, ᑭᓯᐊᓂ ᑐᓂᓯᑉᓗᓂ ᐱᓕᕆᕝᕕᒋᔭᐅᓂᐊᖅᑐᒥᑦ ᖃᐅᑕᒫᑦ ᓱᓕᓂᕆᔭᖏᓐᓂᑦ ᓄᓇᕗᒻᒥᐅᑕᐃᑦ ᐊᔾᔨᒋᙱᓯᒪᔭᖓ, ᐊᔾᔨᒋᙱᑕᖏᓐᓂᑦ ᐊᒃᓱᕈᕐᓇᕐᓂᖅᑕᖃᐅᖅᖢᓂ, ᐊᑐᖅᑕᐅᔪᒥᑦ.
ᑎᕆᒡᓗᐃᑦ ᐃᓄᐃᑦ ᐅᖃᐅᓯᖓᓄᑦ ᑕᖅᕿᕆᔭᐅᔪᖅ, ᐊᒻᒪᓗ ᐅᑭᐅᖑᔪᖅ, ᐃᓚᖃᒃᑲᓐᓂᖅᑐᖅ ᓴᕆᒪᓲᑎᒋᔭᒃᓴᒥᒃ ᓄᓇᕗᑦ ᐅᖃᐅᓯᑐᖃᖓ ᐊᑕᐅᑦᑎᒃᑰᖃᑎᑕᕐᒪᑦ 25 ᐅᑭᐅᓄᑦ ᓇᓪᓕᐅᑎᓯᒪᓂᖓ ᓄᓇᕗᑦ ᒪᓕᒐᓕᐅᕐᕕᖓᑦ ᐱᑕᖃᓕᓚᐅᖅᑎᓪᓗᒍ.
ᑳᕐᓖᓐ ᐋᕆᐊᒃ, ᓄᓇᕗᒻᒥᑦ ᐅᖃᐅᓯᓕᕆᓂᕐᒧᑦ ᑲᒥᓯᓇ, ᖃᐅᔨᑎᑦᑎᔪᖅ “ᓂᕆᐅᑦᑎᐊᖏᓐᓇᖃᑦᑕᖅᑐᖓ ᐃᓂᖃᖅᑎᑦᑎᒐᑉᑕ ᑕᖅᕿᒥᒃ ᖁᕕᐊᓲᑎᒋᓂᐊᕐᓗᒍ ᐅᖃᐅᓯᕗᑦ… ᑕᒪᓐᓇ ᐅᖃᐅᓯᕇᓐᓇᖃᑦᑕᖅᑕᕋ ᐅᑭᐅᑉ ᐃᓗᐊᓂᑦ, ᑭᓯᐊᓂ ᐱᕕᖃᕈᒪᔪᖓ ᐃᖅᖃᐃᑎᓪᓗᒋᑦ ᑭᑐᑐᐃᓐᓇᐃᑦ ᐅᖃᐅᓯᕐᒧᑦ ᐱᔪᖕᓇᐅᑎᒋᔭᑉᑎᖕᓂᑦ. ᐅᖃᐅᓯᕗᑦ ᐅᕙᑉᑎᖕᓃᖏᓐᓇᖅᑐᖅ ᐃᓄᐃᑦ ᖃᑕᙳᑎᒌᖑᑉᓗᑕ, ᐱᓗᐊᖅᑐᒥᑦ ᓇᖕᒥᓂᖅ ᕿᑐᙵᑉᑎᖕᓂᑦ,” ᐅᖃᖅᑐᖅ ᑳᕐᓖᓐ, ᐅᖃᐅᓯᕆᑉᓗᒍ ᐊᓈᓇᓂ, ᐄᕙ ᐋᕆᐊᒃ, ᓄᓇᕗᑦ ᓯᕗᓪᓕᖅᐹᕆᓚᐅᖅᑕᖓ ᐅᖃᐅᓯᓕᕆᓂᕐᒧᑦ ᑲᒥᓯᓇᐅᑉᓗᓂ, ᓯᕗᓕᖅᑎᐅᓚᐅᖅᑐᖅ ᐊᒻᒪᓗ ᒫᓐᓇ ᑲᒥᓯᓇᐅᓕᖅᑐᖅ.
“ᐃᓐᓇᐅᓂᖅᓴᐅᓕᖅᑐᓄᑦ, ᐱᒻᒪᕆᐅᓚᐅᖅᑐᖅ ᑐᑭᓯᐊᓗᓂ ᖃᓄᐃᓕᐅᖅᐸᓪᓕᐊᔪᓂᒃ ᓄᓇᕗᒻᒥᑦ. ᐱᕈᖅᓴᑉᓗᓂ ᖃᐅᔨᒪᑦᑎᐊᖅᖢᓂ ᐃᓄᒃᑎᑐᑦ ᐅᖃᓪᓚᖃᑦᑕᖅᑐᓂᒃ, ᓇᖕᒥᓂᖅ ᐱᔪᒪᓂᖃᓚᐅᖅᑐᖓ ᑐᓴᒐᒃᓴᓕᕆᓂᕐᒥᒃ, ᐊᒻᒪᓗ ᐊᐅᓚᔪᓕᐅᕆᖃᑕᐅᓂᕐᒥᒃ, ᐃᓄᖕᓄᑦ ᑐᕌᖓᔪᓂᑦ,” ᑳᕐᓖᓐ ᐅᖃᖅᑐᖅ. “ᑕᒪᓐᓇ ᐃᓱᒪᒻᓃᖏᓐᓇᖃᑦᑕᓚᐅᖅᑐᖅ, ᐱᓗᐊᖅᑐᒥᑦ ᐱᒻᒪᕆᐅᓂᖓᑕ ᐃᓄᒃᑎᑐᑦ ᐊᑐᖅᑕᐅᓂᖓ ᐃᓄᖕᓄᑦ ᑐᕌᖓᔪᓂᑦ ᑐᓴᒐᒃᓴᓕᕆᓂᕐᒥᑦ. ᐃᓚᖓᑦ ᐱᓕᕆᐊᕆᓯᒪᔭᒻᓂᑦ ᐅᖃᐅᓯᓕᕆᓂᕐᒧᑦ ᑲᒥᓯᓇᐅᑉᓗᖓ ᑕᐅᑐᒐᖃᕐᓂᖅ ᐃᓄᖕᓄᑦ ᑐᕌᖓᔪᒃᑯᑦ ᑐᓴᒐᒃᓴᓕᕆᓂᕐᒧᑦ ᐊᑉᖁᑎᒋᔭᐅᔪᓂᑦ.”
ᑳᕐᓖᓐ ᐅᖃᖅᑐᖅ ᐱᓕᕆᐊᕆᔭᖓ ᓄᓇᕗᑦ ᐅᖃᐅᓯᕐᒧᑦ ᐱᔪᖕᓇᐅᑎᖏᑦ “ᑎᒍᒥᐊᖅᑕᐅᓗᑎᒃ… ᐃᓄᐃᑦ ᐅᖃᐅᓯᖏᓐᓄᑦ ᐱᔨᑦᑎᕋᐅᑏᑦ ᒪᓂᒪᑎᓪᓗᒋᑦ.”
ᐃᓚᐅᔪᑦ ᐊᑐᖅᑕᐅᓂᖏᑦ ᐊᒻᒪᓗ ᒪᓂᒪᑎᑕᐅᓂᖏᑦ ᐱᔨᑦᑎᕋᐅᑏᑦ ᐃᓄᒃᑎᑑᕐᓗᑎᒃ, ᐃᓚᐅᑉᓗᑎᒃ ᐃᓄᒃᑎᑐᑦ ᐊᒻᒪᓗ ᐃᓄᐃᓐᓇᖅᑐᑦ, ᐅᐃᕖᑎᑐᑦ ᐊᒻᒪᓗ ᖃᑉᓗᓈᑎᑐᑦ. ᐅᖃᐅᓰᑦ ᑕᑯᒃᓴᐅᑎᑕᐅᔭᕆᐊᖃᖅᑐᑦ ᑭᑐᑐᐃᓐᓇᓂᒃ ᐱᔨᑦᑎᕋᐃᖃᑦᑕᖅᑐᓂᑦ ᖃᐅᔨᒃᑲᐅᑎᖏᓐᓂᑦ ᐊᒻᒪᓗ ᓄᓇᕗᒻᒥ ᑐᓴᒐᒃᓴᓕᐊᖑᔪᓂᑦ, ᐊᒻᒪᓗ “ᖃᓄᑐᐃᓐᓇᖅ ᑲᒪᖃᑦᑕᖅᑐᓂᒃ ᐅᕝᕙᓘᓐᓃᑦ ᐱᔨᑦᑎᕋᐃᖃᑦᑕᖅᑐᓂᒃ ᑭᑐᑐᐃᓐᓇᓄᑦ ᐅᖃᓪᓚᖃᑦᑕᕆᐊᖃᖅᖢᑎᒃ ᐅᕝᕙᓘᓐᓃᑦ ᑎᑎᕋᖅᓯᒪᔪᒃᑯᑦ.” ᒪᓕᒡᓗᒋᑦ ᐊᑐᖅᑕᐅᔪᑦ ᐅᖃᐅᓯᓕᕆᓂᕐᒧᑦ ᐱᖁᔭᖅ ᐊᒻᒪᓗ ᐃᓄᐃᑦ ᐅᖃᐅᓯᖏᓐᓂᒃ ᒥᐊᓂᕆᔭᐅᓂᖏᓐᓄᑦ ᐱᖁᔭᖅ.
ᐊᓪᓚᕝᕕᖓ ᐅᖃᐅᓯᓕᕆᓂᕐᒧᑦ ᑲᒥᓯᓇᐅᑉ ᐱᔭᒃᓴᐅᑎᒋᔭᖓᓂᑦ ᐃᓚᐅᖕᒥᔪᑦ ᖃᐅᔨᓴᐃᖃᑦᑕᕐᓂᖅ ᓱᓇᑐᐃᓐᓇᓂᒃ ᐅᓐᓂᕐᓘᑕᐅᔪᓂᒃ ᓯᖁᒥᑦᑎᔪᓂᒃ ᐱᖁᔭᕐᒥᑦ.
“ᓄᓇᕗᒻᒥᐅᑕᐃᑦ ᐃᓱᒪᒍᑎᒃ ᐱᔪᖕᓇᐅᑎᖏᑦ ᐃᓱᒪᒋᔭᐅᖏᓐᓂᖏᓐᓄᑦ, ᖃᐅᔨᑎᑕᐅᔪᖕᓇᖅᑐᖅ ᐊᓪᓚᕝᕕᒐ ᑐᓂᓯᓗᑎᒡᓗ ᐃᓱᒫᓘᑎᒋᔭᖏᓐᓂᒃ ᐅᕝᕙᓘᓐᓃᑦ ᐅᓐᓂᕐᓘᑎᒋᔭᖏᓐᓂᒃ, ᐊᒻᒪᓗ ᖃᐅᔨᓴᕐᓂᐊᖅᑕᕗᑦ ᐊᒻᒪᓗ ᖃᐅᔨᓗᑕ ᐃᓱᒫᓘᑕᐅᔪᑦ ᐊᑐᖅᑕᐅᔪᖕᓇᕐᒪᖔᑦ ᐅᖃᐅᓯᓕᕆᓂᕐᒧᑦ ᒪᓕᒐᑎᒍᑦ.”
ᐱᖁᔭᐃᑦ ᐊᑐᖅᑐᑦ ᒐᕙᒪᑐᖃᒃᑯᓐᓄᑦ, ᓄᓇᕗᒻᒥ ᒐᕙᒪᒃᑯᑦ ᐊᕕᒃᑐᖅᓯᒪᔪᖏᓐᓄᑦ, ᑭᑐᑐᐃᓐᓇᓄᑦ ᐱᔾᔪᔾᔨᔨᐅᔪᓄᑦ, ᓄᓇᓕᖕᓄᑦ ᐊᒻᒪᓗ ᓇᖕᒥᓂᖅ ᐱᓕᕆᐊᖃᖅᑐᓄᑦ.
“ᐱᓕᕆᐊᖃᖃᑦᑕᕐᒥᔪᒍᑦ,” ᑳᕐᓖᓐ ᐅᖃᖅᑐᖅ, “ᐃᑲᔪᕐᓗᒋᑦ ᓇᖕᒥᓂᖅ ᐱᓕᕆᐊᖃᖃᑦᑕᖅᑐᑦ ᒪᓕᒃᑕᐅᓂᐊᕐᓗᓂ ᐱᖁᔭᖅ. ᑲᒻᐸᓂᐅᔪᖅ ᒫᓐᓇᐅᔪᖅ ᒪᓕᙱᑉᐸᑦ, ᐃᑲᔪᕈᖕᓇᖅᑕᕗᑦ ᐊᑐᕐᓗᑕ ᐃᓄᐃᑦ ᐅᖃᐅᓯᖓᓄᑦ ᐸᕐᓇᐅᑎᒥᑦ, ᐅᕝᕙᓘᓐᓃᑦ ᐊᓯᖏᓐᓄᐊᖅᑎᓪᓗᒋᑦ ᐱᔨᑦᑎᕋᐃᖃᑦᑕᖅᑐᓄᑦ ᐃᑲᔪᖅᑕᐅᒃᑲᓐᓂᕐᓂᐊᕐᓗᑎᒃ.”
ᓄᓇᕗᒻᒧᑦ ᑲᒥᓯᓇᐅᑉ ᐱᔭᒃᓴᐅᑎᒋᔭᖓ ᐊᔾᔨᒋᙱᑕᖓ ᐱᓕᕆᐊᖑᔪᒥᑦ ᐱᖅᖁᓯᓕᕆᔨᒃᑯᓐᓂᑦ ᐊᒻᒪᓗ ᐃᓄᐃᑦ ᐅᖃᐅᓯᖏᓐᓂᒃ ᑕᐃᒎᓯᓕᐅᖅᑎᒃᑯᓐᓂᑦ - ᐅᕝᕙᓘᓐᓃᑦ ᐃᓄᐃᑦ ᐅᖃᐅᓯᖏᓐᓄᑦ ᐱᔪᖕᓇᖅᑎᑦᑎᔨᒃᑯᓐᓂᑦ - ᑭᓯᐊᓂ ᐃᓛᓐᓂᒃᑯᑦ ᑐᑭᒧᐊᒃᓯᒪᔪᒃᑯᑦ ᐱᓕᕆᖃᑎᒌᖃᑦᑕᖅᑐᑦ. ᐃᓄᐃᑦ ᐅᖃᐅᓯᖏᓐᓂᒃ ᑕᐃᒎᓯᓕᐅᖅᑏᑦ ᐱᓕᕆᐊᖃᖃᑦᑕᖅᑐᑦ ᐊᓯᐅᔨᑦᑕᐃᓕᓂᐊᕐᓗᒋᑦ ᐅᖃᖅᓯᒪᔪᑦ ᑐᑭᐅᔪᑦ, ᐊᑕᐅᓯᐅᓕᖓᓕᖅᑎᕆᑉᓗᑎᒃ ᐃᓄᒃᑐᑦ ᐅᖃᐅᓯᕐᒧᑦ ᑐᑭᐅᔪᒥᒃ ᐊᒻᒪᓗ ᖃᐅᔨᓴᖅᖢᒋᑦ ᓄᓇᕗᒻᒥ ᒐᕙᒪᒃᑯᑦ ᐃᖅᖃᓇᐃᔭᖅᑎᖏᑦ ᐃᓚᒋᔭᐅᑉᓗᓂ ᐃᓄᐃᑦ ᐅᖃᐅᓯᖓᑦ ᐊᑐᖅᑕᐅᔭᕆᐊᖃᖅᑎᑦᑎᔪᒧᑦ.
ᑳᕐᓖᓐ ᑲᑎᒪᔪᓃᖃᑕᐅᓂᐊᓚᐅᖅᑐᖅ ᐃᒡᓗᕐᔪᐊᖅ 157-ᒥᑦ, ᐃᓄᐃᑦ ᐅᖃᐅᓯᖏᓐᓂᒃ ᑕᐃᒎᓯᓕᐅᖅᑏᑦ ᐊᓪᓚᕝᕕᖃᕐᕕᒋᔭᖓᓂᑦ, ᐃᑯᐊᓪᓚᓚᐅᖅᑎᓪᓗᒍ ᐃᒡᓗᕐᔪᐊᖅ ᓇᑦᑎᐊᑦ 26-ᒥᑦ.
“ᑐᓴᕋᒪ ᐃᒡᓗᕐᔪᐊᖅ ᐃᑭᑦᑐᒥᑦ, ᐊᖏᔪᒥᒃ ᐊᓯᐅᔨᔫᑎᒋᓚᐅᖅᑕᒃᑲ ᐃᓄᐃᑦ. ᑕᐃᒪᑐᖅ ᐋᖅᕿᒍᖕᓇᑲᐅᑎᒋᖕᓇᕐᓂᐊᖅᐳᑦ, ᐱᓕᕆᐊᖓᑦ ᐱᒻᒪᕆᐅᑦᑎᐊᕐᒪᑦ,” ᐅᖃᖅᑐᖅ ᑳᕐᓖᓐ.
ᒫᓐᓇᐅᔪᒥᑦ, ᐱᓕᕆᐊᒥᓂᒃ ᐱᓕᕆᐊᖃᖅᑐᖅ.
“ᐃᓕᑦᑎᕙᓪᓕᐊᖏᓐᓇᕐᓂᕐᒥᒃ ᐱᔾᔪᑎᖃᖅᑐᖅ ᐅᖃᐅᓯᕆᔭᕗᑦ, ᐱᒻᒪᕆᐅᒌᓐᓇᖃᑦᑕᖅᑕᕋ, ᐅᖃᐅᓯᕆᔭᕗᑐᐃᓐᓇᐅᖏᑦᑐᖅ, ᑭᓯᐊᓂ ᐊᓯᖏᓐᓄᑦ ᐅᖃᐅᓯᕆᔭᐅᔪᓗᒃᑖᑦ,” ᑳᕐᓖᓐ ᐅᖃᖅᑐᖅ.
ᑭᓯᐊᓂ, ᐃᓚᓯᔪᖅ, “ᐱᐅᓯᒋᐊᖅᓯᓂᖅᑕᖃᐃᓐᓇᕈᖕᓇᖅᑐᖅ. ᑭᓯᐊᓂ ᐊᓪᓚᕝᕕᒐ ᐃᓱᒫᓘᑎᒋᔭᐅᔪᓂᒃ ᐱᒃᐸᑦ, ᓇᓗᓇᐃᖅᓯᓂᐅᔪᖅ ᐱᑕᖃᖅᑐᖅ ᐱᐅᓯᒋᐊᖅᑕᐅᔪᖕᓇᕐᓂᖏᓐᓄᑦ ᐱᔨᑦᑎᕋᐅᑎᐅᔪᑦ ᓄᓇᕗᒻᒥᑦ.”
ᐊᓪᓚᕝᕕᒃ ᐃᖃᓗᖕᓃᑦᑐᖅ, ᑭᓯᐊᓂ ᐊᓪᓚᕝᕕᒃ ᖃᐅᔨᒋᐊᕐᕕᐅᔪᒪᒃᐸᑦ ᖃᕆᓴᐅᔭᒃᑯᑦ ᑎᑎᖅᖃᑎᒍᑦ ᑎᑎᕋᕐᕕᐅᔪᖕᓇᖅᑐᖅ ᐅᕝᕙᓘᓐᓃᑦ ᐅᖄᓚᐅᑎᒃᑯᑦ.
ᑳᕐᓖᓐ ᓂᕆᐅᒋᑦᑎᐊᖅᑐᖅ ᐱᔾᔪᑎᒋᔭᐅᔪᒥᒃ ᐊᒻᒪᓗ ᐊᔾᔨᒌᙱᑦᑐᓂᒃ ᖃᓄᐃᓕᐅᖅᑎᑦᑎᓂᐊᕐᓂᖏᓐᓄᑦ ᐱᖅᖁᓯᓕᕆᔨᒃᑯᑦ ᑕᒡᕙᓂ ᑕᖅᕿᕐᒥᑦ.
ᑲᒪᒋᓂᐊᖅᑕᖏᑦ ᖃᑉᓯᐊᕐᔪᐃᑦ ᖃᓄᐃᓕᐅᕈᑕᐅᓂᐊᖅᑐᑦ ᖃᐃᔪᒥᑦ ᑕᖅᕿᒥᑦ. ᓄᓇᕗᒻᒥᐅᓂᒃ ᖁᕕᐊᓲᑎᖃᕈᒪᔪᓂᒃ ᑲᑎᖃᑕᐅᖁᔨᔪᖅ ᐃᓚᐅᖃᑕᐅᓂᐊᕐᓗᑎᒃ.